ޔުނައިޓެޑް ވައްޓާލައި ނިއުކާސަލް ތިން ވަނަ އަށް

ނިއުކާސަލް (އޭޕްރީލް 3) - އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑް 2-0 އިން ބަލިކޮށް ނިއުކާސަލް ޔުނައިޓެޑް ލީގުގެ ތިން ވަނަ އަށް ޖެހިލައިފި އެވެ.

ނިއުކާސަލްގެ ދަނޑުގައި ރޭ ކުޅުނު މެޗުގައި އެޓީމަށް ގޯލު ޖަހައިދިނީ ޖޯ ވިލޮކް އާއި ކެލަމް ވިލްސަން އެވެ. މި ދެ ގޯލު ވެސް ޖަހާފައި ވަނީ ދެ ވަނަ ހާފުގަ އެވެ.

މި ނަތީޖާއާ އެކު ނިއުކާސަލް ތިން ވަނައަށް އެރިއިރު ޔުނައިޓެޑް ވަނީ ހަތަރު ވަނަ އަށް ވެއްޓިފަ އެވެ. ޔުނައިޓެޑާއި ނިއުކާސަލް އަށް ވެސް ވަނީ 27 މެޗުން 50 ޕޮއިންޓް ލިބިފަ އެވެ. ނިއުކާސަލް އަށް ކުރި ލިބެނީ ފައިދާ ގޯލުގެ ތަފާތުންނެވެ. ދެ ޓީމުން ވެސް ވަނީ ލީގުގައި މިހާތަނަށް 41 ގޯލު ޖަހައިފަ އެވެ. ނިއުކާސަލް އަށް ފައިދާ 22 ގޯލު ލިބިފައި ވާއިރު، ބައިކޮޅަށް ގިނަ ގޯލުތަކެއް ވަދެފައިވާ ޔުނައިޓެޑަށް ލިބިފައި ވަނީ ހަތަރު ގޯލެވެ.

މި ސީޒަންގެ ލީގުގައި ޔުނައިޓެޑުން އަމިއްލަ ދަނޑުގައި ނިއުކާސަލް އާ ދެކޮޅަށް މިދިޔަ އޮކްޓޫބަރު މަހު ކުޅުނު މެޗު ނިމުނީ ލަނޑެއް ނުޖެހި އެއްވަރު ވެގެންނެވެ. އެކަމަކު ފެބްރުއަރީ މަހު ޔުނައިޓެޑް ވަނީ 2-0 އިން ލީގު ކަޕް ފައިނަލުގައި ނިއުކާސަލް ބަލިކޮށް ފަސް ސީޒަނަށް ފަހު ފުރަތަމަ ފަހަރަށް ތަށްޓެއް އުފުލާލައިފަ އެވެ.

ނިއުކާސަލްގެ ދެ ވަނަ ލަނޑު ޖަހައިދިން ވިލްސަން ބުނީ ލީގް ކަޕް ފައިނަލް މެޗުން ބަލިވުމުން ދެރަވި ކަމަށާއި ސަޕޯޓަރުންގެ ކުރިމަތީގައި އެކަމުގެ ހިތި ފިލުވާލަން ބޭނުންވެފައި ތިބި ކަމަށެވެ.

"އަހަރެމެން ތިބީ ފައިނަލުން ބަލިވެގެން ވަރަށް ދެރަވެފައި. އޭގެ ސަބަބުން އަހަރެމެން އަނގައިގައި އަދިވެސް ހިތި ރަހަ ލާ. ސަޕޯޓަރުން ކުރިމަތީގައި އެކަން ރަނގަޅުކުރަން ޖެހޭ ކޮންމެހެން ވެސް،" މެޗަށް ފަހު ވިލްސަން ބުންޏެވެ.

ޔުނައިޓެޑްގެ ކޯޗު އެރިކް ޓެން ހަގް ބުނީ ޔުނައިޓެޑަށް ވުރެ ނިއުކާސަލް އިން މެޗު ކާމިޔާބު ކުރަން ބޭނުންވެފައި ތިބި ކަމަށެވެ.

"މިހެން ބުނަން ބޭނުމެއް ނޫން، އެކަމަކުވެސް އެމީހުން [ނިއުކާސަލް] މިއަދު މޮޅަށް ކުޅުނީ. ހާއްސަކޮށް އެމީހުންގެ އަޒުމް އަދި ޝައުގުވެރިކަން ހުރި މެޗަށް. އެމީހުން ބޮޑަށް މޮޅުވާން ބޭނުންވީ، އެހެންވެ މޮޅުވީ އެމީހުން،" ޓެން ހަގް ބުންނެވެ.