އަޒްހާން ކަމަށް ބެލެވޭ މީހާގެ ޕޯސްޓްމޯޓަމް ހަދަން ހަށިގަނޑު އިންޑިއާ އަށް ފޮނުވާލައިފި

ހުޅުމާލެއިން ގެއްލިގެން ހޯދަމުން ދަނިކޮށް މަރުވެފައި އޮއްވައި ފެނުނު މުހައްމަދު އަޒްހާން ކަމަށް ބެލެވޭ މީހާގެ ޕޯސްޓްމޯޓަމް ހެދުމަށް ހަށިގަނޑު މިއަދު އިންޑިއާ އަށް ފޮނުވާލައިފި އެވެ.

ފުލުހުން ބުނީ އަޒްހާން، 27، ކަމަށް ބެލެވޭ މީހާގެ ޕޯސްޓްމޯޓަމް ހެދުމަށް އިންޑިއާއަށް ގެންގޮސްފައިވާ ކަމަށެވެ.

އެ ޒުވާނާ ގެއްލިގެން އެ އާއިލާ އިން ހޯދަން ފެށީ މިދިޔަ މަހުގެ 18 ވަނަ ދުވަހުގެ ހެނދުނުން ފެށިގެންނެވެ. އެ ހާދިސާ ފުލުހަށް ހުށަހެޅީ ޖެހިގެން އައި ދުވަހުގެ ރެ އެވެ.

އެކި ގޮތްގޮތުން ލިބުނު މައުލޫމާތަށް ބަލައި އަޒުހާން ހޯދުމުގެ މަސައްކަތް ކުރަމުން އަންނަނިކޮށް، އޭނާގެ ހަށިގަނޑު މި މަހުގެ ދެވަނަ ދުވަހުގެ ރޭ ފެނުނީ ހުޅުމާލޭގެ ސްކޭޓް ޕާކް ސަރަހައްދުގެ ގަސްތަކުގެ ތެރޭގައި ކުނިވެފައި އޮއްވަ އެވެ. އެއީ، ސީސީޓީވީ ފުޓޭޖުން އޭނާ އެންމެ ފަހުން ފެނުނު ސަރަހައްދެވެ. އެއާއެކު، ގެއްލިގެން ހޯދާ މީހެއްގެ މައްސަލައަކުން މަރުގެ މައްސަލައަކަށް ބަދަލުކޮށް މިހާރު ވަނީ ތަހުގީގު ފަށައިފަ އެވެ.

ތަހުގީގުގެ ތެރެއިން އޭނާގެ ފޯނު ހޯދާފައިވާއިރު، މަރާލާފައިވާ ކަމަށް ބެލެވޭނެ އެއްވެސް ހެއްކެއް ނުވަތަ ގަރީނާއެއް މިހާތަނަށް ލިބިފައިނުވާ ކަމަށް ފުލުހުން ބުނެ އެވެ.