މުއިއްޒު އެދިވަޑައިގަތީ މި ބުރުގައި ގިނަ މީހުން ވޯޓު ލާން ނުކުތުމަށް

ރިޔާސީ އިންތިހާބުގެ ފުރަތަމަ ބުރުގައި ވޯޓު ލާން ނުކުތް މީހުންނަށް ވުރެ ގިނަ މީހުން މިހާރު ކުރިއަށް ދާ ދެވަނަ ބުރުގެ ވޯޓު ލުމުގައި ބައިވެރިވުމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު އެދިވަޑައިގެންފި އެވެ.

މުއިއްޒު މިއަދު ހެނދުނު ތާޖުއްދީން ސްކޫލުގައި ހުރި ވޯޓު ފޮއްޓަށް ވޯޓު ލެއްވުމަށް ފަހު އެ ސަރަހައްދުގައި ތިބި ނޫސްވެރިންނާ ވާހަކަދައްކަވަމުން އިލްތިމާސްކުރެއްވީ ވީހާ ވެސް ގިނަ ބަޔަކު ވޯޓު ލާން ނުކުތުމަށެވެ.

"އަޅުގަނޑު ދަންނަވާލަން ބޭނުމީ ހުރިހާ ލޮބުވެތި ރައްޔިތުންނަށް ލިބިފައިވާ ގާނޫނީ ހައްގުގެ ބޭނުން ކުރައްވައި، ވޯޓު ލައްވަ ދެއްވާށޭ. ކުރީ ފަހަރަށް ވުރެ ގިނަ ބޭފުޅުން ވޯޓު ލައްވަން. އަޅުގަނޑު އެދެނީ ވީހާ ވެސް ގިނަ ލޮބުވެތި ރައްޔިތުން ވޯޓު ލާން،" މި މަހު 6 ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ކުރި ހޯއްދެވި މުއިއްޒު ވިދާޅުވި އެވެ.

"ވަގުތު ހަމަވަނީ ފަހެއް ޖަހާއިރު، އެހެން ނަމަވެސް ވީހާ ވެސް ހެނދުނަކާ ވަޑައިގެން ކޮންމެ ބޭފުޅަކަށް ވެސް ލިބިފައިވާ ގާނޫނީ ހައްގުގެ ބޭނުންކުރައްވައި ވޯޓު ލެއްވުމަށް އެދި ދަންނަވަން ބޭނުންވަނީ."

ފުރަތަމަ ބުރުގައި ވޯޓު ލާން ނުކުތް މީހުން ވަރަށް މަދެވެ. އެއީ ރާއްޖޭގެ ރިޔާސީ އިންތިހާބެއްގައި ވޯޓު ލާން ނުކުތް މީހުންގެ އަދަދު އެންމެ މަދުވި ފަހަރު ވެސް މެ އެވެ. އެ ބުރުގައި ވޯޓު ލީ، ވޯޓު ލުމުގެ ހައްގު ލިބިފައިވާ 80 ޕަސެންޓް މީހުންނެވެ.

އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހާ އިތުރު 7 ކެންޑިޑޭޓުންނާ ވާދަކުރައްވައި، ފުރަތަމަ ބުރުގައި މުއިއްޒަށް ވަނީ 46 ޕަސެންޓް ވޯޓު ލިބިވަޑައިގެންފަ އެވެ. ރައީސް އަށް ލިބިވަޑައިގަތީ 39 ޕަސެންޓެވެ.