އެލްޖީއޭގެ ސީއީއޯ އަފްޝަން އިސްތިއުފާ ދެއްވަނީ

ލޯކަލް ގަވަމެންޓް އޮތޯރިޓީ (އެލްޖީއޭ)ގެ ސީއީއޯގެ މަގާމުން އަފްޝަން ލަތީފު އިސްތިއުފާ ދެއްވަން ނިންމަވައިފި އެވެ.

އަފްޝަން މިއަދު "މިހާރު" އަށް ވިދާޅުވި ގޮތުގައި، އޭނާގެ އިސްތިއުފާގެ ސިޓީ މިހާރު ވަނީ ފޮނުއްވައިފަ އެވެ. އަދި އަންނަ ބުރާސްފަތި ދުވަހަކީ އޭނާ ވަޒީފާއަށް ނުކުންނަވާނެ އެންމެ ފަހު ދުވަސް ކަމަށް ވިދާޅުވި އެވެ.

"އަޅުގަނޑު އިސްތިއުފާ ދިނީ އާއިލާއަށް ވަގުތު ދިނުމަށާއި އަމިއްލަ ކަންކަން ކުރުމަށް،" އޭނާ ވިދާޅުވި އެވެ.

އެލްޖީއޭގެ ސީއީއޯއަކަށް އަފްޝަން އައްޔަންކުރެއްވީ ޖޫން 9، 2020 ގަ އެވެ.

އަފްޝަން އަކީ އެމްޑީޕީގެ ތެރޭގައި އުފެދިފައިވާ ސަރުކާރާ ދެކޮޅު ފެކްޝަނާ އެކު ކުރީގެ ރައީސް މުހައްމަދު ނަޝީދަށް ރިޔާސީ ޕްރައިމަރީތެރޭގައި ކެމްޕެއިން ކުރެއްވުމުން އެސްޓީއޯގެ މެނޭޖިން ޑިރެކްޓަރުގެ މަގާމުން ވަކިކުރި ހުސައިން އަމްރުގެ އަނބިކަނބަލުންނެވެ. އަފްޝަން ވެސް ވަނީ އެ ކެމްޕެއިންގައި ބައިވެރިވެ ވަޑައިގެންފަ އެވެ.

އަފްޝަން އެލްޖީއޭއަށް އައްޔަންކުރުމުގެ ކުރިން ހުންނެވީ އެމްޑީޕީގެ ސެކްރެޓަރީ ޖެނެރަލްކަމުގެ މަގާމުގަ އެވެ. އަދި ޕާޓީގެ އިދާރީ ގިނަ މަސައްކަތްތަކެއް އޭނާ ކުރެއްވި އެވެ.