މަތިވެރިން ގެއްލުނު މީހާ އަދިވެސް ނުފެނޭ

އއ. މަތިވެރިން ގެއްލިގެން ހޯދަމުން އަންނަ އެ ރަށު ރިވެލި، ހަސަން އަލީ (ހަސަންފުޅު) އަދިވެސް ނުފެންނަ ކަމަށާއި އޭނާ ހޯދުމުގެ މަސައްކަތް ހުއްޓާ ނުލާ ކުރަމުން އަންނަ ކަމަށް ފުލުހުން ބުނެފި އެވެ.

ހަސަންފުޅު ގެއްލިގެން އޭނާ ހޯދުމަށް އެ ރަށުގެ ކައުންސިލުގެ ފޭސްބުކް ޕޭޖްގައި ފޮޓޯއާ އެކު އާންމުކުރީ މިދިޔަ އަންގާރަ ދުވަހު އެވެ. އޭނާ ހޯދަން ފެށީ ހޯމަ ދުވަހުން ފެށިގެން އޭނާގެ ހަބަރެއް ނުވެގެންނެވެ.

ފުލުހުން ބުނީ ހަސަންފުޅު ހޯދުމަށް ރަށުގެ ހުރިހާ ސަރަހައްދަކާއި ގޭބިސީތަކާއި ފަޅު ގޯތިތައް ބަލާފައިވާ ކަމަށެވެ. އަދިވެސް އިތުރު ތަންތަން ބަލަމުން އަންނައިރު ފުލުހުން ބުނި ގޮތުގައި ރަށުގެ ފަޅުތެރެ، ޑައިވްކޮށްގެން ބެލުމުގެ މަސައްކަތް ވެސް އަންނަނީ ކުރަމުންނެވެެ.

އުމުރުން 65 އަހަރުން މަތީގެ ހަސަންފުޅަކީ އާންމުކޮށް ދާ އަޅައިގެން މަސް ހިފަން ގޮސް އުޅޭ މީހެކެވެ. އޭނާ އެންމެ ފަހުން ފެނުނީ ހޯމަ ދުވަހު މަގްރިބް ނަމާދުން ފޭބި ވަގުތު ކަމަށްވެ އެވެ.