އެމްއޭސީއެލް މެރިޓް އެވޯޑު ސީއެޗްއެސްއީގެ ހަތަރު ދަރިވަރަކަށް

ސީއެޗްއެސްއީގެ ގްރޭޑް 11 ގެ އެންމެ މޮޅު 4 ދަރިވަރުންނަށް އެމްއޭސީއެލް އިން ދޭ މެރިޓް އެވޯޑް މިއަދު ހަވާލުކޮށްފި އެވެ.

މި އަހަރު މި އެވޯޑު ހާސިލްކުރީ ޔަޝާ ޝާފީ ޝަފީގާއި އަހުމަދު ރާއިފް ނަސީމާއި ނިޝްރާ ވަހީދު އަދި އަލީ މާއިޒް އެވެ. އެ ދަރިވަރުންނާ އެވޯޑު ހަވާލު ކޮށްދެއްވީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު އެވެ.

އެ ރަސްމިއްޔާތުގައި ސީއެޗްއެސްއީ-ހުޅުމާލޭގެ ޕްރިންސިޕަލް ޒުހުދުލް ހައްގު ވިދާޅުވީ، އެ އެވޯޑުގެ ސަބަބުން ދަރިވަރުންގެ މެދުގައި ކިޔެވުމުގެ ރޫހު އިތުރުވެ، ދަރިވަރުންގެ މެދުގައި ވާދަވެރިކަން އިތުރުވެފައިވާ ކަމަށެވެ.

"މި އެވޯޑު ތައާރަފްކުރި ފަހުން ސްކޫލުގެ ވާދަވެރިކަން ވަނީ އިތުރުވެފައި. އެމްއޭސީއެލް އެވޯޑު ހޯދަން ދަރިވަރުން އަމާޒު ހިފައިގެން އިތުރަށް މަސައްކަތް ކުރާކަން ވެސް ފާހަގަވޭ." އޭނާ ވިދާޅުވި އެވެ.

މިއަދުގެ ރަސްމިއްޔާތުގައި އެމްއޭސީއެލްގެ އެމްޑީ ޝަރީފް ވިދާޅުވީ، އެ ކުންފުނިން އެއާޕޯޓު ހިންގުމުގެ އިތުރުން މުޖުތަމައަށް ފައިދާ ހުރި ގިނަ މަސައްކަތްތަކެއް ކުރުމަށް މަސައްކަތް ކުރަމުން އަންނަ ކަމަށެވެ. އިޖުތިމާއީ ޒިންމާގެ މަސައްކަތްތައް ވަރަށް ސީރިއަސްކޮށް ނަގައި، ސީއެސްއާރު ޕްރޮގުރާމުގެ ދަށުން މީހުން ބިނާކުރުމަށް ހިތްވަރުދޭ މަސައްކަތްތަކާއި ތިމާވެއްޓާއި މުޖުތަމައަށް ފައިދާ ކުރާނެ މަސައްކަތްތަކުގައި ބައިވެރިވާ ކަމަށް ވިދާޅުވި އެވެ.

ޝަރީފު ވިދާޅުވީ، އެމްއޭސީއެލް އިން ސީއެޗްއެސްއީގެ ދަރިވަރުންނަށް ހާއްސަ އެވޯޑެއް ތައާރަފުކުރީ ވެސް އެހެންވެ ކަމަށެވެ.

"އަޅުގަނޑުމެންގެ ކުންފުންޏަކީ ރަނގަޅު ގިނަ ވަޒީފާގެ ފުރުސަތުތައް ހުރި ތަނެއް. އަޅުގަނޑުމެން މި މަސައްކަތް ކުރަނީ ވަޒީފާގެ މައިދާނަށް ނުކުންނާނެ ރަނގަޅު ކުދިންތަކެއް ބިނާ ކުރަން،" ޝަރީފު ވިދާޅުވި އެވެ.

އެމްއޭސީއެލް މެރިޓް އެވޯޑު ތައާރަފުކުރީ މިދިޔަ އަހަރެވެ. ކޮންމެ އަހަރަކު ވެސް އެ އެވޯޑު އެ ކުންފުނިން ދެނީ ސީއެޗްއެސްއީގެ ގްރޭޑް 11 ގެ އެންމެ މޮޅު ހަތަރު ދަރިވަރަކަށެވެ.