ހުޅުމާލެއިން ޔޫތު މިނިސްޓްރީއަށް ބޮޑު ބިމެއް ދީފި

ހުޅުމާލެ ދެވަނަ ފިޔަވަހިން ޔޫތު މިނިސްޓްރީއަށް ބޮޑު ބިމެއް އިއްޔެ ދީފި އެވެ.

އާބަންކޯ އިން ބުނި ގޮތުގައި، އެއީ ހުޅުމާލޭގައި މުނިފޫހިފިލުވުމަށާއި އެކިއެކި ކުޅިވަރު ކުޅެވޭނެ އިންތިޒާމު ހަމަޖެއްސުމަށް ޔޫތު މިނިސްޓްރީއަށް ދިން ބިމެކެވެ. އެކިއެކި ރެކްރިއޭޝަނަލް ވަސީލަތްތައް ތަރައްގީކުރަން ދިން އެ ބިމަކީ 54،307.32 އަކަފޫޓުގެ ބޮޑު ބިމެކެވެ.

އެ ބިން ހަވާލުކުރުމަށް އިއްޔެ އާބަންކޯގެ ހެޑް އޮފީހުގައި ބޭއްވި ރަސްމިއްޔާތުގައި އެކަމުގެ އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަހްމަދު މަހުލޫފެވެ. އަދި އާބަންކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހްމަދު އާތިފެވެ.

ޔޫތު މިނިސްޓްރީގެ ބަހެއް ނުލިބޭތީ މި ބިމުގައި ކުރަނީ ސީދާ ކޮން ބޭނުމެއް ކަމެއް ސާފުވާ ގޮތެއް އަދި ނުވެ އެވެ.

އާބަންކޯ އިން އަންނަނީ ހުޅުމާލޭގައި އެކިއެކި ކުޅިވަރު ކުޅެވޭނެ ވަސީލަތްތަކާއި އިންތިޒާމުތައް ހަމަޖައްސަވަމުންނެވެ.

ހުޅުމާލޭގައި އިންޑޯ އަދި އައުޓްޑޯ ކުޅިވަރު ކޯޓްތަކާއި ސްކޭޓް ޕާކުތައް ހެދުމާއި މޫދު ކުޅިވަރު ކުޅެވޭނެ އިންތިޒާމު ވެސް އާބަންކޯ އިން އަންނަނީ ހަމަޖައްސަމުންނެވެ. އަދި އެކި އުމުރުފުރައިގެ މީހުން މުނިފޫހިފިލުވުމަށާއި ހިތްހަމަޖައްސާލަން ނުކުމެލާނެ ޕާކުތަކާއި ކުޑަކުދިންނަށް ކުޅިވަރު ކުޅެވޭނެ ޕާކުތައް ވެސް ހުޅުމާލޭގެ އެކި ތަންތަނުގައި އަންނަނީ ހަދަމުންނެވެ.