އިސްކަންދަރުގެ ޕްރިންސިލް ހާޓް އެޓޭކެއް ޖެހި ފަރުވާ ހޯއްދަވަނީ، ބައިޕާސްއެއް ހަދަނީ

އިސްކަންދަރު ސްކޫލްގެ ޕްރިންސިޕަލް ހުސައިން ސައީދަށް ހާޓް އެޓޭކެއް ޖެހިގެން ފަރުވާ ހޯއްދަވަން ފައްޓަވައިފި އެވެ.

އަރަބިއްޔާ ސްކޫލްގެ ވެސް ވަގުތީ ޕްރިންސިޕަލް ހުސައިނަށް ހާޓް އެޓޭކެއް ޖެހުނީ އިސްކަންދަރުގެ ބައެއް މުވައްޒަފުންނާ އެކު މިދިޔަ އަންގާރަ ދުވަހުގެ ހެނދުނު ބައްދަލުވުމެއްގައި އިންވަނިކޮށް، މެއަށް ތަދެއް އަރައިގެން އޭޑީކޭ ހޮސްޕިޓަލަށް އަމިއްލަ އަށް ވަޑައިގެން ފަރުވާ ހޯއްދަވަނިކޮށެވެ.

"މެއަށް ތަދެއް އަރައިގެން ހޮސްޕިޓަލްގައި ބާއްވާފައި އޮއްވައި ހާޓް އެޓޭކެއް އައީ. އެއީ މޭޖަ އެޓޭކެއް. ފަހުން ޓެސްޓްތައް ހަދައި ބެލިއިރު ހުރިހާ ހޮޅިތައް ހުރީ ބެދިފައި،" ރާއްޖޭގެ އެންމެ ތަޖުރިބާކާރު އެއް ޕްރިންސިޕަލްގެ ގާތް މީހަކު ބުންޏެވެ.

"އޭރު ފުދޭވަރަކަށް ކްރިޓިކަލް ވި."

އުމުރުން 57 އަހަރުގެ ހުސައިންގެ ހާލު މި ވަގުތު ހުރި ގޮތުން ރާއްޖެ އިން ބޭރަށް ދަތުރު ކުރައްވަން ޑޮކްޓަރު ލަފައެއް ނުދެއްވި އެވެ.

"އެހެންވެ، މިހާރު ނިންމާފައި އޮތީ އޭޑީކޭ ހޮސްޕިޓަލްގައި އަންނަ ހޮނިހިރު ދުވަހު ބައިޕާސް އޮޕަރޭޝަނެއް ކުރަން،" އައްޑޫ ފޭދު އަށް އުފަން ހުސައިންގެ ގާތް މީހަކު ބުންޏެވެ.

ހުސައިނަށް ދިމާވި ސިއްހީ އެހެން ކަމެއްގައި ވެސް އޮޕަރޭޝަނެއް ކުރެއްވިތާ އަދި ތިން މަސް ނުވެ އެވެ.

ހުސައިނަކީ މީހުންނާ ގުޅޭ، އަދި ތައުލީމީ ދާއިރާގެ އިސް ބޭފުޅުންގެ އިތުބާރު ހޯއްދަވާފައިވާ ބޭފުޅެކެވެ. މިދިޔަ އަހަރުގެ ނޮވެމްބަރު މަހުން ފެށިގެން އަރަބިއްޔާ ސްކޫލްގެ ވަގުތީ ޕްރިންސިޕަލްކަން ކުރައްވަމުން ގެންދަވާއިރު، އޭނާގެ އިސްނެގުމަށް އެ ސްކޫލަށް ވެސް ބޮޑެތި ބަދަލުތަކެއް ގެންނަވަން ވަނީ ފައްޓަވައިފަ އެވެ.