ހޯރަފުށީ ސަލީމަށް ހާޓް އެޓޭކެއް ޖެހިގެން ފަރުވާ ދެނީ

ރައީސްގެ ކުރީގެ މެމްބަރު އަދި ކުރީގެ މަޝްހޫރު ނޫސްވެރިޔާ މުހައްމަދު ސަލީމް (ހޯރަފުށީ ސަލީމް) އަށް ހާޓް އެޓޭކެއް ޖެހިގެން ފަރުވާ ދޭން ފަށައިފި އެވެ.

އެ އާއިލާއިން ވާހަކަ ދެއްކި މީހަކު މިއަދު ބުނީ ސަލީމަށް ހާޓް އެޓޭކް ޖެހުނީ ފަތިހު ކަމަށެވެ. އެއާއެކު، ވަގުތުން އޭޑީކޭއަށް ގެންގޮސް ފަރުވާ ދޭން ފަށާފައިވާ ކަމަށް އާއިލާއިން ވާހަކަދެއްކި މީހާ ބުންޏެވެ.

އެ ހޮސްޕިޓަލުން މިހާރު އަންނަނީ ސަލީމްގެ ހިތުގެ އޮޕަރޭޝަނެއް ކުރަމުންނެވެ. އެހެންވެ، އޭނާގެ ހާލަތާ ގުޅޭ އިތުރު ތަފްސީލެއް އާއިލާއަކަށް ވެސް އަދި ނޭނގެ އެވެ.

"މިހާތަނަށް ހިތުގެ އެއްވެސް މައްސަލައެއް ހުރިކަމެއް އެނގިފައެއް ނެތް،" އާއިލާއިން ވާހަކަދެއްކި މީހާ ބުންޏެވެ.

"އާފަތިސް" ނޫހުން 1984 ގައި ނޫސްވެރިކަން ފެއްޓެވި ސަލީމް ވަނީ 1986 އިން 1990ގެ އަހަރުތަކާ ހަމައަށް "ހަވީރު" ގައި ނޫސްވެރިކަން ކުރައްވައިފަ އެވެ. އޭގެ ފަހުން "މިއަދު" ނޫހުގެ އެޑިޓަރުކަން ކުރެއްވި އެވެ.

ނޫސްވެރިކަމުގެ ދާއިރާއަށް އޭނާ ކޮށްދެއްވާފައިވާ ހިދުމަތުގެ އަގުވަޒަންކޮށް ސަރުކާރުން ވަނީ ގައުމީ އިނާމު ދީފަ އެވެ. އަދި ނޫސްވެރިކަމުގެ ރަންޔޫބީލްގެ ރަންގަލަމާއި އަލިމަސްޔޫބީލްގެ އަލިމަސް ގަލަން ލިބުނެވެ. ރާއްޖޭގެ މަޝްހޫރު ޅެންވެރިޔާ ހޯރަފުށީ އާދަމް ސަލީމްގެ ބޭފުޅެއް ކަމަށްވާ މުހައްމަދު ސަލީމަކީ ކުޅަދާނަ ޅެންވެރިއެއް ވެސް މެ އެވެ. މީގެ އިތުރުން ސަލީމަކީ ސްކޫލް ދުވަސްވަރުން ފެށިގެން ހުނަރުވެރި ވާހަކަދެއްކުންތެރިއެކެވެ.

ރައްޔިތުންގެ މަޖިލީހަށް ކުރީގެ ރައީސް މައުމޫން އައްޔަން ކުރެެއްވި 8 ބޭފުޅުންގެ ތެރޭގައި ވެސް ހިމެނުނު ސަލީމަކީ، މައުމޫން އުފެއްދެވި ސިޔާސީ ޕާޓީ، ޑީއާރްޕީ ރަޖިސްޓްރީކުރުމުގައި ވެސް އިސްކޮށް އުޅުއްވި ބޭފުޅެކެވެ.