މަރަޑޯނާގެ ޒަމާނަށް ފަހު ނަޕޯލީ ފުރަތަމަ ފަހަރަށް އިޓަލީގެ ރަސްކަމަށް

ނޭޕްލްސް (މެއި 5) - އާޖެންޓީނާގެ ލެޖެންޑް ޑިއޭގޯ މަރަޑޯނާ އިޓަލީގައި ކުޅުނު ޒަމާނަށް ފަހު ނަޕޯލީ އިން ފުރަތަމަ ފަހަރަށް އިޓާލިއަން ލީގުގެ ޗެމްޕިއަންކަން ހޯދައިފި އެވެ.

މީގެ ކުރިން ނަޕޯލީން ވަނީ ދެ ފަހަރު ލީގު ޗެމްޕިއަންކަން ހޯދައިފަ އެވެ. އެންމެ ފުރަތަމަ ތަށި ހޯދީ 1986/1987 ސީޒަންގަ އެވެ. އަދި ދެން ޗެމްޕިއަންކަން ނެގީ 1989/1990 ސީޒަންގަ އެވެ. ދެ ފަހަރުވެސް ތަށި ހޯދާފައި ވަނީ މަރަޑޯނާގެ މޮޅު ކުޅުމާއެކު އެވެ. މަރަޑޯނާ ވަނީ ނަޕޯލީއަށް ހަތް ސީޒަން ކުޅެދީފަ އެވެ. އަދި އެ ކްލަބުން ވަނީ 2000 ވަނަ އަހަރު، މަރަޑޯނާ އެ ކްލަބުގައި ބޭނުންކުރި 10 ނަމްބަރު ޖޯޒީ ވެސް ރިޓަޔާ ކޮށްފަ އެވެ.

ލީގުގައި ރޭ އުޑިނޭޒީއާ ދެކޮޅަށް ރަށުން ބޭރުގައި ނުކުތުމުގެ ކުރިން ނަޕޯލީ އަށް ޗެމްޕިއަންކަން ހޯދަން ބޭނުންވީ އެންމެ ޕޮއިންޓެކެވެ. އެޓީމުން ވަނީ އުޑިނޭޒީއާ 1-1 އިން އެއްވަރުކޮށް، ލީގުގައި ބާކީ ފަސް މެޗު އޮއްވައި 80 ޕޮއިންޓް ހަމަކޮށްގެން، 33 އަހަރަށް ފަހު ލީގުގެ ޗެމްޕިއަންކަން ޔަގީން ކޮށްފަ އެވެ.

ނަޕޯލީ އެއްވަނައިގައި އޮތީ ދެވަނައިގައި އޮތް ލާޒިއޯ އަށް ވުރެ 16 ޕޮއިންޓް ކުރީގަ އެވެ. ލާޒިއޯ އަށް ވަނީ 64 ޕޮއިންޓް ލިބިފަ އެވެ.

ދެހާސް ވިހިވަނަ އަހަރު މަރަޑޯނާގެ މަރާ ގުޅިގެން އެ އަހަރު ނަޕޯލީން ވަނީ މަރަޑޯނާގެ ޝަރަފުގައި ކްލަބުގެ ދަނޑުގެ ނަން ވެސް ވަނީ ސްޓޭޑިއޯ ޑިއޭގޯ އާމަންޑޯ މަރަޑޯނާގެ ނަމަށް ބަދަލު ކޮށްފަ އެވެ. އެ ދަނޑުގައި މިދިޔަ އާދިއްތަ ދުވަހު މޮޅެއް ހޯދައިގެން ލީގު ޗެމްޕިއަންކަން ޔަގީން ކުރަން ނަޕޯލީ ނުކުތް ނަމަވެސް ފަހުވަގުތު އެ މެޗު ނިމުނީ އެއްވަރު ވެގެންނެވެ.

އުޑިނޭޒީން ވަނީ ރޭ ކުޅުނު މެޗުގެ 13 ވަނަ މިނިޓުގައި ސަންޑީ ލޮވްރިކްގެ ގޯލަކުން ލީޑު ނަގައިފަ އެވެ. ނަޕޯލީން އެއްވަރު ކުރީ 52 ވަނަ މިނިޓުގައި އެޓީމުގެ ނައިޖީރިއާ ފޯވާޑް ވިކްޓާ އޮސީމެން ޖަހައިދިން ގޯލުންނެވެ. މި މެޗު ބަލަން ނަޕޯލީގެ 10،000 އެއްހާ ސަޕޯޓަރުން ވަނީ އުޑިނޭޒީގެ ދަނޑަށް ގޮސްފަ އެވެ.

އޮސީމެން ވަނީ ލީގުގައި 26 މެޗު ކުޅެގެން މިހާތަނަށް 21 ގޯލު ޖަހައިދީގފަ އެވެ. އަދި އެޓީމަށް ކުޅޭ ޖިއޯޖިއާގެ 22 އަހަރުގެ ވިންގާ ކިވިޗާ ކްވާރާޓްސްކެލިއާ ވަނީ މިހާތަނަށް 12 ގޯލު ޖަހައި 10 ގޯލު އެސިސްޓް ކޮށްދީފަ އެވެ.

"ނަޕޯލީގެ ރައްޔިތުން އުފަލުން ތިބި ތަން ފެނުމުން އަހަރެންނަށް އުފާވެރި އިހުސާސްތަކެއް ކުރެވޭ،" މެޗަށް ފަހު ނަޕޯލީގެ ކޯޗު ލޫސިއާނޯ ސްޕަލޭޓީ ބުންޏެވެ.

"ހަޔާތުގައި އުނދަގޫ ދުވަސްތަކެއް ކުރިމަތިވާ ހިނދު [ނަޕޯލީގެ] ރައްޔިތުން ހަނދާން ކުރާނީ މި ހާއްސަ ވަގުތުކޮޅު. މި ކާމިޔާބީ އެމީހުން ފާހަގަކުރަން ޖެހޭ. އަދި އެމީހުން އުފާ ކޮށްދެވުމުގެ އިހުސާސް ވުމުން އަހަރެންނަށް ހިތްހަމަޖެހުން ލިބޭ."

ކުރިން ރޯމާ އަށް ދެ ފަހަރު އިޓާލިއަން ކަޕް ކާމިޔާބު ކޮށްދިން އުމުރުން 64 އަހަރުގެ ކޯޗު ސްޕަލޭޓީ ވެފައި ވަނީ އިޓާލިއަން ލީގު ކާމިޔާޞު ކުރި އެންމެ ދޮށީ މެނޭޖަރަށެވެ.

ކާމިޔާބު ދުވަސްތަކަކަށް ފަހު މާލީގޮތުން ކްލަބް އަޑިއަޅާލައި ނަޕޯލީ އަށް 2004 އިން 2006 އަށް އިޓަލީގެ ތިންވަނަ ޑިވިޝަން ވެސް ކުޅެން ޖެހުނެވެ. އަދި އެނބުރި އެއްވަނަ ޑިވިޝަނަށް އައީ 2007/2008 ވަނަ ސީޒަނަށެވެ.

ފާއިތުވި 11 ސީޒަންގައި ނަޕޯލީން ވަނީ ތިން ފަހަރު އިޓާލިއަން ކަޕް ވެސް ކާމިޔާބު ކޮށްފަ އެވެ. ނަމަވެސް އިޓަލީގެ ސަޕޯޓަރުންގެ އުންމީދަކަށް ވީ ލީގު ޗެމްޕިއަންކަން ހޯދުމެވެ. މިއަދާ ހަމައަށް ވެސް އެ ސަޕޯޓަރުން އަންނީ މަރަޑޯނާއާ އެކު ކްލަބުން ހޯދި ކާމިޔާބީ ހަނދާން ކުރަމުންނެވެ.