ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް އަޅަން ނިންމައިފި

ވިލިމާލޭގައި 100 އެނދުގެ ޓާޝަރީ ހޮސްޕިޓަލެއް އަޅަން ނިންމައި، އެކަމުގެ ސާވޭ ހަދަން ފަށައިފި އެވެ.

އެ ހޮސްޕިޓަލްގެ ކަންތައް ބަލަހައްޓާ، ދަރުމަވަންތަ ހޮސްޕިޓަލްގެ ސީއީއޯ އިބްރާހިމް ހަލީމް "މިހާރު" މިރޭ ވިދާޅުވީ ހޮސްޕިޓަލްގެ ނަމުގައި ހިންގިއަސް، މިހާރު ވިލިމާލޭ ހޮސްޕިޓަލުން އެކަށީގެންވާ ހިދުމަތެއް ނުލިބޭ ކަމަށެވެ. އެހެންވެ، އެކަންކަން ރަނގަޅުކުރުމަކީ ރައީސް ޑރ. މުހައްމަދު މުއިއްޒުގެ ވައުދެއް ކަމަށާއި އެކަމަކު، ހިދުމަތްތައް ރަނގަޅުކުރުމަށް އެ އިމާރާތަކީ އެކަށީގެންވާ ތަނެއް ނޫން ކަމަށް އޭނާ ވިދާޅުވި އެވެ.

ގުޅީފަޅާއި ގިރާވަރުފަޅު ތަރައްގީކޮށް، އެ ތަންތަނުގައި މީހުން އާބާދުކޮށް ވިލިމާލެއަށް ބްރިޖުން ގުޅާލުމުގެ މަސައްކަތް ވެސް ކުރަމުން އަންނާތީ ވިލިމާލޭގައި ފެންވަރު ރަނގަޅު އާ ހޮސްޕިޓަލެއް އަޅަން ސަރުކާރުން ނިންމީ ކަމަށް އޭނާ ވިދާޅުވި އެވެ.

ހަލީމް ވިދާޅުވީ 100 އެނދުގެ ޓާޝަރީ ހޮސްޕިޓަލްގެ ސާވޭ ހެދުމަށް ފަހު، އަންނަ އަހަރުގެ ތެރޭގައި އަމަލީ މަސައްކަތް ފަށާނެ ކަމަށެވެ. އޭނާ ވިދާޅުވީ އަމާޒަކީ ދެ އަހަރުގެ ތެރޭގައި އަމަލީ މަސައްކަތްތައް ނިންމައި ބޭނުންކުރަން ފެށުން ކަމަށެވެ.

"...އެކަށީގެންވާ ކޮންސަލްޓޭޝަން ރޫމާއި ލެބޯޓްރީއެއް ނެތް މި ވަގުތު. އިމަޖެންސީ ކޭސްތައް އެކަނި ބެލެނީ. އީއާރުގައި ވެސް އެންމެ ފަސް އެނދު މި ހުރީ. ސިއްހީ ހިދުމަތް ލިބޭ ރަނގަޅު ތަނެއް އެޅުމަކީ ކުރަންޖެހޭ ކަމެއް. ކުރިއަށް އޮތް 2-3 އަހަރަށް ކަންކަން ކުރުމުގެ ބަދަލުގައި ވިލިމާލޭގައި 100 އެނދުގެ ޓާޝަރީ އާ ހޮސްޕިޓަލެއް އަޅަން ނިންމީ. އެ ތަން ނިމުނީމާ ޓާޝަރީ ހޮސްޕިޓަލަކުން ލިބޭ ހުރިހާ ހިދުމަތެއް ލިބޭނެ." ހަލީމް ވިދާޅުވި އެވެ.

އޭނާ ވިދާޅުވި ގޮތުގައި، ސާވޭ ކުރާއިރު، އެ ހޮސްޕިޓަލް މިހާރު ހިންގާ ބިމުގައި އާ އިމާރާތެއް އެޅޭ ނަމަ އެ ތަން ހަދާނީ މިހާރު ވެސް ހޮސްޕިޓަލް ހިންގާ ބިމުގަ އެވެ. އެކަމަކު، އެކަށީގެންވާ ޖާގަ ނުލިބޭ ނަމަ، ޓާޝަރީ ހޮސްޕިޓަލް އަޅާނީ ވިލިމާލެ ހޮސްޕިޓަލް މިހާރު ހިންގާ ތަން ތަޅާލުމަށް ފަހު ކަމަށް ވިދާޅުވި އެވެ.

ހޮސްޕިޓަލް ތަޅާލާ ނަމަ، ވިލިމާލޭގައި މިހާރު އުޅޭ މީހުން ފަރުވާ ހޯދުމަށް ވަގުތީ ގޮތުން ކްލިނިކެއް ނުވަތަ ސިއްހީ މަރުކަޒެއް ހުޅުވައި ޑޮކްޓަރަށް ދެއްކޭ ގޮތްތައް ހަމަޖައްސާނެކަން ހަލީމް ވިދާޅުވި އެވެ.

"އިމަޖެންސީ ކޭސްއެއްގައި ނަމަ މާލެ ގެނެވޭ ގޮތަށް ސީ އެމްބިއުލާންސެއް ބާއްވާނަން." އޭނާ ވިދާޅުވި އެވެ.

ވިލިމާލެ އަކީ ތިމާވެއްޓާ ރައްޓެހިގޮތަކަށް ތަރައްގީކުރަމުން އަންނަ ތަނަކަށް ވާތީ، އާ ހޮސްޕިޓަލް ވެސް އަޅާނީ އެ ގޮތަށް ކަމަށް ވިދާޅުވި އެވެ.

ސަރުކާރުން މިހާރު އަންނަނީ އެ ހޮސްޕިޓަލަށް ބޭނުންވާ ފަންޑު ހަމަޖެއްސުމުގެ މަސައްކަތް ކުރަމުންނެވެ. ހެލްތު މިނިސްޓަރާ ހަވާލައިދެއްވައި، ހަލީމް ވިދާޚުވީ ވިލިމާލެ ޓާޝަރީ ހޮސްޕިޓަލަށް ޗައިނާގެ ސަރުކާރުގެ އެހީތެރިކަން ވެސް ލިބޭނެ ކަމަށެވެ.