ދެ ދިއްގަރު ވަރުގެ ބިމެއް އިތުރުކޮށްދީފި, ތަރައްގީކުރެވޭނީ ރައީސަށް: އިކްރާމް

މ. ދިއްގަރުގައި ދިމާވެފައިވާ ބިމުގެ ދަތިކަން ހައްލުކުރުމުގެ މަޝްރޫއު ނިމުނުއިރު ދެ ދިއްގަރު ވަރުގެ ބޮޑު ބިމެއް ހިއްކައިދީފައިވާ ކަމަށާއި ރާއްޖެ ތަރައްގީ ކުރެވޭނީ ރައީސް އިބްރާހިމް މުހައްމަދު ސޯލިހަށް ކަމަށް އެ ދާއިރާގެ މެމްބަރު އިކްރާމް ހަސަން މިރޭ ވިދާޅުވެއްޖެ އެވެ.

އާބާދީގައި 965 މީހުން ހިމެނޭ ދިއްގަރުގެ ބިމުގެ ބޮޑުމިނަކީ 9.9 ހެކްޓަރެވެ. ބިމުގެ ދަތިކަން ހައްލުކުރަން ރައްޔިތުން އެދުމުން މި ސަރުކާރުން ވަނީ އެ ރަށުގެ ބިމުގެ ސައިޒަށް ވުރެން ދެގުނަ އިތުރަށް 25 ހެކްޓަރުގެ ބިން ހިއްކައިދީފަ އެވެ.

ދިއްގަރަށް އައި ކުރިއެރުމާ ގުޅޭ ގޮތުން އެކްސްގައި ފޮޓޯއެއް ހިއްސާކުރައްވައި އިކްރާމް ވިދާޅުވީ މުޅި ރާއްޖެ ތަރައްގީކޮށް މައްސަލަތަކަށް ހައްލު ހޯއްދަވައިދެއްވާނީ ރައީސް އިބްރާހިމް މުހައްމަދު ސޯލިހް ކަމަށެވެ. ދިއްގަރުގައި ވެސް މިހާރު ބިމުގެ ދަތިކަން ހައްލުކޮށްދީފައިވާ ކަން އޭނާ ފާހަގަކުރެއްވި އެވެ.

އޭނާ ވިދާޅުވި ގޮތުގައި ދިއްގަރު ރައްޔިތުންނަށް ދިމާވެފައި އޮތް އެންމެ ބޮޑު ދެ މައްސަލަ އަކީ ރަށުގެ އިރުމަތި ފަރާތުން އުދައަރައި ރަށް ގިރަމުން ދިއުމާއި ރަށުގެ ބިމުގެ ދަތިކަމެވެ.

"ދެ ދިއްގަރު ވަރުގެ ބައެއް އިތުރުކޮށް ބިމުގެ ޖާގައިގެ ދަތިކަން ރައީސް ސޯލިހްގެ މި ދައުރުގެ ތެރޭގައި މިވަނީ މި ތަކުލީފުތަކަށް ނިމުން ގެންނަވާފައި. ހެޔޮ ހިތަކުން ރައީސް ސޯލިހަށް ޝުކުރިއްޔާ," އިކްރާމް ވިދާޅުވި އެވެ.

ދިއްގަރުގައި 14 މަޝްރޫއެއް ހިންގަން މި ސަރުކާރުން ބަޖެޓްކޮށްފައި އޮތް އިރު ބިން ހިއްކައި ނިންމަން އަމާޒުކޮށްފައި އޮތީ މިދިޔަ އޮގަސްޓް މަހުގެ ނިޔަލަށެވެ.

ބިން ހިއްކުމުގެ އިތުރުން ދިއްގަރުގެ އުދަ އެރުމުގެ މައްސަލަ ވެސް ވަނީ ހައްލުކޮށްދީފަ އެވެ.

ދިއްގަރުގެ ގޮނޑުދޮށް ހިމާޔަތް ކުރުމުގެ މަޝްރޫއުގައި 700 މީޓަރުގެ ސަރަހައްދަކަށް ވެލި ލައި ހިލަތޮށި ވަނީ ލައިފަ އެވެ.