ބ. އަތޮޅަށް ދިޔަ ދޯންޏެއް އަޑިއަށް، މީހުން ސަލާމަތްކޮށްފި

މާލެ އިން ފުރައިގެން ބ. އަތޮޅަށް ދަތުރުކުރި ދޯންޏެއް މިއަދު އަޑިއަށް ހިނގައްޖެ އެވެ.

ފުލުހުން ބުނީ އެ ދޯނި ދަރަވަންދުއާ ދިމާލުން ބޭރަށް އަޑިއަށްދާ ކަމުގެ މައުލޫމާތު ފުލުހުންނަށް ލިބުނީ މިއަދު ހެނދުނު 10:40 ހާއިރު ކަމަށެވެ.

އެ ދޯނީގައި އޭރު ތިބީ ދިވެއްސަކާއި 12 ބިދޭސީން ކަމަށާއި އެ އެންމެން ވެސް ފުލުހުންގެ ލޯންޗަށް ނަގާފައިވާ ކަމަށް ފުލުހުން ބުންޏެވެ. އެ އެންމެންގެ ހާލު ވެސް ރަނގަޅު ކަމަށް ފުލުހުން ބުންޏެވެ.

ރާއްޖެ އަށް މި ދެތިން ދުވަހު ދުވަހު މޫސުން ވަނީ ވަރަށް ބޮޑަށް ގޯސްވެފަ އެވެ. ހާއްސަކޮށް މެދުރާއްޖެތެރެ އާއި ދެކުނުގެ އަތޮޅުތަކަށް ވައި އަދި ކަނޑު ގަދަ އެވެ. އެހެންވެ، ކަނޑު ދަތުރުފަތުރު ކުރުމުގައި ރައްކާތެރިވުމަށް ކަމާބެހޭ ފަރާތްތަކުން ވަނީ އިލްތިމާސް ކޮށްފަ އެވެ.

މޫސުމާ ބެހޭ ގައުމީ އިދާރާ އިން ވަނީ ކ. އާއި ތ. އަތޮޅާ ދެމެދަށް ވައިޓް އެލާޓް ނެރެފަ އެވެ.