ހުޅުމާލެ 2 ގައި ނުރައްކާތެރި އެކްސިޑެންޓުތައް ގިނަވަނީ

ހުޅުމާލެ 2 ގައި ނުރައްކާތެރި އެކްސިޑެންޓުތައް ހިނގުން އާންމު ކަމަކަަށް ވާން ފަށައިފި އެވެ.

ވޭތުވެދިޔަ ދެ ރޭ ވެސް ހުޅުމާލެ 2 ގައި ނުރައްކާތެރި އެކްސިޑެންޓުތައް ހިނގި އެވެ. މިދިޔަ ބުރާސްފަތި ދުވަހު އެމްޕީއެލް ފްލެޓްތައް ކައިރީގައި ޕިކަޕަކާއި ސައިކަލެއް ޖެހި ހިނގި އެކްސިޑެންޓެއްގައި އަނިޔާވި މީހަކަށް އައިސީޔޫގައި ފަރުވާދޭން ޖެހުނެވެ.

ހޯމަ ދުވަހުގެ ރޭ ހިޔާ ފްލެޓް ސަރަހައްދުގައި ހަތަރު ސައިކަލާއި ކާރަކާއި ޕިކަޕެއް ޖެހިގެން ވެސް ނުރައްކާތެރި އެކްސިޑެންޓެއް ހިނގި އެވެ. އެ އެކްސިޑެންޓުގައި މީހަކަށް މާ ބޮޑު އަނިޔާއެއް ނުލިބުނަސް، ވެހިކަލްތަކަށް ބޮޑެތި ގެއްލުންތައް ލިބިފައިވެ އެވެ.

ރޭ ވެސް ހިޔާ ފްލެޓްތައް ކައިރީގައި ނުރައްކާތެރި އެކްސިޑެންޓެއް ހިނގައި، ބަޔަކަށް އަނިޔާވި އެވެ. އެ އެކްސިޑެންޓް ހިނގީ ދެ ސައިކަލު ޖެހިގެންނެވެ.

މި މަހު ތިނެއްގައި ހުޅުމާލެ ދެވަނަ ފިޔަވަހީގައި ޕިކަޕަކާއި ސައިކަލެއް ޖެހި ހިނގި އެކްސިޑެންޓެއްގައި މީހަކު މަރު ވެސް ވެފައިވެ އެވެ. އެ އެކްސިޑެންޓެއްގައި މަރުވީ އުމުރުން 59 އަހަރުގެ މީހެކެވެ.

ފުލުހުން ހާމަކުރި، މިދިޔަ ރޯދަމަހުގެ ފުރަތަމަ 15 ދުވަހުގެ ތަފާސްހިސާބުތަކުގައިވާ ގޮތުން، މާލެ ސަރަހައްދުގައި އެންމެ ގިނައީ ޓްރެފިކް އެކްސިޑެންޓްތަކުގެ މައްސަލަތަކެވެ. މާލެ، ހުޅުމާލެ، ހުޅުލެ އަދި ވިލިމާލެ އިން މުޅި ޖުމްލަ 151 އެކްސިޑެންޓް ފުލުހުންނަށް ރިޕޯޓްކޮށްފައިވާ ކަމަށް ބުންޏެވެ.