ރާއްޖޭގައި ފުރަތަމަ ފަހަރަށް އޭ ލެވެލްގައި މެރިން ސައިންސް ކިޔަވައިދޭން ފަށައިފި

ރާއްޖޭގައި ފުރަތަމަ ފަހަރަށް އޭ ލެވެލްގައި މެރިން ސައިންސް މާއްދާ ކިޔަވައިދޭން ފަށައިފި އެވެ.

ސެންޓަ ފޯ ހަޔާ އެޑިއުކޭޝަން (ސީއެޗްއެސްއީ)ގައި މިދިޔަ ސެޕްޓެމްބަރުގައި އޭ ލެވެލް ފެށިއިރު އެ މާއްދާ ކިޔަވައިދޭން ފެށި ނަމަވެސް ރަސްމީކޮށް އެކަން ފާހަގަ ކުރީ އިއްޔެ އެވެ.

އޭ ލެވެލްގައި އެ މާއްދާ ކިޔަވައިދޭ ހަމައެކަނި ސްކޫލަކީ ސީއެޗްއެސްއީ އެވެ.

މާލެ ސީއެޗްއެސްއީގައި މެރިން ސައިންސް ކިޔަވައިދޭން ފެށުން ފާހަގަކުރީ، މޯލްޑިވްސް މެރިން ރިސާޗު އިންސްޓިޓިއުޓުގެ މެރިން ބަޔޮލޮޖިސްޓް އަދި ގައުމީ ޔުނިވާސިޓީގެ ކޮލެޖް އޮފް ފިޝަރީޒް އެންޑް އޯޝަން ސައިންސްގެ ޑީން ޑރ. އަހުމަދު ރިޔާޒް ޖައުހަރީ އެވެ.

މާލެ ސީއެޗްއެސްއީގެ ޕްރިންސިޕަލް އަބްދުﷲ ދީދީ ވިދާޅުވީ އެ ސްކޫލުގައި 14 ދަރިވަރުން އެ މާއްދާ ކިޔަވަން ފަށާފައިވާ ކަމަށެވެ. އެނގިފައިވާ ގޮތުގައި ހުޅުމާލެ ސްކޫލުގައި ހަތް ދަރިވަރުން މެރިން ސައިންސް ކިޔަވަ އެވެ.

ރާއްޖޭގައި ފިޝަރީ ސައިންސް ކިޔަވައިދޭން ފެށީ 1984ގައި މަޖީދިއްޔާ އާއި އަމީނިއްޔާ ސްކޫލުގަ އެވެ. އެ މާއްދާ އިން ފުރަތަމަ ފަހަރަށް އޯ ލެވެލް އިމްތިހާން ހެދީ 1987 ގަ އެވެ.

ރާއްޖޭގައި މެރިން ސައިންސް ކިޔަވައިދޭން މި ފެށީ އޯ ލެވެލްގައި ފިޝަރީޒް ސައިންސް ކިޔަވައިދޭން ފެށިތާ 40 އަހަރަށް ފަހު އެވެ.

ސީއެޗްއެސްއީގައި މެރިން ސައިންސް ފެށިއިރު، މެރިން ބަޔޮލޮޖީ އާއި ޓްރެވަލް އެންޑް ޓޫރިޒަމާއި ސައިކޮލޮޖީގެ އިތުރުން ކޮމްޕިއުޓާ ސައިންސް ވެސް ވަނީ އަލަށް ކިޔަވައިދޭން ފަށައިފަ އެވެ.