ޑިޖިޓަލް އައިޑީ ޓެސްޓު ކުރުމުގެ ފުރުސަތު އެންމެންނަށް ހުޅުވާލައިފި

އީފާސް އެޕް މެދުވެރިކޮށް ޑިޖިޓަލް އައިޑީކާޑު ޓެސްޓުކުރުމުގެ ފުރުސަތު އާންމުންނަށް މިއަދު ހުޅުވާލައިފި އެވެ.

ޑިޖިޓަލް އައިޑީ ކާޑު ތައާރަފުކުރުމުގެ ކުރިން އެ ހިދުމަތް ތަޖުރިބާކުރުމުގެ ފުރުސަތު އެންމެ ފުރަތަމަ ހުޅުވާލީ މިދިޔަ ފެބްރުއަރީ މަހު، އެންޑްރޮއިޑް ޑިވައިސްތައް ގެންގުޅޭ 500 މީހަކަށެވެ. އޭރު އެ ހިދުމަތް އަދި އާންމުކޮށް ދުލެއް ނުކުރެ އެވެ.

ސަރުކާރުގެ ޑިޖިޓަލް ހިދުމަތްތަކަށް ބޭނުންކުރާ އީފާސްގެ ޓުވީޓެއްގައި ބުނީ މިއަދު އައިއޯއެސް ވެސް ހިމެނޭ ގޮތަށް މި ހިދުމަތް އާންމުކޮށް ހުޅުވާލާފައިވާ ކަމަށެވެ.

އެ ހިދުމަތް ތައާރަފުކުރުމުން ކޮންމެހެން އަތުގައި ފިޒިކަލް އައިޑީކާޑެއް އޮތުން މަޖުބޫރެއް ނުވާނެ އެވެ. ޑިޖިޓަލް އައިޑީކާޑު ބޭނުންކޮށްގެން ހުރިހާ ހިދުމަތެއް ހޯދޭނެ އެވެ. ޑިޖިޓަލް އައިޑީކާޑު ބޭނުންކުރަން ފެށިޔަސް، ބޭނުން ނަމަ ކާޑު ޕްރިންޓް ވެސް ކުރެވޭ ގޮތަށް ހަދަން ސަރުކާރުން އޮތީ ޕްލޭންކޮށްފަ އެވެ.

ޑިޖިޓަލް އައިޑީ ކާޑުގެ އިތުރުން އެ މީހެއްގެ މުހިންމު އެހެން މައުލޫމާތުތައް ވެސް އީފާސްގެ ތެރެއިން ފެންނަ ގޮތަށް ހެދުމަށް ޓެކްނޮލޮޖީ މިނިސްޓްރީން އަންނަނީ މަސައްކަތް ކުރަމުންނެވެ. އޭގެ ތެރޭގައި މުހިންމު ބައެއް ސެޓްފިކެޓްތައް ވެސް ހިމެނެ އެވެ.

މިދިޔަ ހޮނިހިރު ދުވަހު ޓްރާންސްޕޯޓް މިނިސްޓްރީން ވެސް ވަނީ ރާއްޖޭގެ އެތެރޭގެ އުދުހުންތަކުގައި ޑިޖިޓަލް އައިޑީ ކާޑު ބޭނުންކުރެވޭ ގޮތް ހަދައިފަ އެވެ.