މުއިއްޒު މާ ކުރީގައި، 450 ފޮށިން 12،000 ވޯޓު ތަފާތު

މި އަހަރުގެ ރިޔާސީ އިންތިހާބުގެ ދެ ވަނަ ބުރުގެ ވޯޓު ލުމަށް މާލެ އާއި އެކި ރަށްރަށުގައި ކިއު ހަދަން ފަށައިފި އެވެ.

އިލެކްޝަންސް ކޮމިޝަނުން ހަމަޖައްސާފައިވާ ގޮތުން ވޯޓު ލުން ފަށާނީ ހެނދުނު އަށެއް ޖަހާއިރު އެވެ. ވޯޓު ލުމުގެ އެންމެ ފަހު ގަޑިއަކީ ހަވީރު ފަހެކެވެ. އޭގެ ފަހުން ގަޑި އިތުރު ނުކުރާނެ ކަމަށް އެ ކޮމިޝަނުން ބުންޏެވެ.

"ވީހާ ވެސް އަވަހަކަށް ވޯޓު ލުމުގެ ހައްގު އަދާކުރައްވާ،" އީސީގެ ނައިބު ރައީސް އިސްމާއިލް ހަބީބް ވިދާޅުވި އެވެ.

އިލެކްޝަންސް ކޮމިޝަނުން ބުނީ ދެ ވަނަ ބުރުގައި 586 ވޯޓުފޮށި ބަހައްޓާނެ ކަމަށެވެ. ވޯޓު ލުމުގެ ހައްގު 282،804 މީހަކަށް ލިބެ އެވެ. އެއީ، 138،394 އަންހެނުންނާއި 144،410 ފިރިހެނުންނެވެ. މި ފަހަރު ލިސްޓަށް ވަނީ ފުރަތަމަ ބުރުގެ އަދަދަށް ވުރެ 408 މީހުން އިތުރު ވެފަ އެވެ.

ރާއްޖެ އިން ބޭރުގައި މި ފަހަރު ވޯޓުފޮށި ބަހައްޓަނީ ފަސް ގައުމެއްގަ އެވެ. އެއީ އިންޑިއާ އާއި ސްރީ ލަންކާ އާއި މެލޭޝިއާ އާއި ޔޫއޭއީ އަދި އިނގިރޭސި ވިލާތުގަ އެވެ.

ރިޔާސީ އިންތިހާބުގެ ދެ ވަނަ ބުރުގައި ވޯޓު ލާ މީހުން ވޯޓު ލީ ކަމުގެ ނިޝާން ވައަތުގެ މެދު އިނގިލީގައި ޖަހަން އިލެކްޝަންސް ކޮމިޝަނުން ކުރިން ނިންމި ނަމަވެސް ފަހުން ވަނީ އެ ނިންމުން ބަދަލުކޮށް، ވައަތުގެ ކަށި އިނގިލީގައި އެ ފާހަގަ ޖަހާ ގޮތަށް ކަނޑައަޅައިފަ އެވެ.

އިންތިހާބުގެ ފުރަތަމަ ބުރުގައި ފާހަގަ ޖެހީ ވައަތުގެ ޝަހާދަތް އިނގިލީގަ އެވެ. ވޯޓު ކަރުދާސްކޮޅު އަތަށް ދިނުމުގެ ކުރިން އެ ފާހަގަ ޖަހާނީ ގިނަ ދުވަހަށް ދެލި ނުފިލާ ހުންނަ މާކަރަކުންނެވެ.

މި އަހަރުގެ ރިޔާސީ އިންތިހާބުގެ ދެ ވަނަ ބުރުގައި 15،000 އަށް ވުރެ ގިނަ ވޯޓުގެ ތަފާތުން އެއްވަނަ ކެންޑިޑޭޭޓުގެ ގޮތުގައި ދެ ވަނަ ބުރަށް ދަތުރު ކުރެއްވީ ޕީޕީއެމް/ޕީއެންސީގެ ޑރ. މުހައްމަދު މުއިއްޒެވެ. އޭނާ އަށް ލިބިވަޑައިގަތީ 101،635 ވޯޓެވެ. އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ.