އަހަރަކު ދެ ފަހަރު މެޑިކަލް ޗެކަޕް ހެދުން ގަބޫލެއް ނުކުރަން: އާސަންދަ

އަހަރަކު ދެ ފަހަރު މެޑިކަލް ޗެކްއަޕެއްގެ ގޮތުގައި އެކަން ކުރަން ޖެހޭ ކަމަށް ގަބޫލު ނުކުރައްވާ ކަމަށް އާސަންދައިގެ މެނޭޖިން ޑިރެކްޓަރު އައިމިނަތު ޒީނިއާ ވިދާޅުވެއްޖެ އެވެ.

މިއަދު އެސްއޯއީ ކޮމިޓީގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން އޭނާ ވިދާޅުވީ، މެޑިކަލް ޗެކްއަޕެއްގެ ތެރެއިން އެކްސްރޭ ފަދަ ތަކެތި ނަގަން ޖެހޭ އިރު އެއީ ބަލި މީހަކު މާގިނައިން އެކްސްޕޯސް ކުރަން ރަނގަޅު ކަންކަމެއް ނޫން ކަމަށެވެ.

"މީގެ ތަންކޮޅެއް ކުރިން ވެސް މެޑިކަލް ޗެކްއަޕް ފަށަން ވެގެން، ޕެކޭޖުތައް ހެދި އިރު ވެސް އަހަރަކު އެއް ފަހަރު ނުވަތަ ދެ އަހަރުން އެއް އަހަރު ހެދޭ ކަހަލަ ޓެސްޓުތައް ވެސް ލާފަ ޗެކްއަޕްތަކެއް ހަދަން ހިމެނީ. އަޅުގަނޑުމެން އެ މައުލޫމާތު އެންސްޕާއާ ހިއްސާކޮށްފައިވާނީ،" އޭނާ ވިދާޅުވި އެވެ.

އޭނާ ވިދާޅުވީ، މެޑިކަލް ޗެކްއަޕް ކީ ކަމުގައިވީ ނަމަވެސް، ވަރަށް ބޭސިކް ސްކްރީނިންތަކެއް ހެދުމަށް ހަމަޖައްސާފައިވާ ކަމަށެވެ. އެގޮތުން ބްލަޑް އަދި ޔޫރިން ޓެސްޓްތަކެއް ހެދުމަށް ފަހު، އިތުރަށް ކަންކަން ޗެކް ކުރާނީ ޓެސްޓްތަކުގެ ނަތީޖާއިން ކަމެއް ފާހަގަކުރެވޭ ކަމުގައިވާ ނަމަ ކަމަށެވެ.

އޭނާ ވިދާޅުވީ، މެޑިކަލް ޗެކަޕްގެ ކަންކަން ކުރިއަށް ދާނެ ގޮތް ނިންމާނީ އެންސްޕާއިން ކަމަށެވެ

އާސަންދަ ފެށުނީއްސުރެ އެތަނުގައި މަސައްކަތް ކުރާ ޒީނިއާ އެހެން ވިދާޅުވި އިރު މިދިޔަ ހަފްތާގައި ރައީސް ވަނީ އަހަރަކު ދެ ފަހަރު އާސަންދަ މެދުވެރިކޮށް މެޑިކަލް ޗެކަޕް ހެއްދޭނެ ގޮތް ހަމަޖައްސަވާފަ އެވެ.