ވަގުތު ހަމަވި އިރު، އެންމެ ގިނަ ކެންޑިޑޭޓުން މި ފަހަރު!

އަންނަ މަހު ބާއްވާ ރިޔާސީ އިންތިހާބުގައި ވާދަކުރުމަށް ހުޅުވާލި ފުރުސަތުގެ ވަގުތު މިއަދު ދޭއް ޖެހިއިރު ހަމަވިއިރު އަށް ކެންޑިޑޭޓަކު ކުރިމަތިލައްވައިފި އެވެ.

މިއީ ރިޔާސީ އިންތިހާބެއްގައި އެންމެ ގިނަ ކެންޑިޑޭޓުން ވާދަ ކުރައްވާ ފަހަރެވެ. ދެވަނަ އަށް އެންމެ ގިނަ ކެންޑިޑޭޓުން ވާދަ ކުރެއްވީ 2008 ވަނަ އަހަރު އެވެ. އެފަހަރު ހަ ބޭފުޅަކު ރިޔާސީ އިންތިހާބުގައި ވާދަކުރެއްވި އެވެ.

ރިޔާސީ އިންތިހާބަށް ވާދަކުރަން ފޯމް ހުށަހެޅި ޕާޓީތަކަކީ އެމްޑީޕީ އާއި ޖުމްހޫރީ ޕާޓީ އާއި ޑިމޮކްރެޓްސް އާއި ޕީއެންސީ އަދި އެމްއެންޕީ އެވެ. އަމިއްލަ ގޮތުން ވާދަ ކުރައްވަން ފޯމް ހުށަހެޅުއްވީ ކުރީގެ ހޯމް މިނިސްޓަރު އުމަރު ނަސީރާއި އެމްއާރުއެމްގެ ރައީސް އަހުމަދު ފާރިސް މައުމޫން އާއި ޑިފެންސް މިނިސްޓްރީގެ ނައިބަކަށް ކުރިން ހުންނެވި ހަސަން ޒަމީލެވެ.

އެމްޑީޕީގެ ފަރާތުން ވާދަކުރައްވަނީ ރައީސް އިބްރާހިމް މުހައްމަދު ސޯލިހެވެ. އެމަނިކުފާނުގެ ރަނިންމޭޓަކީ އެމްޑީޕީގެ ޕާލަމަންޓްރީ ގްރޫޕްގެ ލީޑަރު މުހައްމަދު އަސްލަމް އެވެ.

ޕީޕީއެމްއިން މިފަހަރު ވެސް އިންތިހާބުގައި ވާދަކުރަން ނިންމައި، ކުރީގެ ރައީސް އަބްދުﷲ ޔާމީން ހުށަހެޅުއްވި ފޯމް އިލެކްޝަންސް އިން ބާތިލްކުރި އެވެ. ސަބަބަކީ އެމަނިކުފާނު ޖަލު ހުކުމެއްގައި ހުންނެވުމެވެ.

ޕީޕީއެމުން ކެންޑިޑޭޓަކު ނުނެރެ، އެ ޕާޓީ ވާގިވެރިވާ ޕީއެންސީގެ ރިޔާސީ ކެންޑިޑޭޓަކަށް ޑރ. މުހައްމަދު މުއިއްޒު ހަމަޖައްސައި އޭނާ ވަނީ ފޯމު ހުށަހަޅުއްވައިފަ އެވެ. އޭނާގެ ރަނިންމޭޓަކީ ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް އެވެ.

ޖުމްހޫރީ ޕާޓީން ވާދަކުރައްވަނީ އެ ޕާޓީގެ ލީޑަރު ގާސިމް އިބްރާހިމާއި ރަނިންމޭޓް އަމީން އިބްރާހިމެވެ. އެމްއެންޕީން ދަނގެތި ދާއިރާގެ މެމްބަރު މުހައްމަދު ނާޒިމާއި ރަނިންމޭޓް ޑރ. އަހްމަދު އަދީލް ނަސީރު އެވެ.

ޑިމޮކްރެޓްސްގެ ފަރާތުން އިލްޔާސް ލަބީބު އަށް ރިޔާސީ ޓިކެޓް ދީފައި ވާއިރު ރަނިންމޭޓަކަށް ހަމަޖައްސާފައި ވަނީ އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރެވެ.

އަމިއްލަގޮތުން ވާދަ ކުރައްވާ ފާރިސްގެ ރަނިންމޭޓަކަށް ޑރ. އަބްދުއްސައްތާރު ޔޫސުފް ހަމަޖައްސަވާފައި ވާއިރު އުމަރު ނަސީރުގެ ރަނިންމޭޓަކަށް ހަމަޖައްސަވާފައި ވަނީ ހޯމް މިނިސްޓްރީގެ ކުރީގެ ޑެޕިއުޓީ މިނިސްޓަރު އަހުމަދު ސަލީމް (މާޒް ސަލީމް) އެވެ.

މި އަހަރުގެ އިންތިހާބަށް ރާއްޖޭގައި ފުރަތަމަ ފަހަރަށް ދެމަފިރިއަކު ރައީސް ކަމާއި ނައިބު ރައީސް ކަމަށް ކުރިމަތިލެއްވި އެވެ. އެއީ އަމިއްލަ ގޮތުން ވާދަ ކުރެއްވުމަށް ފޯމު ހުށަހެޅުއްވި ޑިފެންސް މިނިސްޓަރުގެ ނައިބުގެ މަގާމުން ދާދިފަހުން އިސްތިއުފާ ދެއްވި މއ. މާވެޔޮވިލާ ހަސަން ޒަމީލާއި ރަނިންމޭޓު އަނބިކަނބަލުން މަރިޔަމް އަލީމް އެވެ.

ރިޔާސީ އިންތިހާބު ބާއްވަން ނިންމާފައި ވަނީ އަންނަ މަހުގެ ނުވަ ވަނަ ދުވަހު އެވެ. ދެވަނަ ބުރެއް ބާއްވަން ޖެހިއްޖެ ނަމަ އިންތިހާބު ބޭއްވުމަށް އިލެކްޝަނުން ނިންމާފައި ވަނީ ސެޕްޓެމްބަރު 30ގަ އެވެ.

އެންމެ ފަހުން 2018ގައި ބޭއްވި ރިޔާސީ އިންތިހާބުގައި ވާދަ ކުރެއްވީ ކުރީގެ ރައީސް އަބްދުﷲ ޔާމީނާއި މިހާރުގެ ރައީސް އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހެވެ. އެ އިންތިހާބު އެމްޑީޕީން ކާމިޔާބު ކުރީ 58 ޕަސެންޓުގެ ވޯޓާ އެކު އެވެ. ޕީޕީއެމް އަށް އެފަހަރު ލިބުނީ 41 ޕަސެންޓުގެ ވޯޓެވެ.