ރިޔާސީ އިންތިހާބުގައި ޖޭޕީ ވަކިން ވާދަކުރާތީ ސަމީރު އެ ޕާޓީން އިސްތިއުފާ ދެއްވައިފި

މި އަހަރު ބާއްވާ ރިޔާސީ އިންތިހާބުގައި ޖުމްހޫރީ ޕާޓީން ވަކިން ވާދަކުރަން ނިންމުމުން ރައީސް އޮފީހުގެ މިނިސްޓަރު އަހުމަދު ސަމީރު އެ ޕާޓިން އިސްތިއުފާ ދެއްވަން ނިންމަވައިފި އެވެ.

މިއަދު ބޭއްވި ޖޭޕީގެ ކައުންސިލް ބައްދަލުވުމުގައި، ރިޔާސީ އިންތިހާބުގައި އެ ޕާޓީން ކަން ކުރާނެ ގޮތަކާ މެދު ވޯޓަށް އެހި އިރު ރައީސް އިބްރާހިމް މުހައްމަދު ސޯލިހްގެ ސަރުކާރާ އެކު ކޯލިޝަން ހަދައިގެން ކުރިއަށްދާން ފެންނަ ކަމަށް ވޯޓު ދެއްވީ ސަމީރު އެކަންޏެވެ.

ޖޭޕީގެ ކުރީގެ އެސްޖީ ސަމީރު ވިދާޅުވީ އޭނާ ތާއީދުކުރައްވަން ނިންމަވާފައިވަނީ ރައީސަށް ކަމަށާއި އެހެންވެ ޖޭޕީ ވަކިން ވާދަކުރަން ނިންމުމުން ޕާޓީގައި އޭނާ ހުންނެވުމަކީ އެންމެ ރަނގަޅު ގޮތް ނޫން ކަމަށެވެ.

ސަރުކާރު ކޯލިޝަންގައި މިވަގުތު އޮތް ޖުމްހޫރީ ޕާޓީއަށް އެމްޑީޕީން ވަނީ ރިޔާސީ އިންތިހާބުގައި މިފަހަރު ވެސް އިއްތިހާދުވެ ކުރިއަށް ދިއުމަށް ދައުވަތު ދީފަ އެވެ. އެ ދައުވަތު ދީފައި ވަނިކޮށް ޖުމްހޫރީ ޕާޓީން ހުށަހެޅި ގަރާރުތަކުގައި އެ ޕާޓީން އިންތިހާބުގެ ފުރަތަމަ ބުރުގައި ވާދަކުރަން އޮތީ ހުށަހަޅައިފަ އެވެ. އެކަމަކު ގޮތެއް ނުނިމި އޮތީ މިކަމުގައި ފަހު ބަސް ވިދާޅުވާން ޖެހެނީ ގާސިމް ކަމަށް ވާތީ އެވެ.

ކައުންސިލްގެ މިއަދުގެ ނިންމުމާ އެކު ޖުމްހޫރީ ޕާޓީގެ ފަހަތަށް އަރައި އިންތިހާބަށް ކޯލިޝަން ހަދަން ބޭނުންވާ ޕާޓީތަކަށް އެ ފުރުސަތު އޮތީ ހުޅުވާލައިފަ އެވެ.