ގިނަ އުންމީދުތަކަކާ އެކު ޖީ20ގެ މަހާސިންތާ ފަށައިފި

ބައިނަލްއަގުވާމީ މުޖްތަމައަށް މިވަގުތު ކުރިމަތިވެފައިވާ ބޮޑެތި މައްސަލަތަކަށް ހައްލު ހޯދުމުގެ އުންމީދާއެކު، އިގްތިސާދީ ގޮތުން އެންމެ ކުރިއަރާފައިވާ 20 ގައުމު (ޖީ20)ގެ އެންމެ އިސް ވެރިންގެ މަހާސިންތާ، އިންޑޮނީޝިޔާގެ ރިސޯޓް ރަށެއް ކަމަށްވާ ބާލީގައި މިއަދު ފަށައިފި އެވެ.

ދެ ދުވަހުގެ މުއްދަތަށް ބާއްވާ މި މަހާސިންތާގައި، އެންމެ ކުރިއަރާފައިވާ ގައުމުތަކުގެ ތެރެއިން ރަޝިޔާގެ ރައީސް ލަޑިމިއާ ޕުޓިން ފިޔަވައި، އެހެން ހުރިހާ ގައުމެއްގެ އެންމެ އިސް ވެރިން ބައިވެރިވެވަޑައިގަންނަވަ އެވެ. ރައީސް ޕުޓިންގެ ބަދަލުގައި މި މަހާސިންތާގައި ރަޝިޔާ ތަމްސީލު ކުރައްވާނީ އެ ގައުމުގެ ޚާރިޖީ ވަޒީރު ސަރްގޭ ލަވްރޯވް އެވެ.

މިފަހަރުގެ މަހާސިންތާގައި މައިގަނޑު ގޮތެއްގައި މަޝްވަރާ ކުރާނީ، ޔޫކްރޭން ހަނގުރާމަ އާއި އިގްތިސާދީ މައްސަލަތަކާއި ކާނާގެ ރައްކާތެރިކަމާއި ހަކަތައިގެ ބާވަތްތަކުގެ އަގުތައް އުފުލެމުންދާ މައްސަލައާ ބެހޭ ގޮތުންނެވެ. އޭގެ އިތުރުން ތިމާވެށި ހިމާޔަތްކުރުމުގެ މައްސަލަ އާއި ޔޫކްރޭން ހަނގުރާމައިގެ ސަބަބުންނާއި އުތުރު ކޮރެއާގެ އަސްކަރީ ހަރަކާތްތަކުގެ ސަބަބުން ބައިނަލްއަގުވާމީ ސުލްހަ އަށް އެޅިފައިވާ ހުރަސްތަކާ ބެހޭ ގޮތުން ވެސް، ގައުމުތަކުގެ އެންމެ އިސް ވެރިން މަޝްވަރާ ކުރައްވާނެ އެވެ.

މަހާސިންތާ ފެށުމުގެ ޖަލްސާގައި ވާހަކަ ދައްކަވަމުން އިންޑޮނީޝިޔާގެ ރައީސް ޖޯކޯ ވިދޯދޯ މިއަދު ވިދާޅުވީ، ޔޫކްރޭން ހަނގުރާމައިގައި ރަޝިޔާ ޒިންމާދާރުވާންޖެހޭ ކަމަށެވެ.

"ޒިންމާދާރު ވުމުގެ މާނައަކީ ހަނގުރާމަ ހުއްޓައިލުން. ހަނގުރާމަ ނުހުއްޓި ކުރިއަށް ދާ ނަމަ، ކުރިއަށް ފިޔަވަޅު އަޅަން ދުނިޔެއަށް ދަތިވާނެ. އަހަރެމެންނަކީ މި ދުނިޔެ ބައިބަޔަށް ބައިކުރާ ބަޔަކަށް ވެގެން ނުވާނެ. އެހެން ބޮޑު ހަނގުރާމައެއްގެ ތެރެއަށް މި ދުނިޔެ ވެއްޓެން އަހަރެމެން ދޫކޮށްލައިގެން ނުވާނެ."

މި މަހާސިންތާގެ ފުރަތަމަ ދުވަހުގެ ނޫސް ކޮންފަރެންސްގައި ވާހަކަ ދައްކަވަމުން ޔޫރަޕިއަން ކައުންސިލްގެ ރައީސް ޗާލްސް މިޝޭލް ވިދާޅުވީ، މި މަހާސިންތާގެ އެއް ބޭނުމަކީ، ޔޫކްރޭނާ ދެކޮޅަށް ކުރަމުންދާ ހަނގުރާމަ ހުއްޓައިލުމަށް ރަޝިޔާ އަށް ބާރު އެޅުމެވެ. އަދި މި މަހާސިންތާގައި ރަޝިޔާ ތަމްސީލު ކުރައްވާ އެ ގައުމުގެ ޚާރިޖީ ވަޒީރު ސަރްގޭ ލަވްރޯވްއާ ބައްދަލުކުރެއްވުމުގެ ވިސްނުމެއް ނެތް ކަމަށް ވެސް އޭނާ ވިދާޅުވި އެވެ.

"އަހަރެމެން މަސައްކަތް ކުރަންވީ، ހަނގުރާމަ ހުއްޓައިލުމަށް ރަޝިޔާ އަށް ފިއްތުންތައް ކުރިމަތިކުރުމަށް، ޖީ20ގެ ބޭނުން ހިފުމަށް ދުނިޔޭގެ ގައުމުތަކަށް ވިސްނައިދީ އެކަން ގަބޫލު ކުރުވުމަށް،" ޔޫރަޕިއަން ކައުންސިލްގެ ރައީސް ޗާލްސް މިޝޭލް ވިދާޅުވި އެވެ.

އިންޑޮނީޝިޔާއަކީ ޖީ20 ގައި ހިމެނޭ، އިރު-ދެކުނު އޭޝިޔާގެ ހަމައެކަނި ގައުމެވެ. އަދި މިއީ އެ ގައުމުގައި ޖީ20ގެ މަހާސިންތާ ބާއްވާ ފުރަތަމަ ފަހަރުވެސްމެ އެވެ. މިއަހަރުގެ ޑިސެމްބަރު މަހުގެ ފުރަތަމަ ދުވަހުން ފެށިގެން، ޖީ20ގެ ރިއާސަތާ ހަވާލުވާނީ އިންޑިއާ އެވެ. މިއަންނަ އަހަރު އޮންނަ ޖީ20ގެ މަހާސިންތާ ބާއްވާނީ އިންޑިއާގަ އެވެ.

މުޅި ދުނިޔޭގައި ހިނގާ އިގްތިސާދީ ހަރަކާތްތަކުގެ 80 ޕަސެންޓް ހިއްސާ ކުރަނީ ޖީ20ގެ ގައުމުތަކެވެ. އަދި ދުނިޔޭގެ އާބާދީގެ ތިން ބައިކުޅަ ދެ ބައި ދިރިއުޅެނީ ޖީ20ގެ ގައުމުތަކުގަ އެވެ.

އެމެރިކާގެ ރައީސް ޖޯ ބައިޑެން އާއި ޗައިނާގެ ރައީސް ޝީ ޖިންޕިންގް އާއި އިނގިރޭސި ބޮޑުވަޒީރު ރިޝީ ސުނަކް އާއި ފަރަންސޭސި ރައީސް އިމަނުއެލް މެކްރޯން އާއި ޖަރުމަންގެ މުސްތަޝާރު އޮލާފް ޝޯލްޒް ވެސް މިހާރު ހުންނެވީ ޖީ20ގެ މަހާސިންތާގައި ބައިވެރިވެވަޑައިގަތުމަށް ބާލީގަ އެވެ. އޭގެ އިތުރުން އިންޑިއާގެ ބޮޑުވަޒީރު ނަރެންދުރަ މޯދީ އާއި ސައޫދީ އަރަބިއްޔާގެ ބޮޑުވަޒީރު އަދި ވަލީ އަހުދު މުހައްމަދު ބިން ސަލްމާން އާއި ޖަޕާނުގެ ބޮޑުވަޒީރު ފުމިއޯ ކިޝީޑާ އާއި ތުރުކީގެ ރައީސް ރަޖަބު ތައްޔިބު އުރުދުޣާން ވެސް ހުންނެވީ ބާލީގަ އެވެ.