އެމްއޭސީއެލްގެ އެހީގައި ހުރަވީ ސްކޫލްގައި "ހުނަރު ވެހި" ހުޅުވައިފި

އެމްއޭސީއެލްގެ އެހީގައި ހުޅުމާލޭގައި ހުންނަ ހުރަވީ ސްކޫލުގައި ތަރައްގީކުރި ވޮކޭޝަނަލް ހަބް، "ހުނަރު ވެހި" ހުޅުވައިފި އެވެ.

މި ތަން ހުޅުވައިދެއްވީ އެޑިއުކޭޝަން މިނިސްޓަރު އިސްމާއިލް ޝަފީއު އާއި އެމްއޭސީއެލްގެ ސީއީއޯ އަދި އެމްޑީ އިބްރާހިމް ޝަރީފް މުހައްމަދު އެވެ. މި ތަނަކީ އެ ކުންފުނީގެ އިޖުތިމާއީ ޒިންމާ ޕްރޮގުރާމުގެ ދަށުން ހުޅުވި ތަނެކެވެ.

ރާއްޖޭގެ ތައުލީމީ ނިޒާމް ކުރިއެރުވުމަށާއި އުފެއްދުންތެރި އަދި ބިނާކުރަނިވި ތަމްރީނުތައް ދަރިވަރުންނަށް އުގަންނައި ދިނުމަށް މަގުފަހިކޮށްދިނުމުގެ ގޮތުން ހުޅުވި ތަނެއް ކަމަށް އެ ކުންފުނިން ފާހަގަކުރެ އެވެ.

އެމްއޭސީއެލްއިން ތަރައްގީ ކުރި "ހުނަރު ވެއްސަށް" ބޭނުންވާ ވާޑާންކުރުމުގެ ސަމާނާއި، ކަރަންޓާއި ވައިރިން އަދި ވެލްޑިން ކުރުމަށް ބޭނުންވާ ސާމާނުގެ އިތުރުން ދަރިވަރުންނަށް ފަހަން ދަސްކޮށްދިނުމަށް ބޭނުންވާ ސާމާނުތައް އެ ކުންފުނިން ވަނީ ހަދިޔާކޮށްފައެވެ. އަދި އެ ތަން ތަރައްގީކުރި އިމާރާތް މަރާމާތުކުރުމުގެ މަސައްކަތައް ބޭނުންވާ ތަކެއްޗާއި އެހީތެރިކަން ވެސް އެ ކުންފުނިން ފޯރުކޮށްދިނެވެ.

"ހުނަރު ވެހި" ހުޅުވައިދެއްވުމަށް ފަހު އެމްއޭސީއެލްގެ ސީއީއޯ އަދި އެމްޑީ އިބްރާހިމް ޝަރީފް މުހައްމަދު ވިދާޅުވީ އެ ކުންފުނީގެ އިޖުތިމާއީ ޒިންމާގެ ދަށުން މުހިންމު ގިނަ މަސައްކަތްތަކެއް ކުރަން ރާވާފައިވާ ކަމަށެވެ. އަދި އެ ކުންފުނީގެ އިޖުތިމާއީ ޒިންމާގެ ދަށުން ހުޅުވި "ހުނަރު ވެއްސަކީ" ވަޒީފާގެ ބާޒާރަށް ބޭނުންވާ ހުނަރުވެރި ދަރިވަރުންތަކެއް އުފެދިގެންދާނެ ތަނަކަށް ވާނެ ކަމަށް އުއްމީދުކުރައްވާ ކަމަށް ވެސް ވިދާޅުވި އެވެ.

އެ ރަސްމިއްޔާތުގައި ޝަރީފު ވަނީ ސްކޫލް ނިންމާ ދަރިވަރުންނަށް އަމާޒުކޮށްގެން އިންޓާންޝިޕް ޕްރޮގްރާމެއް އެ ކުންފުނިން ފެށުމަށް ހަމަޖެހިފައިވާކަން އިއުލާނުކޮށްފަ އެވެ.

އެ ރަސްމިއްޔާތުގައި އެޑިއުކޭޝަން މިނިސްޓަރު އިސްމާއިލް ޝަފީއު ވަނީ ހުރަވީ ސުކޫލުގައި ގާއިމުކުރި ފަދަ ހުނަރު ދަސްކޮށްދޭ ޕްރޮގްރާމްތަކެއް އެހެން ސްކޫލްތަކުގައި ވެސް ފެށުމަށް ހިތްވަރު ދެއްވައިފަ އެވެ.

އެ ރަސްމިއްޔާތުގައި ހުރަވީ ސްކޫލުގެ ޕްރިންސިޕަލް އަބްދުﷲ ރަޝީދު ވިދާޅުވީ ހުރަވީ ސްކޫލުގެ އަމާޒަކީ އެ ސްކޫލުގެ ދަރިވަރުންނަކީ ތައުލީމީ ގޮތުންނާއި މަސައްކަތްތެރިކަމާއި ހުނަރުވެރިކަމުގެ ގޮތުން ގާބިލު ބަޔަކަށް ހެދުމަށް މަސައްކަތްކުރުން ކަމަށެވެ. "ހުނަރު ވެހި" ހުޅުވުމަށް ބޭއްވި ރަސްމިއްޔާތުގައި ހުނަރު ދަސްކޮށްދިނުމަށް ގާއިމުކުރި އެ ސްކޫލުގެ "ދަސްވެށި" އަދި ލެޝާ ރޫމެއްގެ ގޮތުގައި ގާއިމުކޮށްފައިވާ "މަރިޔާދު" ވެސް ވަނީ ހުޅުވައިފަ އެވެ.