20 އަހަރަށްފަހު ސީއެޗްއެސްއީ އިން އިންޓަ ސްކޫލުގެ ތަށި ހޯދައިފި

ފައިނަލް ގައި ކެޔޮދޫ ސްކޫލާ ވާދަކޮށް 4-1 އިން މޮޅުވެގެން ސެންޓަަ ފޯ ހަޔަ ސެކަންޑަރީ އެޑިއުކޭޝަން (ސީއެޗްއެސްއީ) އިން އެފްއޭއެމް 19 އަހަރުން ދަށުގެ އިންޓަ ސްކޫލް ފުޓުބޯޅަ މުބާރާތުގެ ޗެމްޕިއަންކަން ހޯދައިފި އެވެ.

ރާއްޖޭގެ ކުރީގެ އެއް ވަނަ ފޯވާޑް އަދި މިހާރުގެ ޟަޖިލިސް މެންބަރު އަހުމަދު ތޯރިގް (ޓޮމް) ގެ މޮޅު ކުޅުމާއެކު 2001 ގެ ފަހުކޮޅު، 18 އަހަރުން ދަށުގެ އިންޓަ ސްކޫލް ޗެމްޕިއަންކަން އެ ސްކޫލަށް ކާމިޔާބު ކޮށްދިން ފަހުން، އެ މުބާރާތުގެ ތަށި އެ ސްކޫލަށް ލިބުނު ފުރަތަމަ ފަހަރެވެ. އެ ފަހަރުގެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކީ ވެސް ޓޮމް އެވެ. އެއީ އިންޓަ ސްކޫލްގެ ތަށި ސީއެޗްއެސްއީ އިން ހޯދި ފުރަތަމަ ފަހަރެވެ.

އޭގެ ފަހުން 2019 ގައި މުބާރާތް ކާމިޔާބު ކުރުމާ އެންމެ ގާތަށް ދިޔަ އެވެ. އެ އަހަރުގެ 18 އަހަރުން ދަށުގެ މުބާރާތުގެ ފައިނަލް ގައި ކުޅުނު ނަމަވެސް ވިލާ އިންޓަނޭޝަނަލް ހައި ސްކޫލް (ވީއަައިއެޗްއެސް) އަތުން ބަލިވީ 2-0 އިންނެވެ.

ގަލޮޅު ދަނޑުގައި މިއަދު ހަވީރު ކުޅުނު ފައިނަލް މެޗުގައި ސީއެޗްއެސްއީގެ ހަތަރު ލަނޑު ވެސް ފުރަތަމަ ހާފުގައި ވަނީ ކާމިޔާބު ކޮށްފަ އެވެ. މުހައްމަދު ފައިޒާން ފަޒީން ދެ ގޯލު ކާމިޔާބު ކޮށްދިން އިރު، އަހުމަދު ޔަޒީން މަހްދީ އާއި އަބްދުﷲ ޝާޔާން ވެސް ގޯލެއް ޖަހައިފައި ވެއެވެ.

ކެޔޮދޫ ސްކޫލްގެ ހަމައެކަނި ގޯލު ފަހު ހާފުގައި ޖަހައިދިނީ ދެވަނަ ހާފުގައި ކުޅެން ނުކުތް ޝާއިގް އާދަމް މުހައްމަދެވެ. ކައުންޓާ އެޓޭކްތަކުގައި އެޓީމުމަށް ގޯލު ޖަހަން ރަނގަޅު ފުރުސަތުތަކެއް ލިބުނު ނަމަވެސް ނިންމާނުލެވުނީ އެވެ.

ދެވަނަ ހާފުގައި ސީއެޗްއެސްއީ އަށް އިތުރު ގޯލުތަކެއް ނުދޭން ކެޔޮދޫ ސްކޫލް ޓީމުގެ ގޯލްކީޕަރު އިބްރާހިމް ޔަނާލް މުހައްމަދު ވަނީ މުހިއްމު ސޭވްތަކެއް ކޮށްފަ އެވެ. މީގެ އިތުރުން ޓީމުގެ ޑިފެންސުގައި ކެޕްޓަން ނާއިލް މުހައްމަދު ނަސީރު ވެސް ވަނީ މުހިއްމު ދައުރެއް އަދާ ކޮށްފަ އެވެ.

ފަސް ޓީމު ވާދަކުރި މުބާރާތުގެ ފައިނަލުން ކެޔޮދޫ ސްކޫލް ޖާގަ ހޯދީ ލީގު ބުރުގެ އެއްވެސް މެޗަކުން ބަލި ނުވެ، އެއްވަނަ ހޯދައިގެންނެވެ. ލީގު ބުރުގައި ކެޔޮދޫ ސްކޫލު ކުޅުނު ހަތަރު މެޗުގެ ތެރެއިން އެއްވަރު ވީ ވެސް ސީއެޗްއެސްއީ އާ ދެކޮޅަށް ކުޅުނު މެޗުން އެކަންޏެވެ. އެ މެޗު އެއްވަރުވީ 0-0 އިންނެވެ.

ސީއެޗްއެސްއީ ފައިނަލަށް ދަތުރުކުރީ ސެމީ ފައިނަލް މެޗުގައި ވީއަައިއެޗްއެސް ގެ މައްޗަށް ކުރި ހޯދައިގެންނެވެ. މި ތިން ޓީމުގެ އިތުރުން މުބާރާތުގައި ދެން ވާދަކުރީ އަހުމަދިއްޔާ އިންޓަނޭޝަނަލް ސްކޫލާއި އަލް މަދަރުސަތުލް އަރަބިއްޔަތުލް އިސްލާމިއްޔާ އެވެ.

މުބާރާތުގެ އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ އަހުމަދިއްޔާގެ މުހައްމަދު އައިހަމް އެވެ. އަދި އެންމެ މޮޅު ކުޅުންތރިއަކަށް ހޮވުނީ ސީއެޗްއެސްއީ ގެ ދައްޔާން އަހުމަދެވެ.

އެންމެ މޮޅު ކޯޗަކަށް ހޮވުނީ ސީއެޗްއެސްއީގެ ކޯޗު، އަހުމަދު ސުޒެއިރު (ކޮއްކޮ) އެވެ. ސުޒެއިރަކީ ދިވެހި ޕްރިމިއާ ލީގުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންގެ އެސިސްޓެންޓް ކޯޗެވެ. ފެއާޕްލޭ ޓީމަކަށް ހޮވުނީ ރަނަރަޕް ކެޔޮދޫ ސްކޫލެވެ.