ބަނޑޭރިކޮށިން ފެނުނު ހަށިގަނޑުގެ ޕޯސްޓްޕޯޓަމް ހަދަން އިންޑިއާ އަށް ގެންދަނީ

ބަނޑޭރިކޮށީގެ އެޕާޓްމެންޓެއްގައި މަރުވެފައި އޮއްވައި މިދިޔަ ހޯމަ ދުވަހު ފެނުނު މީހާގެ ހަށިގަނޑުގެ ޕޯސްޓްޕޯޓަމް ހަދަން އިންޑިއާ އަށް ގެންދަން ނިންމައިފި އެވެ.

ފުލުހުންގެ މީޑިއާގެ ވަޓްސްއެޕް ގްރޫޕަށް ފޮނުވި މެސެޖެއްގައި ބުނީ ބަނޑޭރިކޮށީގައި މަރުވެފައި އޮއްވައި ފެނުނު މީހާގެ ހަށިގަނޑުގެ ޕޯސްޓްމޯޓަމް ހެދުމަށް ފޮނުވުމަށް ކުރަން ޖެހޭ މަސައްކަތްތައް މިހާރު ކުރަމުން އަންނަ ކަމަށެވެ.

އާންމު ގޮތެއްގައި މިފަދަ މަރުތަކުގައި އޮޓޮޕްސީ ހަދަނީ ފުލުހުންނަށް ޝައްކު ކުރެވޭ ކަންތައްތަކެއް ހުރުމުންނެވެ. ނަމަވެސް މި މައްސަލައާ ގުޅޭ އިތުރު ތަފުސީލެއް ފުލުހުން މިހާތަނަށް ދީފައެއް ނުވެ އެވެ.

ބަނޑޭރިކޮށީގެ އެޕާޓްމެންޓެއްގައި މަރުވެފައި އޮއްވައި ފެނުނު ދިވެހި ފިރިހެން މީހާއަކީ 25 އަހަރުގެ ޖަލު ހުކުމެއްގައި ހުރި މީހެއް ކަމަށް ވިޔަސް، އޭނާ ވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފަހު ދުވަސްކޮޅު މާފު ދީ، ދޫކޮށްލާފައިފަ އެވެ.

އެނގިފައިވާ ގޮތުގައި އެ އެޕާޓްމަންޓުން ފެނުނީ ގދ. ހޯނޑެއްދޫ، ހައްމާދު ސައީދު، 30، އެވެ.

އެ ރަށުން ވާހަކަ ދެއްކި މީހަކު ކުރިން ބުނީ، ހައްމާދު ދިރިއުޅެނީ އޭނާގެ އާއިލާއާ އެކު މާލޭގައި ކަމަށެވެ. އެއީ މީގެ ކުރިން މަސްތުވާތަކެތީގެ ބޮޑެތި މައްސަލަތަކުގައި ހައްޔަރުކޮށްފައިވާ މީހެއް ކަމަށް ވެސް ހޯނޑެއްދޫން ވާހަކަ ދެއްކި މީހާ ބުންޏެވެ.

ދިރުވާލައިގެން ރާއްޖެއަށް ޑްރަގް އެތެރެކުރަން އުޅެނިކޮށް އެއާޕޯޓުން ހައްމާދު އަތުލައިގަނެ، 25 އަހަރުގެ ޖަލު ހުކުމެއް ކޮށްފައިވާ ކަމަށާއި އޭނާ ދޫކޮށްލީ މިދިޔަ އަހަރު ކަމަށް ވެސް އެ ރަށުން ވާހަކަ ދެއްކި މީހާ ބުންޏެވެ.

ފުލުހުން ކުރިން ބުނީ އެ މީހާގެ ހަށިގަނޑު ފެނިފައިވަނީ ފުލުހުންނަށް ލިބުނު މައުލޫމާތަކާ ގުޅިގެން ބަނޑޭރިކޮށީގެ އެޕާޓްމެންޓެއް ބަލައި ފާސްކުރުމުން ކަމަށެވެ. އެއީ އެއްވެސް ބަޔަކު ދިރިނޫޅޭ އެޕާޓްމެންޓެއް ކަން ޔަގީން ވެފައިވާ ކަމަށް ވެސް ފުލުހުން ބުނެފައިވެ އެވެ.

މަރުވެފައި އޮއްވާ ފެނުނު ހައްމާދުގެ ހަށިގަނޑު އޮތީ ވަރަށް ބޮޑަށް ކުނިވެފަ އެވެ. އޭނާ މަރުވެފައި އޮންނަތާ އޭރު ތިން ދުވަސްވި ކަން ވެސް ވަނީ އެނގިފަ އެވެ.