މާލެ ސީއެޗްއެސްއީ ރަސްމީކޮށް ހުޅުވައިފި

މާލޭގައި ޒަމާންވަންދެން ހިންގި އޭ ލެވެލް ސްކޫލް، ސީއެޗްއެސްއީގެ އިމާރާތް، ރައީސް ޑރ. މުހައްމަދު މުއިއްޒު މިރޭ ހުޅުއްވައިދެއްވައިފި އެވެ.

އެ ސްކޫލު މިރޭ ރަސްމީކޮށް ހުޅުވިޔަސް، އެތަނުގައި މިދިޔަ ސެޕްޓެމްބަރު މަހުގެ ތެރޭގައި ވަނީ ކިޔަވައިދޭން ފަށައިފަ އެވެ.

ސްކޫލު ރަސްމީކޮށް ހުޅުވުމަށް ކުރިއަށް ގެންދިޔަ ރަސްމިއްޔާތުގައި އެ ސްކޫލުގެ ފަރާތުން ވަނީ އެހާރާއި މިހާރުގެ ހަނދާނީ ރަމްޒެއް ވެސް ރައީސަށް އަރުވައިފަ އެވެ.

އަމީނިއްޔާ ސްކޫލުގެ ފުރަގަހުގައި ހިންގަމުން އައި އިމާރާތް ބޭނުންކުރުން މިދިޔަ އޮގަސްޓް މަހު ހުއްޓާލުމަށް ފަހު، ސީއެޗްއެސްއީ ބަދަލުކުރީ ހުޅުމާލޭގައި އަލަށް ހެދި އިމާރާތަށެވެ.

އެކަމަކު މާލޭގައި ހުރި ސްކޫލްގައި އަލުން ކިޔަވައިދޭން ފަށަން އެޑިއުކޭޝަން މިނިސްޓްރީން ނިންމީ، މާލޭގައި އޭލެވެލަށް ކިޔަވައިދޭނެ ސަރުކާރުގެ ސްކޫލެއް ނެތުމުން އެ ކަމުގެ ދަތިކަން ގިނަ ދަރިވަރުންނަށާއި ބެލެނިވެރިންނަށް ފޯރާތީ އެވެ.

މިހާރު 400 އަށްވުރެ ގިނަ ދަރިވަރުން ކިޔަވަމުން އަންނަ އެ ސްކޫލުގެ ޕްރިންސިޕަލް އަބްދުﷲ ދީދީ ވިދާޅުވީ އެ ސްކޫލު ހުޅުވިގެން ދިއުމަކީ ބެލެނިވެރިންނާއި ދަރިވަރުންގެ ކަންބޮޑުވުންތައް ރައީސް އަޑު އެއްސެވި ކަމުގެ ހެއްކެއް ކަމަށެވެ.

މާލޭގައި މި އިމާރާތުގައި ކިޔަވައިދޭން އަލުން ފެށިޔަސް، ހުޅުމާލޭގައި ވެސް އޭލެވެލް އަށް ކިޔަވައިދޭން މިނިސްޓްރީން ވަނީ ނިންމައިފަ އެވެ.