މުއިއްޒުގެ ކެމްޕެއިންގެ ފަހު ބަސް: އަނިޔާވެރިކަން ތާ އަބަދަށް ނިންމާނަން، ބޭރު ސިފައިން ނުތިބޭނެ

މާދަމާ ބާއްވާ ރިޔާސީ އިންތިހާބުގެ ދެ ވަނަ ބުރުގައި އޭނާ ރާއްޖޭގެ ވެރިކަމަށް އިންތިހާބު ކޮށްފި ނަމަ، ގައުމުން އަނިޔާވެރިކަން ތާއަބަދަށް ނައްތާލައި، ބޭރުގެ ސިފައިން ފޮނުވާލައި، ހަގީގީ މިނިވަންކަން ގެނެސްދެއްވާނެ ކަމުގެ ޔަގީންކަން އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިއަދު ދެއްވައިފި އެވެ.

ކެމްޕެއިނު ނިންމާލުމަށް މާލޭގައި ބޭއްވި ހިނގާލުމަށް ފަހު، އެތައް ހާސް ބަޔަކާ އެކު އާޓިފިޝަލް ބީޗުގައި ހުންނަވައި މުއިއްޒު ވިދާޅުވީ، މާދަމާއަކީ ހަގީގަތުގައި ވެސް ރާއްޖޭގެ މުސްތަގްބަލާ މެދު ގޮތެއް ނިންމާ ދުވަސް ކަމަށެވެ.

މިއަދު ގައުމުގެ މިނިވަންކަން އައިސްފައި އޮތީ ވަކި ޕާޓީއެއްގައި ހުރެގެން ހިޔާލުތަފާތުވާ ވަރަށް ވުރެ ކަންބޮޑުވާ ހިސާބެއްގައި ކަމަށް މުއިއްޒު ވިދާޅުވި އެވެ.

"ދިވެހި ރައްޔިތުން އަޅުގަނޑާ މި ޒިންމާ ހަވާލުކުރައްވަފިއްޔާ ގާއިމު ކުރާނީ މި ގައުމުން އަނިޔާވެެރިކަން ތާއަބަދަށް ނިމުމަކަށް ގެންނަ ސަރުކާރެއް. އިންސާފުވެރިކަން އެއީ ދައްކާލާ ވާހަކައަށް ވުރެ ބޮޑަށް ދައުލަތް ހިންގުމުގެ ތެރެއިން އިހުސާސްވާ ހަގީގަތަކަށް ހަދައިދޭނަން. ކަންކަން ކުރަނީ އަދުލުވެރިކަމުން ކަމަށް ދަންނަވަން ކެރޭ ސަރުކާރަކަށް ހަދައިދޭނަން،" މުއިއްޒު ވިދާޅުވި އެވެ.

އޭނާ ވިދާޅުވީ، ވެރިކަމަށް ކުރިމަތިލެއްވީ އަދުލުވެރި، އިންސާފުވެރި ވެރިކަމެއް ކުރައްވަން ކަމަށެވެ. އެ މީހަކު ހުރީ ކޮންމެ ޕާޓީއެއްގައި ކަމަށް ވިޔަސް ބޭނުންވަނީ މި ގައުމަށް ހަމަޖެހުން ގެންނަން ކަމަށް މުއިއްޒު ވިދާޅުވި އެވެ.

މުއިއްޒު ވިދާޅުވީ، އަދުލުވެރިކަމަކީ އަބަދު ދައްކާ ވާހަކައަކަށް ނުވަތަ ފޮތެއްގައި ލިޔާ ވާހަކައަކަށް ވުރެ ކޮންމެ މީހަކާ މެދު ވެސް އަމަލު ކުރަނީ އަދުލުވެރިކަމާ އެކު ކަމަށް ބުނަން ކެރޭ ސަރުކާރެއް ގާއިމް ކުރައްވާނެ ކަމަށެވެ.

އޭނާ ވިދާޅުވީ، މި ގައުމުގައި މިހާރު އަމިއްލަ މިނިވަންކަން ނެތި، ތާ އަބަދަށް ބަނަވާ ހިސާބަށް ގޮސްފައިވާ ކަމަށެވެ. އެހެންވެ، މުއިއްޒު ވިދާޅުވި ގޮތުގައި އޭނާގެ އެންމެ އިސް އެއް ޒިންމާއަކަށް ވާނީ ދިވެހިންނަށް ފަހިވާ ހާރިޖީ ސިޔާސަތެއް ހޯދައި ދިނުން ކަމަށެވެ.

"ދިވެހިންގެ މިނިވަންކަން ދިވެހިންނަށް ފަހިވާ ގޮތަށް ބައްޓަންކޮށް އިރާދަކުރެއްވިއްޔާ ތިބޭނީ ދިވެހި ސިފައިން. ބޭރުގެ ސިފައިން އިރާދަކުރެއްވިއްޔާ ނުތިބޭނެ. އެކަން އިރާދަކުރެއްވިއްޔާ ނިމުމަކަށް ގެނެސްދޭނަން،" މުއިއްޒު ވިދާޅުވި އެވެ.

އޭނާ ވިދާޅުވި ގޮތުގައި އިސްކުރައްވާނީ ދިވެހިންގެ މަސްލަހަތެވެ.

މުއިއްޒު ވިދާޅުވީ، ރާއްޖޭގެ އިގްތިސާދު މިހާރު ވައްޓާލާފައިވާ އަނދަވަޅުން ނަގައިދީ، އޭނާގެ ސަރުކާރެއްގައި ކޮޅަށް ޖަހައިދޭނެ ކަމަށެވެ. ކޮންމެ ދިވެއްސަކީ ފުދުންތެރި މީހަކަށް ވެސް ހަދައި ދޭނެ ކަމަށް ވިދާޅުވި އެވެ. ޒުވާނުންނަކީ އަމިއްލަ ފައިމައްޗަށް ތެދުވެފައިވާ އަދި ކޮންމެ އަންހެނަކީ ބާރުވެރި މީހަކަށް ހަދައިދޭނެ ކަމަށް ވިދާޅުވި އެވެ.

މުއިއްޒު ދެން ދެއްވި ޔަގީން ކަމަކީ އޭނާގެ ވެރިކަމެއްގެ ފަސް އަހަރު ނިމޭއިރު ގެދޮރުވެރިކަމުގެ މައްސަލަ ހައްލު ކޮށްދޭނެ ކަމެވެ. ވިދާޅުވީ، އެ ފަސް އަހަރު ނިމޭއިރު، ގެދޮރުވެރިކަމުގެ ހައްގު ގެއްލިފައިވާ ކަމަށް ބުނާ އެއްވެސް ދިވެއްސަކު ނުހުންނާނެ ކަމަށެވެ.

މުއިއްޒު ވިދާޅުވީ، ގެދޮރުވެރިކަމުގެ މައްސަލައާ އެކު ދިވެހިންގެ ތެރޭގައި ހުރި ގިނަ ކަންކަން ހައްލުވާނެ ކަމަށެވެ.

"ކޮންމެ ރައްޔިތަކީ އަމިއްލަ ފައިމައްޗަށް ތެދުވެފައިވާ، އިގްތިސާދީ ގޮތުން ބާރު ކުރެވިފައިވާ ކޮންމެ ރައްޔިތަކީ އަމިއްލަ އަށް ދިރިއުޅުން ބައްޓަން ކުރެވޭ ފަދަ މީހަކަށް ހެދުނީމާ އިރާދަކުރެއްވިއްޔާ ފެނިގެންދާނީ ހިނިތުންވުން،" އޭނާ ވިދާޅުވި އެވެ.