ޑިޖިޓަލް އައިޑީ ކާޑް ޓެސްޓުކުރުމުގެ ފުރުސަތު އާންމުންނަށް ހުޅުވާލައިފި

އީފާސް އެޕް މެދުވެރިކޮށް ޑިޖިޓަލް އައިޑީކާޑު ޓެސްޓުކުރުމުގެ ފުރުސަތު އާންމުންނަށް މިއަދު ހުޅުވާލައިފި އެވެ.

ސަރުކާރުގެ ޑިޖިޓަލް ހިދުމަތްތަކަށް ބޭނުންކުރާ އީފާސްގެ ޓުވީޓެއްގައި ބުނީ އެންޑްރޮއިޑް ޑިވައިސްތައް ގެންގުޅޭ 500 މީހަކަށް އެ ފުރުސަތު ދޭން އެންސީއައިޓީން ނިންމާފައިވާ ކަމަށެވެ. އެ ފުރުސަތު ދޭނީ އެންމެ ފުރަތަމަ އެކަމަށް އެދޭ މީހުންގެ ތަރުތީބުން ކަމަށް ޓުވީޓްގައި ބުންޏެވެ.

އެންސީއައިޓީން އެ ފުރުސަތު ހުޅުވާލީ އެއްފަހަރާ ގިނަ ބަޔަކު މި ހިދުމަތް ބޭނުންކުރަން ފެށުމުން އަންނާނެ ބަދަލުތައް ދެނެގަނެ، ރަނގަޅުކުރަން ޖެހޭ ކަންތައްތައް ބެލުމަށެވެ. މިހާރު ވެސް 180 މީހަކަށް ޑިޖިޓަލް އައިޑީ ތަޖުރިބާކުރުމުގެ ފުރުސަތު ވަނީ ދީފަ އެވެ.

މިދިޔަ އަހަރު ޑިސެމްބަރުގައި ހުޅުމާލޭގައި ބޭއްވި ފެއާއެއްގައި ވެސް ޑިޖިޓަލް އައިޑީކާޑު ތަޖުރިބާކޮށްމުގެ ފުރުސަތު އާންމުންނަށް ދިނެވެ.

އެ ހިދުމަތް ތައާރަފުކުރުމުން ކޮންމެހެން އަތުގައި ފިޒިކަލް އައިޑީކާޑެއް އޮތުން މަޖުބޫރެއް ނުވާނެ އެވެ. ޑިޖިޓަލް އައިޑީކާޑު ބޭނުންކޮށްގެން ހުރިހާ ހިދުމަތެއް ހޯދޭނެ އެވެ. ޑިޖިޓަލް އައިޑީކާޑު ބޭނުންކުރަން ފެށިޔަސް، ބޭނުންނަމަ ކާޑު ޕްރިންޓް ވެސް ކުރެވޭ ގޮތަށް ހަދަން ސަރުކާރުން އޮތީ ޕްލޭންކޮށްފަ އެވެ.

ޑިޖިޓަލް އައިޑީ ކާޑުގެ އިތުރުން އެ މީހެއްގެ މުހިންމު އެހެން މައުލޫމާތުތައް ވެސް އީފާސްގެ ތެރެއިން ފެންނަ ގޮތަށް ހެދުމަށް ޓެކްނޮލޮޖީ މިނިސްޓްރީން އަންނަނީ މަސައްކަތް ކުރަމުންނެވެ. އޭގެ ތެރޭގައި މުހިންމު ބައެއް ސެޓްފިކެޓްތައް ވެސް ހިމެނެ އެވެ.

މި މަހު ޓްރާންސްޕޯޓް މިނިސްޓްރީން ވެސް ވަނީ ފިޒިކަލް ލައިސަންސް ކާޑު ހެދުން ހުއްޓާލައި، ޑިޖިޓަލް ކާޑު ތައާރަފުކޮށްފަ އެވެ. އީފާސް އަދި ޕޮލިސް އެޕް މެދުވެރިކޮށް ޑިޖިޓަލް ލައިސަންސް ކާޑު ބަލައިލެވެ އެވެ.