އިންޑިއާގައި ގެއްލުނު ދިވެހި މީހާ ފެނިއްޖެ

ބޭސްފަރުވާއަށް އިންޑިއާއަށް ގޮސް އުޅެނިކޮށް ގެއްލުނު ދިވެހި މީހާ މިއަދު ފެނިއްޖެ އެވެ.

ކ. ތުލުސްދޫ މީހެއް ކަމަށްވާ މުހައްމަދު މަހުދީ މިދިޔަ އަންގާރަ ދުވަހު ގެއްލުނީ އިންޑިއާގެ ކޮޗިންއަށް ގޮސް އުޅެނިކޮށެވެ. އާއިލާއާ އެކު ގޮސް އުޅެނިކޮށް އޭނާ ގެއްލުނީ އަމްރިތާ ހޮސްޕިޓަލް ކައިރިންނެވެ.

މަހުދީގެ އާއިލާއިން ބުނި ގޮތުގައި މަހުދީ ފެނުނުކަން އިންޑިއާގެ ކަމާބެހޭ ފަރާތްތަކުން ދެންމެ އާއިލާއަށް ވަނީ އަންގައިފަ އެވެ. އޭނާގެ ހާލު ރަނގަޅު ކަމަށް އާއިލާއިން ބުންޏެވެ. މިވަގުތު އޭނާ ހުރީ ޕޮލިސް ސްޓޭޝަނެއްގައި ކަމަށާއި އެހެންވެ، އާއިލާއިން އެތަނަށް ދަތުރު ކުރަމުންދާ ކަމަށް އޭނާ ބުންޏެވެ.

"ހާލު ރަނގަޅުކަމާއި އެތަނުގައި ހުރިކަން އަދި މިވަގުތު އެނގެނީ." އޭނާގެ ދައްތަ ބުންޏެވެ.

އޭނާ ހޯދުމަށް ގިނަ ބައެއްގެ ފަރާތުން ލިބުނު އެހީތެރި ކަމަށް އާއިލާއިން ޝުކުރު އަދާކުރެ އެވެ.

މަހުދީ އިންޑިއާއަށް ދިޔައީ އޭނާގެ ބޭސްފަރުވާއަކަށެވެ. އޭނާއާ އެކު އޭނާގެ ބައްޕަ އާއި ޅިޔަނަކު ވެސް އިންޑިއާއަށް ދިޔަ އެވެ.