އެމްޓީސީސީގެ ސަބަބުން އިގްތިސާދުގައި 100 މިލިއަން ޑޮލަރު ހިފެހެއްޓުނު

މި ސަރުކާރުން އެމްޓީސީސީގެ ކެޕޭސިޓީ އިތުރު ކުރުމަށް ފެށި މަސައްކަތުން ރާއްޖޭގެ އިގްތިސާދުގައި 100 މިލިއަން ޑޮލަރު ހިފެހެއްޓުނު ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެ އެވެ.

ރޭ ފަރެސްމާތޮޑާ އެއާޕޯޓު ހުޅުވުމުގެ ރަސްމިއްޔާތުގައި އާޒިމް ވިދާޅުވީ، އެމްޓީސީސީގެ ކެޕޭސިޓީ މިހާރު ހުރި ހިސާބަށް ނުގެނައި ނަމަ، އެ ކުންފުނިން ހިންގާ ބޮޑެތި ޕްރޮޖެކްޓްތައް ހިންގަން ޖެހޭނީ ބޭރުގެ ކުންފުނިތަކާ ހަވާލުކޮށްގެން ކަމަށެވެ.

އެމްޓީސީސީން ރާއްޖޭގައި ހިންގާ މުހިއްމު ގިނަ އެއާޕޯޓުތަކެއްގެ މަސައްކަތް ކުރަމުން އަންނަކަން ފާހަގަކުރައްވައި އާޒިމް ވިދާޅުވީ، އެ ކުންފުނިން، ހޯރަފުއްޓާއި މާވަރުލު އަދި ފަރެސްމާތޮޑާ އެއާޕޯޓު މަސައްކަތް ނިންމާލި އިރު މުލީ އެއާޕޯޓުގެ ރަންވޭގައި ތާރު އެޅުމުގެ މަސައްކަތް އަންނަ މަހު ފަށާނެ ކަމަށެވެ.

" ފ. މަގޫދޫ އެއާޕޯޓުގެ ރަންވޭގައި ތާރު އެޅުމުގެ މަސައްކަތް ވެސް، މި އަހަރުގެ ޖޫން މަހުގެ ތެރޭގައި ފަށާނެ. އެމްޓީސީސީން މަސައްކަތް ނިންމަމުން މި ގެންދާ، އަލިފުށީ އެއާޕޯޓުގެ ރަންވޭގައި ތާރު އެޅުމުގެ މަސައްކަތް ވެސް އޮގަސްޓު މަހުގެ ތެރޭގައި ފަށާނެ،" އޭނާ ވިދާޅުވި އެވެ.

އޭނާ ވިދާޅުވީ، އެ އެއާޕޯޓުގެ އިތުރުން، ކުޅުދުއްފުށީ އެއާޕޯޓުގެ ރަންވޭ ދިއްލުމަށް ރަންވޭގެ ޝޯ ޕްރޮޓެކްޝަންގެ މަސައްކަތް ކުރަމުން އަންނަ ކަމަށެވެ. އެ މަސައްކަތް ވެސް އަންނަ މަހަށް ނިންމޭނެ ކަމަށް އޭނާ ވިދާޅުވި އެވެ. އަދި ނ. މާފަރު އެއާޕޯޓު ބޮޑުކުރުމުގެ މަސައްކަތް އެއް އަހަރު ތެރޭ ނިންމާނެ ކަމަށް އާޒިމް ވިދާޅުވި އެވެ.

ރާއްޖޭގެ އެކި ސަރަހައްދުތަކުގައި ބަނދަރު ހެދުމާއި، ބިން ހިއްކުމުގެ މަސައްކަތްތައް އެމްޓީސީސީ އިން އަންނަނީ ކުރަމުންނެވެ. އެ ކުންފުނިން ފަރެސްމާތޮޑާ އެއާޕޯޓު ރަށާ ގުޅާލުމަށް ހަދާ ކޯޒްވޭގެ މަސައްކަތް ވެސް މިއަހަރު ޖުލައި މަހަށް ނިންމަން އަންނަނީ މަސައްކަތް ކުރަމުންނެވެ.