ހައްޖު ކޯޓާގެ ބާކީ 130 ޖާގައިގެން ތެރެއިން ހައްޖު ކޯޕަރޭޝަނަށް އިތުރު ޖާގަ ދެނީ

މި އަހަރު ރާއްޖެ އިން މީހުން ހައްޖަށް ގެންދަން ސައޫދީ އަރަބިއްޔާ އިން ދިން 1،000 ކޯޓާގެ ތެރެއިން މިހާތަނަށް ގޮތެއް ކަނޑަނާޅާ 130 ކޯޓާގެ އިތުރު ޖާގަތައް ހައްޖު ކޯޕަރޭޝަނަށް ދޭނެ ކަމަށް އިސްލާމިކް މިނިސްޓްރީން މިއަދު ބުނެފި އެވެ.

ސައުދީ ސަރުކާރުން ރާއްޖެ އަށް މި ފަހަރު ދިން 1،000 ކޯޓާގެ ތެރެއިން 870 ކޯޓާ، ހައްޖު ކޯޕަރޭޝަނާއި އަމިއްލަ ތިން ގުރޫޕްގެ މެދުގައި އިސްލާމިކް މިނިސްޓްރީން ވަނީ މީގެ ކުރިން ބަހާލައިފަ އެވެ.

އޭރު އެ ކޯޕަރޭޝަނަށް ދިނީ 600 ޖާގަ އެވެ. މި މި އަހަރު އަގުހެޔޮކޮށް ހައްޖަށް މީހުން ގެންދަން ސަރުކާރުން ހުއްދަ ދިން ތިން ކުންފުންޏަށް 270 ޖާގަ ބަހާލި އެވެ. އެއީ ކޮންމެ ކުންފުންޏަކަށް 90 ޖާގަ އެވެ.

އިސްލާމިކް މިނިސްޓްރީގެ ސީނިއާ އެގްޒެކެޓިވް ޑައިރެކްޓަ ފޯ ކޮމިއުނިކޭޝަން، މުރުޝިދު އަބްދުލްހަކީމް މިއަދު ވިދާޅުވީ، ހައްޖު ކޯޕަރޭޝަންގެ ހަވާލުގައި ހައްޖަށް ފޮނުވުމަށް އެ ކުންފުންޏަށް އިތުރު ޖާގަ ދިނުމަށް ހަމަޖެހިފައިވާ ކަމަށެވެ.

އޭނާ ވިދާޅުވި ގޮތުގައި އެއީ ކޮންމެ އަހަރަކު ވެސް އަމަލު ކުރަމުން އަންނަ އުސޫލެވެ.

"ސަރުކާރުން ހަމަޖައްސާ ފުރުސަތުތަކުގައި ހައްޖަށް ފޮނުވާ މީހުން ވެސް ދާނީ ހައްޖު ކޯޕަރޭޝަންގެ ހަވާލުގައި. އެ ގޮތަށް ވެސް އެ ކުންފުންޏަށް އިތުރު ކޯޓާތައް ލިބޭނެ،" އޭނާ ވިދާޅުވި އެވެ.

އެކަމަކު އެ ކުންފުންޏަށް ދެނީ ކިހާ ޖާގައެއް ކަމެއް މުރުޝިދު ވިދާޅެއް ނުވެ އެވެ.

ހެޔޮ އަގުގައި ހައްޖަށް ގެންދިއުމަށް ބީލަން ހުށަހަޅައިގެން ސަރުކާރުން ހުއްދަ ދިން ތިން ކުންފުންޏަކީ އަލް މަނާސިކް އާއި ސިސިލްފަރު އަދި އަލް ހަރަމައިން އެވެ.

ބީލަން ކާމިޔާބުކުރަން ކުންފުނިތަކުން ހުށަހެޅި އަގު:

- އަލް ހަރަމައިން 75،250ރ

- ސިސިލްފަރު 75،465ރ.

- އަލްމަނާސިކް 75،000ރ.

އެކަމަކު އެ ތިން ގުރޫޕުން ވެސް އެއްބަސްވި އަގަށް ވުރެ ގިނައިން މީހުން އަތުން ފައިސާ ނަގަމުންދާ މައްސަލަ ވަނީ ފެންމަތި ވެފަ އެވެ. ކޮންމެ މީހެއްގެ ބޮލަކަށް 123،360ރ އެ ގުރޫޕްތަކުން ކިޔާ ކަމަށް "މިހާރު" އާ ވާހަކަ ދެއްކި ބައެއް އާންމުން ބުނެފައި ވެ އެވެ. ބައެއް މީހުންގެ އަތުން އެ އަށް ވުރެ ބޮޑު އަގެއް ވެސް ނަގާ ކަމަށް ވެ އެވެ.

ރާއްޖެ އިން މި އަހަރު ހައްޖަށް ދާ މީހުން ފުރަން ފަށާނީ އަންނަ މަހުގެ 12 ގަ އެވެ. އެންމެ ފުރަތަމަ ހައްޖަށް ފުރާނީ ހައްޖު ކޯޕަރޭޝަންގެ ހަވާލުގައި ހައްޖަށް ދާ ފުރަތަމަ ބެޗެވެ.