ފަގީރުންގެ ގޮތުގައި ރަޖިސްޓަރީވާން ހުޅުވާލައިފި

މާލެ ސަރަހައްދުން ފަގީރުންގެ ގޮތުގައި ރަޖިސްޓަރީ ކުރަން ބޭނުންވާ މީހުންނަށް އެ ފުރުސަތު ހުޅުވާލައިފި އެވެ.

އިސްލާމިކް މިނިސްޓްރީން ކުރި އިއުލާނެއްގައި ބުނީ ފަގީރުންގެ ދަފްތަރުގައި އަލަށް ރަޖިސްޓަރީވާން ބޭނުންވާ މީހުންނަށް އެ ފުރުސަތު ހުޅުވާލާފައި ވަނީ މި މަހުގެ 22 އިން ފެށިގެން އަންނަ ޖެނުއަރީ 19 ވަނަ ދުވަހުގެ ނިޔަލަށް ކަމަށެވެ. އެ މުއްދަތުގެ ތެރޭގައި ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރު 12:00 އާ ދެމެދު މިނިސްޓްރީއަށް ފޯމު ހުށަހެޅޭނެ އެވެ.

މިނިސްޓްރީން ހުޅުވާލާފައި ވަނީ ހަމައެކަނި މާލެ އާއި ވިލިމާލެ އަދި ހުޅުމާލެ އިން ފަގީރުންގެ ގޮތުގައި ރަޖިސްޓަރީ ވާން އެދޭ މީހުންނަށެވެ.

މިނިސްޓްރީން ބުނި ގޮތުގައި މި އަހަރު މުދަލު ޒަކާތުގެ ފައިސާ ލިބިފައިވާ މީހުންގެ ތެރެއިން ހާލަތު ބަދަލުވުމުގެ ސަބަބުން ދަފުތަރުން އުނިވެފައިވާކަން އަންގާފައި ނެތް މީހުންނަކީ މިވަގުތު ވެސް ފަގީރުންގެ ދަފްތަރުގައި ތިބި މީހުންނެވެ. އެހެންވެ، އެ މީހުން އަލުން ރަޖިސްޓަރީ ވާން ނުޖެހޭނެ އެވެ. އެކަމަކު އެ އާއިލާތަކުގައި ވެސް އަންނަ މަހުގެ 19 އަށް 18 އަހަރު ފުރޭ ކުއްޖަކު ހުރި ނަމަ ނުވަތަ 65 އަހަރު ފުރޭ މީހަކު ހުރި ނަމަ އަލުން ފޯމު ހުށަހަޅަން ޖެހޭނެ ކަމަށް މިނިސްޓްރީގެ އިއުލާނުގައިވެ އެވެ.

މި އަހަރަަށް މިނިސްޓްރީން އެކުލަވާލި ފަގީރުންގެ ދަފްތަރުގައި ހިމެނެނީ 9،041 މީހެކެވެ. އޭގެ ތެރޭގައި ހިމެނެނީ މާލެއިން 1،796 މީހަކާއި ރަށްރަށުން 7،245 މީހެކެވެ. އެއީ މިދިޔަ އަހަރާ އަޅާ ބަލާއިރު 2،473 މީހުންގެ މަދުވުމެކެވެ.

ފަގީރުންގެ ދަފްތަރުގައި ޖެހުނު މީހުންގެ އަދަދު މިދިޔަ އަހަރު މަތިވީ ކޮވިޑްގެ ބަލިމަޑުކަމުގައި އަތްމަތި ދަތިވި މީހުންގެ އިތުރުވުމުންނެވެ.