ޔޫއޭއީ އާއި ތައިލެންޑުން އާސަންދަ ލިބޭނެ ދުވަހެއް ވަރަށް އަވަހަށް އިއުލާން ކުރާނެ: ހީނާ

ދުނިޔޭގައި އެންމެ ރަނގަޅު ބޭސްފަރުވާ ދޭ އަދި ސިއްހީ ހިދުމަތުގެ އަގު ބޮޑު ގައުމުތަކުގެ ތެރޭގައި ހިމެނޭ ތައިލެންޑާއި ޔޫއޭއީ އިން ވެސް ދިވެހިންނަށް އާސަންދައިގެ ހިދުމަތް ލިބެން ފަށާނެ ދުވަހެއް ވަރަށް އަވަހަށް އިއުލާން ކުރާނެ ކަމަށް އެންސްޕާގެ ސީއީއޯ ހީނާ ވަލީދު މިއަދު ވިދާޅުވެއްޖެ އެވެ.

ތައިލެންޑާއި ޔޫއޭއީ އަށް އާސަންދަ ފުޅާކުރުމަށް ރައީސް ޑރ. މުހައްމަދު މުއިއްޒު ނިންމަވައި، އެކަން އިއުލާން ކުރައްވާފައިވަނީ މިދިޔަ ޖެނުއަރީ މަހު އެވެ.

ރައްޔިތުންގެ މަޖިލީހުގެ އިޖުތިމާއީ ކޮމިޓީގައި މިއަދު އެކަމާ ގުޅޭ ގޮތުން މެމްބަރަކު ކުރެއްވި ސުވާލަކަށް ޖަވާބު ދެއްވަމުން ހީނާ ވިދާޅުވީ، ރައީސްގެ ވައުދާ އެއްގޮތަށް ޔޫއޭއީ އާއި ތައިލެންޑުން އާސަންދައިގެ ހިދުމަތް ފޯރުކޮށްދޭނެ ކަމަށެވެ.

"ޔޫއޭއީ އާއި ތައިލެންޑުން އާސަންދައިގެ ހިދުމަތް ފޯރުކޮށްދޭނަން. އިރާދަކުރެއްވިއްޔާ ރައީސުލްޖުމްހޫރިއްޔާ އެ ވައުދު ފުއްދަވާނެ،" ރައީސް އޮފީހުގެ ތަރުޖަމާންކަން ވެސް ކުރައްވާ ހީނާ ވިދާޅުވި އެވެ.

އޭނާ ވިދާޅުވީ އެކަމާ ގުޅޭ މަސައްކަތްތައް ކުރިއަށް ގެންދާ ކަމަށާއި އެ ދެ ގައުމުގެ ހޮސްޕިޓަލްތަކާ އެކު މަޝްވަރާކޮށް، ކުރިއަށް ދެވޭނެ ގޮތެއް ހޯދާފައިވާ ކަމަށެވެ. އެއާ ގުޅޭ އިތުރު ތަފުސީލާއި ތާރީހެއް ވަރަށް އަވަހަށް ހާމަކުރައްވާނެ ކަމަށް ހީނާ ވިދާޅުވި އެވެ.

ރައީސް މުއިއްޒު މި އަހަރުގެ ޖެނުއަރީ މަހު ވިދާޅުވެފައިވަނީ އާސަންދައަކީ "ހަމައެކަނި ވަކި ދިމާއެއްގައި" އޮންނަ ވަކި ގައުމެއްގައި ހުންނަ މެޑިކަލް ފެސިލިޓީތަކަށް އެކަނި ގޮސްގެން ލިބޭ ހިދުމަތަކަށް ވާން އެ މަނިކުފާނު ބޭނުންފުޅު ނުވާ ކަމަށެވެ. އެހެންވެ، ފެންވަރު ރަނގަޅު ގައުމުތަކަށް އާސަންދައިގެ ހިދުމަތް ފުޅާކުރައްވާނެ ކަމަށް ވިދާޅުވި އެވެ.

ރައީސްގެ ވާހަކަފުޅުގައި އޭރު ވިދާޅުވެފައިވަނީ ތައިލެންޑާއި ޔޫއޭއީގެ ވާހަކަ އެވެ.

"އެ ތަނަށް ދާއިރުގައި އެ ތަނުގެ އެކޮމޮޑޭޝަން އެކްސްޕެންސަސް އޭގައި ހިމެނޭ ގޮތަށް އިރާދަކުރެއްވިއްޔާ އަޅުގަނޑުމެންގެ އާސަންދަ ފުޅާކުރާނަން. އޭރުން އަޅުގަނޑުމެންގެ ދިވެހި ރައްޔިތުން، މި ގައުމުގެ ހެލްތު ފެސިލިޓީ ތަރައްގީ ވަންދެކަށް ދާނ،ީ މިހާރު އެދާ ތަންތަނަށް ވުރެ މާ ފެންވަރު ރަނގަޅު، ދުބާއީ ކަހަލަ އަދި ބެންކޮކްގައި ހުންނަ ކަހަލަ ފެންވަރު ރަނގަޅު ހޮސްޕިޓަލްތަކަށް، އެކޮމޮޑޭޝަން އެކްސްޕެންސަސް ލިބިގެން، އާސަންދަ އިން ކަވަރު ވެގެން،" ރައީސް މުއިއްޒު ޗައިނާ އަށް ކުރެއްވި ފުރަމާނަ ދަތުރުފުޅަށް ފަހު ރާއްޖެ ވަޑައިގެން ވެލާނާ އިންޓަނޭޝަނަލް އެއާޕޯޓުގައި ނޫސްވެރިންނާ ވާހަކަފުޅު ދައްކަވަމުން އެ މަނިކުފާނު ވިދާޅުވި އެވެ.