ފުލުހުންގެ ފްލެޓުތައް މި އަހަރަށް ނުނިންމޭނެ: ހައުސިން މިނިސްޓްރީ

ހުޅުމާލެ 1 ގައި މީގެ ނުވަ އަހަރު ކުރިން އިމާރާތްކުރަން ފެށި ފުލުހުންގެ ފްލެޓުތައް މި އަހަރު ނިންމަން މި ސަރުކާރުން ކުރިން ކަނޑައެޅިޔަސް އެ ތާރީހަށް ދެން އެ ކަން ނުކުރެވޭނެ ކަމަށް ހައުސިން މިނިސްޓްރީން މިއަދު ބުނެފި އެވެ.

ފުލުހުންގެ ފްލެޓްތައް ހަދަން 2013 ގައި އަދި ސިފައިންގެ ފްލެޓްތައް އޭގެ އަހަރެއްހާ ދުވަސް ފަހުން ހަވާލުކުރީ ރާއްޖޭގައި އަގު ބޮޑު މަޝްރޫއުތަކެއް ހިންގި ނޫމަޑި ކުންފުންޏަށެވެ. އެ ކުންފުންޏަށް އެކަން ނުވުމުން އެއްބަސްވުން ބާތިލްކުރީ އެވެ.

ފަހުން އެ މަޝްރޫއު ހިންގީ އައިލެންޑް އެކްސްޕާޓް ނަމަކަށް ކިޔާ ކުންފުންޏަކުންނެވެ. އެކަމަކު ކޮވިޑާ އެކު ކުންފުނި ބަނގުރޫޓުވެ، އެ ކުންފުނި ވެސް މިދިޔަ އަހަރު އެ ދެ މަޝްރޫއުން ވަކިވި އެވެ.

ސިފައިންގެ ފްލެޓްތައް އަހަރެއްހާ ދުވަހުގެ ތެރޭގައި ނިންމަން ހަވާލުކުރީ ޗައިނާގެ "ދަ ޓްވެންޓީ ތާޑް މެޓަލުޖިކަލް ކޮންސްޓްރަކްޝަން ގްރޫޕް"އާ އެވެ. ހުޅުމާލޭގައި އިމާރާތްކުރާ 330 ފްލެޓުގެ އެ މަސައްކަތް އަންނަ އަހަރުގެ ފުރަތަމަ ތިން މަހުުގެ ތެރޭގައި ނިމޭނެ ކަަމަށް އޮތީ ލަފާކޮށްފަ އެވެ.

ފުލުހުންގެ ފްލެޓުތައް ނިންމަން ސަރުކާރުން މިދިޔަ އަހަރު އަމިން ކޮންސްޓްރަކްޝަނަށް ހަވާލުކުރީ 275 މިލިއަން ރުފިޔާއަށެވެ. އެ އެއްބަސްވުމުގައި ވާ ގޮތުން މިދިޔަ ސެޕްޓެމްބަރު 20 ގައި ފްލެޓުތައް ނިންމަންޖެހެ އެވެ.

އެކަމަކު، މުއްދަތު ހަމަވިއިރު ވެސް އެ މަސައްކަތް ނުނިމުމުން، ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އޭރު ވިދާޅުވީ މި އަހަރު ނިމުމުގެ ކުރިން ފިނިޝިން އެއްކޮށް ނިންމައިލެވޭނެ ކަމަށެވެ. އެކަމަކު، އޭނާ "މިހާރު" އަށް މިއަދު ވިދާޅުވީ، ތަކެތި ލިބުމުގެ ދަތިތަކާ ހެދި މި އަހަރުގެ ތެރޭގައި އެ މަސައްކަތް ނުނިންމޭނެ ކަމަށެވެ.

އެ ފްލެޓުތައް ނިންމޭނެ ކަމަށް މިހާރު ލަފާކުރަނީ އަންނަ އަހަރުގެ ފެބްރުއަރީ-މާޗު ހިސާބުގަ އެވެ.

"އަންނަ އަހަރުގެ ފެބްރުއަރީ ނުވަތަ މާޗު ހިސާބުގައި އެ ފްލެޓްތައް ނިންމޭނެކަން މިހާރު ވަރަށް ޔަގީން،" އަކްރަމް ވިދާޅުވި އެވެ.

ފުލުހުންގެ ފްލެޓްތައް ލިބޭނެ 361 ފުލުހުން 2013 ގައި ވަނީ ކަނޑައަޅައިފަ އެވެ. ބައެއް މީހުން ވަނީ ޑައުންޕޭމަންޓް ވެސް ދައްކައިފަ އެވެ. ދެ އަހަރުގެ ތެރޭގައި ދިރިއުޅެވޭނެ ކަމަށް ބުނި ފްލެޓްތައް ނުނިމި ދިގުލައިގެން ދާތީ ފުލުހުން ވަނީ އެކި ފަހަރު މަތިން ޝަކުވާކޮށްފަ އެވެ.

ފުލުހުންގެ ތިން ޓަވަރަށް 500 މިލިއަން ރުފިޔާ އަށް ވުރެ މަތީ އަދަދެއް ވަނީ ހޭދަކޮށްފަ އެވެ. ސިފައިންގެ ތިން ޓަވަރަށް 548 މިލިއަން ރުފިޔާ ވަނީ ހޭދަކޮށްފަ އެވެ.