ސިފައިންގެ އާއި ޕޮލިހަށް ވައްދާ ޕްރޮގްރާމުން މަގުމަތިވާ ކުދިން މަދުވެ، ޒުވާނުންތަކެއް ބިނާ ކުރެވޭނެ: މިނިސްޓަރު

ރަނގަޅު ނަތީޖާ ނުލިބޭ ދަރިވަރުން ސިފައިން އަދި ފުލުހުންގެ ހިދުމަތަށް ވަންނަން މަޖުބޫރުވާ ޕްރޮގްރާމުގެ ސަބަބުން ގައުމު އާރާސްތު ކުރުމަށް ގިނަ ޒުވާނުންތަކެއް ބިނާ ކުރެވޭނެ ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު މިރޭ ވިދާޅުވެއްޖެ އެވެ.

ރަނގަޅު ނަތީޖާ ނުލިބޭ ދަރިވަރުން 16 އަހަރުވުމުން ސިފައިންގެ އާއި ޕޮލިހަށް ވަންނަން މަޖުބޫރުވާ ޕްރޮގްރާމެއް ފެށުމުގެ ނިންމެވުން، ރައީސް ޑރ. މުހައްމަދު މުއިއްޒު އިއުލާން ކުރެއްވީ ނަސްރުގެ ދުވަސް ފާހަގަކުރަން ރޭ ބޭއްވި ރަސްމީ ޖަލްސާގަ އެވެ.

މާލެ ސީއެޗްއެސްއީ ރަސްމީކޮށް ހުޅުވުމަށް މިރޭ ބޭއްވި ރަސްމިއްޔާތުގައި، މިނިސްޓަރު ވިދާޅުވީ މީގެކުރިން އޭލެވަލް ކިޔަވަން ފަށަނީ އަހަރަކު 1،100 ދަރިވަރުން ކަމަށެވެ. ނަމަވެސް މި އަހަރު އޭލެވަލް ފެށި އިރު އެ އަދަދު 2،000 އާ ގާތްކުރާ އަދަކަކަށް އިތުރުވެފައިވާ ކަމަށް ޝަފީއު ވިދާޅުވި އެވެ.

އަދި ރާއްޖޭގެ ހުރިހާ ސްކޫލުތަކެއްގައި އޭލެވެލް ކިޔަވާ ދަރިވަރުންގެ އަދަދު މީގެ ކުރީ އަހަރުތަކަށްވުރެ އިތުރަށް 800 ދަރިވަރުން ކިޔެވުމުގެ ފުރުސަތު ފަހިކޮށްދެވިފައިވާ ކަމަށް ވެސް އިސްމާއިލް ވިދާޅުވި އެވެ.

"ނަތީޖާއަކަށް ވެގެންދާނީ ރައީސްގެ ޒައާމަތާ ހަވާލުވިއިރު ވިދާޅުވި ފަދައިން ފިކުރީ ގޮތުން ގައުމު ތަރައްގީ ކުރުމަށްޓަކައި ފިޔަވަޅުތަކެއް އެޅިގެން މި ދިޔައީ. އަދި ރޭގައި [ނޮވެމްބަރު 3 ޖަލްސާގައި] ވެސް ރައީސް ފާހަގަ ކުރެއްވި އޯލެވެލް ނިންމާ ދަރިވަރުންނަށް އޮލްޓަނޭޓިވް ޕާތްސް ތަކެއް ހޯދައިދެއްވާނެ ވާހަކަ،" މިނިސްޓަރު ވިދާޅުވި އެވެ.

"އޭގެ ސަބަބުން އޯލެވެލް ނިންމާ ދަރިވަރުންގެ ތެރެއިން މަގުމަތިވާ އަދަދު މަދުވެގެން ދާނެ. ޒުވާނުންގެ އުފެއްދުންތެރިކަން އިތުރު ވެގެންދާނެ. ގައުމު އާރާސްތު ކުރުމަށްޓަކައި ގިނަ ޒުވާނުންތަކެއް ބިނާވެގެން ދާނެ."

ރޭ ބޭއްވި ޖަލްސާގައި ރައީސް ވިދާޅުވީ އެ މަނިކުފާނު ބޭނުންފުޅުވާ ގޮތަށް ސިފައިންގެ މަސައްކަތްތައް ކުރިއަރުވަން އަދި ވެސް އިތުރު މީހުން ބޭނުންވާ ކަމަށެވެ.

ކުރިއަށް އޮތް ހަތަރު އަހަރުގެ ތެރޭގައި ސިފައިންގެއަށް ކޮންމެ އަހަރަކު 1،000 މީހުން އަދި ފުލުހުންގެ ހިދުމަތް ފުޅާކުރަން މި ދައުރުގެ ތެރޭގައި އިތުރު 1،000 ފުލުހުން ބޭނުންވާ ކަމަށާއި އެހެންވެ ރަނގަޅު ނަތީޖާ ނުލިބޭ ދަރިވަރުން 16 އަހަރުވުމުން ސިފައިންގެ އާއި ޕޮލިހަށް ވަންނަން މަޖުބޫރުވާ ޕްރޮގްރާމެއް ފަށަން ނިންމާފައިވާ ކަން ރައީސް އިއުލާން ކުރެއްވި އެވެ.

އެ ޕްރޮގްރާމަށް އަންނަ އަހަރުގެ ބަޖެޓުން ވަނީ 400 މިލިއަން ރުފިޔާ ކަނޑައަޅަން ނިންމައިފަ އެވެ. އެއަށްފަހު، ކޮންމެ އަހަރަކު ވެސް އެކަމަށް އެކަނި 400 މިލިއަން ރުފިޔާ އިތުރުކުރާނެ ކަމަށް ވިދާޅުވި އެވެ.