ފޮތް ލިޔުމާއި ރިސާޗު ހަދަން އެމްއެންޔޫ އިން 1.7 މިލިއަން ރުފިޔާގެ އެހީ ދޫކޮށްފި

ފޮތް ލިޔުމާއި ރިސާޗު ހަދަން މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) އިން 1.7 މިލިއަން ރުފިޔާގެ ގްރާންޓު ދޫކޮށްފި އެވެ.

އެ ޔުނިވާސިޓީގައި މިއަދު ބޭއްވި ރަސްމިއްޔާތެއްގައި 8 މީހަކަށް ތަފާތު 8 ދާއިރާއަކުން ފޮތް ލިޔުމާއި ރިސާޗު ހަދަން އެހީ ދޫކުރި އެވެ. އޭގެ ތެރޭގައި ހިމެނެނީ ފޮތް ލިޔުމަށް ދޫކުރި ހަތަރެއް އަދި ރިސާޗު ހަދަން ދޫކުރި ހަތަރު ގްރާންޓެވެ.

އެމްއެންޔޫ އިން ބުނީ، ފޮތް ލިޔަން ހުށަހެޅި ހަތަރު ޕްރޮޕޯސަލް މުރާޖައާ ކުރުމަށް ފަހު، އެ މީހުންނަށް 183،000ރ. "ބުކް ރައިޓިން ގްރާންޓް" ގެ ގޮތުގައި ދޫކޮށްފައިވާ ކަމަށެވެ.

ރިސާޗު ކުރުމަށް ފަސް ފަރާތަކުން ޕްރޮޕޯސަލް ހުށަހެޅި ނަމަވެސް ގްރާންޓް ދޫކުރީ ހަތަރު މީހަކަށެވެ. ރިސާޗް ގްރާންޓުގެ ގޮތުގައި 1.5 މިލިއަން ރުފިޔާ ދޫކޮށްފައިވެ އެވެ.

އެމްއެންޔޫގެ ޑެޕިއުޓީ ވައިސް ޗާންސެލަރު ޑރ. އައިޝަތު ޝެހެނާޒް ވިދާޅުވީ ފޮތް ލިޔުމަށް އެހީ ދިނުމުގެ މަގްސަދަކީ ލިޔުންތެރިކަން ކުރިއަރުވައި އެ ޔުނިވާސިޓީގެ މުވައްޒަފުންނާއި ދަރިވަރުންގެ މެދުގައި ފޮތްތެރިކަން އާލާކުރުން ކަމަށެވެ.

ރިސާޗު ހެދުމަށް އެހީ ދިނުމުގެ ބޭނުމަކީ އޭނާ ވިދާޅުވި ގޮތުގައި، ޔުނިވާސިޓީ ކޮމިއުނިޓީގައި ދަރިވަރުންނާއި މުވައްޒަފުން ރިސާޗް ކުރުމަށް ހިތްވަރުދީ، ރިސާޗް ކުރުމުގެ ސަގާފަތެއް އަށަގެންނެވުމެވެ.

"ޔުނިވަސިޓީގެ މިޝަންއާ އެއްގޮތަށް އިލްމު އުފައްދައި ފެތުރުމަކީ ވެސް ގްރާންޓް ދިނުމުގެ އެންމެ މުހިންމު އެއް މަގްސަދު،" ޝެހެނާޒް ވިދާޅުވި އެވެ.

ކުރިއަށް އޮތް ބުރުގައި ރިސާޗް އަދި ފޮތް ލިޔުމުގެ އެހީއަށް އެދި ހުށަހެޅުމުގެ ފުރުސަތު ވެސް އެމްއެންޔޫ އިން މިއަދު ހުޅުވައިލި އެވެ.