އާސަންދައިން ޔޫއޭއީ/ބެންކޮކްގެ ތިން ހޮސްޕިޓަލަކާ އެކު ސޮއިކޮށްފި، އަންނަ މަހު މީހުން ފޮނުވަން ފަށާނެ

އާސަންދައިގެ ދަށުން ހިދުމަތް ދިނުމަށް ޔޫއޭއީ އާއި ތައިލެންޑުގެ ބެންކޮކްގެ ތިން ހޮސްޕިޓަލަކާ އެކު މިއަދު ސޮއިކޮށް، އަންނަ މަހުން ފެށިގެން ހިދުމަތް ދޭން ނިންމައިފި އެވެ.

ޔޫއޭއީގެ އެއް ހޮސްޕިޓަލް އަދި ބެންކޮކްގެ ދެ ހޮސްޕިޓަލަކުން އާސަންދައިގެ ހިދުމަތް ދިނުމުގެ އެއްބަސްވުމުގައި ސޮއިކުރެއްވީ އާސަންދަ ކުންފުނީގެ މެނޭޖިން ޑިރެކްޓަރު އާމިނަތު ޒީނިޔާ އެވެ. އެ ހޮސްޕިޓަލުތަކުން ސޮއިކުރެއްވީ އިސްވެރިންނެވެ.

އާސަންދައިގެ ދަށުން ހިދުމަތް ލިބޭނީ ޔޫއޭއީގެ ވެރިރަށް އަބޫދާބީގެ ބުރްޖީލް މެޑިކަލް ސިޓީ އާއި ބެންކޮކްގެ ވޯލްޑް މެޑިކަލް ހޮސްޕިޓަލް އަދި ބެންކޮކް ހޮސްޕިޓަލުންނެވެ.

ޗައިނާގެ ރައީސް ޝީ ޖިންޕިންގެ ދައުވަތަކަށް މިދިޔަ ޖެނުއަރީ މަހު އެ ގައުމަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށް ފަހު، ރައީސް ޑރ. މުހައްމަދު މުއިއްޒު ވަނީ ތައިލެންޑާއި ދުބާއީން ދިވެހިންނަށް އާސަންދަ ސްކީމުގެ ދަށުން ބޭސް ފަރުވާ ކުރެވޭނެ އިންތިޒާމު ހަމަޖެއްސުމަށް ސަރުކާރުން މަސައްކަތް ކުރަމުން އަންނަ ކަން އިއުލާން ކުރައްވައިފަ އެވެ.

އެ ތިން ހޮސްޕިޓަލާ އެކު ސޮއިކުރުމުން، ކަނޑައެޅޭ އުސޫލުގެ ތެރެއިން އަންނަ މަހުގެ 15 އިން ފެށިގެން ފަރުވާއަށް މީހުން ފޮނުވަން ފަށާނެ އެވެ.

ރައީސް މުއިއްޒު މި އަހަރުގެ ޖެނުއަރީ މަހު ވިދާޅުވެފައިވަނީ އާސަންދައަކީ "ހަމައެކަނި ވަކި ދިމާއެއްގައި" އޮންނަ ވަކި ގައުމެއްގައި ހުންނަ މެޑިކަލް ފެސިލިޓީތަކަށް އެކަނި ގޮސްގެން ލިބޭ ހިދުމަތަކަށް ވާން އެ މަނިކުފާނު ބޭނުންފުޅު ނުވާ ކަމަށެވެ. އެހެންވެ، ފެންވަރު ރަނގަޅު ގައުމުތަކަށް އާސަންދައިގެ ހިދުމަތް ފުޅާކުރައްވާނެ ކަމަށް ވިދާޅުވި އެވެ.

"އެ ތަނަށް ދާއިރުގައި އެ ތަނުގެ އެކޮމޮޑޭޝަން އެކްސްޕެންސަސް އޭގައި ހިމެނޭ ގޮތަށް އިރާދަކުރެއްވިއްޔާ އަޅުގަނޑުމެންގެ އާސަންދަ ފުޅާކުރާނަން. އޭރުން އަޅުގަނޑުމެންގެ ދިވެހި ރައްޔިތުން، މި ގައުމުގެ ހެލްތު ފެސިލިޓީ ތަރައްގީ ވަންދެކަށް ދާނ،ީ މިހާރު އެދާ ތަންތަނަށް ވުރެ މާ ފެންވަރު ރަނގަޅު، ދުބާއީ ކަހަލަ އަދި ބެންކޮކްގައި ހުންނަ ކަހަލަ ފެންވަރު ރަނގަޅު ހޮސްޕިޓަލްތަކަށް، އެކޮމޮޑޭޝަން އެކްސްޕެންސަސް ލިބިގެން، އާސަންދަ އިން ކަވަރު ވެގެން،" ރައީސް މުއިއްޒު ޗައިނާ އަށް ކުރެއްވި ފުރަމާނަ ދަތުރުފުޅަށް ފަހު ރާއްޖެ ވަޑައިގެން ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާ ވާހަކަފުޅު ދައްކަވަމުން އެ މަނިކުފާނު ވިދާޅުވި އެވެ.

އާސަންދައިގައި ބޭރުގެ 57 ހޮސްޕިޓަލެއް ވަނީ އެމްޕެނަލް ވެފަ އެވެ. އޭގެ ތެރެއިން، މިހާތަނަށް ފަރުވާއަށް ފޮނުވަމުން ދިޔައީ ލަންކާ އަދި އިންޑިއާއަށެވެ. އެއީ ލަންކާގެ އަށް ހޮސްޕިޓަލް އަދި އިންޑިއާގެ 49 ތަނެކެވެ.