ކެންޑިޑެސީތައް ބާތިލްކުރި މައްސަލަ ހައި ކޯޓަށް ބެލޭނެތޯ ސުވާލު އުފެދިއްޖެ

އަންނަ ލޯކަލް ކައުންސިލް އިންތިޚާބަށް ކުރިން ކުރިމަތިލި ކެންޑިޑޭޓުންގެ ކެންޑިޑެސީ ބާތިލްކޮށް، އެ މީހުން އަލުން ކުރިމަތިލާން ޖެހޭ ގޮތަށް އިލެކްޝަންސް ކޮމިޝަނުން ނިންމި ނިންމުމާ ގުޅޭގޮތުން އެމްޑީޕީން ހައި ކޯޓަށް ހުށަހެޅި މައްސަލަ އެ ކޯޓަށް ބެލޭނެތޯ ސުވާލު އުފެދިއްޖެ އެވެ.

މިމަހުގެ 14 ގައި ކައުންސިލް އިންތިޚާބު ބާއްވަން ފުރަތަމަ ނިންމާފައި ވަނިކޮށް އިތުރު ދެ މަހަށް އިންތިޚާބު ފަސްކުރަން ކޯޓުން ކުރި ހުކުމާ ގުޅިގެން އިލެކްޝަންސް ކޮމިޝަނުން ނިންމީ އަންނަ އޭޕްރީލް މަހުގެ އަށް ވަނަ ދުވަހު އިންތިޚާބު ބޭއްވުމަށާއި ކުރިން ކުރިމަތިލާފައި ތިިބި ކެންޑިޑޭޓުން ވެސް އަލުން ކުރިމަތިލާންޖެހޭނެ ކަމަށެވެ. ކޮމިޝަންގެ އެމްޑީޕީން ހައި ކޯޓަށް މައްސަލަ ހުށަހެޅީ އެ ކޮމިޝަންގެ އެ ނިންމުން ބާތިލް ކުރުމަށެވެ.

އެ މައްސަލައިގެ އަޑުއެހުންތައް ކޯޓުން މިއަދު ފެށުމާ އެކު، އިލެކްޝަންސް ކޮމިޝަން ތަމްސީލު ކުރާ ބަންޑާރަ ނައިބުގެ އޮފީހުން ވަނީ އެ މައްސަލަ ހައި ކޯޓަށް ނުބެލޭނެ ކަމަށް ބުނެ އިޖްރާއީ ނުކުތާއެއް ނަގައިފަ އެވެ.

ބަންޑާރަ ނައިބުގެ އޮފީހުގެ ވަކީލާ ވިދާޅުވީ އިންތިޚާބީ ޝަކުވާގެ މައްސަލަ ހައި ކޯޓަށް ހުށަހެޅޭނީ އެ މައްސަލަ ކޮމިޝަނަށް ހުށަހެޅުމަށް ފަހު ކޮމިޝަންގެ ނިންމުމާ މެދު ހިތްހަމަނުޖެހޭ ނަމަ ކަމަށް އިންތިޚާބާ ބެހޭ އާންމު ގާނޫނުގެ 64 ވަނަ މާއްދާގައި ބުނާ ކަމަށެވެ. އެކަމަކު އެމްޑީޕީން އެ މައްސަލަ ހުށަހެޅީ ކޮމިޝަނަށް ޝަކުވާ ހުށަނާޅައި ކަމަށާއި އެހެންވެ އެ މައްސަލަ ބެލުމުގެ އިހްތިސާސް ހައި ކޯޓަށް ނޯންނާނެ ކަމަށް ވަކީލާ ވިދާޅުވި އެވެ.

ދައުލަތުގެ ވަކީލާގެ އިތުރުން ފަނޑިޔާރުންގެ ބެންޗުން ވެސް ވަނީ އިންތިޚާބުތަކާ ބެހޭ އާންމު ގާނޫނުގެ 21 ވަނަ މާއްދާގެ ބ. އޮތްގޮތުން އެ މައްސަލަ ބެލުމުގެ އިހްތިސާސް ހައި ކޯޓަށް އޮތް ކަން ގަބޫލުކުރަންތޯ ވިދާޅުވެ އެމްޑީޕީގެ ވަކީލާ ސުވާލު ކުރައްވައިފަ އެވެ.

އެ މާއްދާގެ ބ. ގައި ވަނީ ކެންޑިޑެސީ ބަލައިނުގަތުމަށް ކޮމިޝަނުން ނިންމި ނިންމުމަކާ މެދު ހިތްހަމަނުޖެހޭ ނަމަ އެ މައްސަލައެއް ހުށަހަޅަން ޖެހޭނީ ސުޕްރީމް ކޯޓަށް ކަމަށާއި އެ ނޫން ކަމަކާ ގުޅޭގޮތުން ނަމަ ހައި ކޯޓަށް މައްސަލަ ހުށަހަޅަންޖެހޭނީ ހައި ކޯޓަށް ކަމަށެވެ.

ފަނޑިޔާރުން ކުރެއްވި ސުވާލުގެ ޖަވާބުގައި އަނަސް ވިދާޅުވީ އެ މައްސަލަ ހައި ކޯޓަށް ބެލޭނެ ކަމަށާއި ސަބަބަކީ ކޮމިޝަނުން އަމަލުކުރީ ގާނޫނާ ޚިލާފަށް ކަމަށްވާތީ ކަމަށެވެ.

އެކަމަކު ދައުލަތުން ފާހަގަކުރި ނުކުތާ އަށް ޖަވާބުދާރީވާން އިތުރު ފުރުސަތެއް ބޭނުންވާ ކަމަށް އަނަސް ވިދާޅުވި އެވެ. އެހެންވެ މިއަދުގެ އަޑުއެހުން ނިންމާލީ އެ ފުރުސަތު އެމްޑީޕީ އަށް ދިނުމަށް ފަހު އެވެ.

ކޮމިޝަންގެ އެ ނިންމުމަށް އަމަލުކުރުން ފަސް ކުރުމުގެ އަމުރަކަށް ވެސް އެމްޑީޕީން އެ މައްސަލާގައި އެދިފައި އޮތަސް ފަނޑިޔާރުން ވިދާޅުވީ އަމުރާ މެދު ގޮތެއް ނިންމޭނީ އެ މައްސަލަ ބެލުމުގެ އިހްތިސާސް ހައި ކޯޓަށް ލިބިގެންވޭތޯ ނުވަތަ ނޫންތޯ ކަނޑައެޅުމަށް ފަހު ކަމަށެވެ.

ފަނޑިޔާރު އަލީ ސަމީރު ރިޔާސަތު ބަލަހައްޓަވާ ބެންޗުގައި ދެން ތިއްބަވަނީ ފަނޑިޔާރު އަބްދުﷲ ހަމީދު އަދި ފަނޑިޔާރު އަބްދުއްރައޫފް އިބްރާހިމެވެ.

ޕީޕީއެމްގެ އެތެރޭގެ މައްސަލަތަކާ ހެދި އެ ޕާޓީ އަށް ތައްޔާރު ނުވެވޭތީ އިންތިޚާބު އިތުރު ދެ މަހަށް ފަސްކުރަން ސިވިލް ކޯޓުން އެންގިއިރު 900 ކެންޑިޑޭޓުންގެ ކެންޑިޑެސީ ކޮމިޝަނުން އޮތީ ބަލައިގެންފަ އެވެ. އެކަމަކު އިންތިޚާބުގެ އާ ތާރީޚު އިއުލާންކޮށް ކޮމިޝަނުން ނިންމީ ކުރިން ބަލައިގެންފައި ތިބި ކެންޑިޑެސީތައް ވެސް ބާތިލްކޮށް، އެ މީހުން އަލުން ކުރިމަތިލާން ޖެހޭ ގޮތަށެވެ.