މާދަމާ އިން ފެށިގެން އާސަންދަ ލިބޭނީ ޕްރައިވެޓް އިންޝުއަރެންސުން ކަނޑާފައި!

އާސަންދަ ނިޒާމު ރިފޯމްކުރުމަށް ސަރުކާރުން ފަށާފައިވާ މަސައްކަތުގެ ދަށުން، މާދަމާއިން ފެށިގެން އާސަންދަ ލިބޭނީ ޕްރައިވެޓް އިންޝުއަރެންސް އޮތް ނަމަ، އެ އިންޝުއަރެންސްގެ ލިމިޓް ހަވަމުން ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބުނެފި އެވެ.

އެންސްޕާ އިން ނެރުނު ބަޔާނެއްގައި ބުނީ ދިވެހިންނަށް ރަނގަޅު ފެންވަރުގެ އަސާސީ ސިއްހީ ހިދުމަތް ފޯރުކޮށްދިނުމަށް ހިންގާ އިޖުތިމާއީ ސިއްހީ އިންޝުއަރެންސްގެ ގައުމީ ނިޒާމަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތެއް ފޯރުކޮށްދެވޭ ނިޒާމަކަށް ހެދުމަށް މަސައްކަތް ކުރަމުން އަންނަ ކަމަށެވެ.

އެ މަގުސަދު ހާސިލުކުރުމަށް ގެންނަ ބަދަލުގެ ދަށުން، ސިއްހީ ހިދުމަތްދޭ މަރުކަޒުތަކުން ހިދުމަތް ހޯދާ މީހުންގެ ތެރެއިން ޕްރައިވެޓް އިންޝުއަރެންސް އޮންނަ ފަރާތްތަކުން ހޯދާ ހިދުމަތްތަކަށް ބިލްކުރުމުގައި ޕްރައިވެޓް އިންޝުއަރެންސަށް އިސްކަންދިނުން ސަރުކާރުން ނިންމާފައިވާ ކަމަށް އެންސްޕާ އިން ބުންޏެވެ.

އެންސްޕާ އިން ބުނި ގޮތުގައި ޕްރައިވެޓް އިންޝުއަރެންސް ނަގާފައިވާ ނަމަ، އެ ފަރާތްތަކަށް ދެން އާސަންދަ ލިބޭނީ އެ މީހުންގެ ފެކޭޖުގެ ލިމިޓް ހަމަވުމުންނެވެ.

"މިކަން ކުރިއަށް ދަނީ ދިވެހި ރައްޔިތުންނަށް ލުއި ފަސޭހަ އަދި ދެފުށް ފެންނަ ފަދަ އުސޫލުތަކަކުން ކަށަވަރުކުރުމަށްޓަކައި މި ފިޔަވަޅު ތަންފީޒު ކުރުމަށް ހަމަޖެހިފައި ވަނީ އެކި ފިޔަވަޅުތަކަށް ބަހާލައިގެން އައުޓް ޕޭޝަންޓް އަދި އިން ޕޭޝަންޓްގެ ހިދުމަތްތައް ވަކިންނެވެ،" އެ ބަޔާނުގައިވެ އެވެ.

އެންސްޕާ އިން ބުނީ މާދަމާ އިން ފެށިގެން ސަރުކާރުގެ އަދި އަމިއްލަ ސިއްހީ ހިދުމަތްދޭ މަރުކަޒުތަކުން އައުޓް ޕޭޝަންޓްގެ ހިދުމަތްތައް ހޯދާ ފަރާތްތަކުގެ ތެރެއިން ޕްރައިވެޓް އިންޝުއަރެންސް އޮންނަ ފަރާތެއް ނަމަ، ޕްރައިވެޓް އިންޝުއަރެންސަށް ފުރަތަމަ ބިލް ކުރަން ނިންމާފައިވާ ކަމަށެވެ.

އެންސްޕާ އިން ވަނީ އާސަންދަ ސްކީމް މެދުވެރިކޮށް ހިދުމަތް ލިބިގަތުމަށް ފަހު، އެކަމުގެ ރަސީދު ހޯދުމަށް ވެސް އިލްތިމާސްކޮށްފަ އެވެ. އަދި ކަނޑައަޅާފައިވާ އުސޫލާ ހިލާފަށް ހިދުމަތްދޭ މަރުކަޒުތަކުން އަމަލުކުރާކަން ފާހަގަވެއްޖެ ނަމަ، އެކަން އާސަންދައިގެ ޗެޓްލައިން 7951400 އަށް ރިޕޯޓުކުރުމަށް ވަނީ އެދިފަ އެވެ.

އިތުރު އިންޝުއަރެންސް ސްކީމުތައް ބޭނުންކުރާ މީހުންނަށް އާސަންދަ ދިނުމުގައި ވަކި އުސޫލެއް އެކުލަވައިލާއިރު، އާސަންދަ ސްކީމުގެ ތެރެއިން ދައުލަތަށްވާ އިސްރާފުތައް ކުޑަ ކުރުމަށް އިސްލާހީ ގިނަ ފިޔަވަޅުތަކެއް އެޅުމަށް ސަރުކާރުން ދަނީ ތައްޔާރުވަމުންނެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން މި އަހަރުގެ ޖެނުއަރީ އިން ޖޫން މަހުގެ ނިޔަލަށް އާސަންދަ ސްކީމަށް ވަނީ 918 މިލިއަން ރުފިޔާ ހޭދަކޮށްފަ އެވެ. މިއީ އަހަރަށް ކަނޑައަޅާފައިވާ ބަޖެޓުގެ ގާތްގަނޑަކަށް 50 ޕަސެންޓެވެ. އާސަންދައަށް ހޭދަކުރަން 1.9 ބިލިއަން ރުފިޔާ ބަޖެޓުގައި ހިމަނާފައިވެ އެވެ.

އާސަންދަ ނިޒާމަށް ގެންނަ ބަދަލާ އެކު ސަރުކާރުން ވަނީ ރާއްޖޭގައި ދޫކުރާ 250 ބޭހެއްގެ އަގު އަންނަ މަހުން ފެށިގެން ކޮންޓްރޯލް ކުރަން ވެސް ނިންމައިފަ އެވެ.