ނަޝްވާގެ ކުއްލި ވަކިވުން؛ "އަމިއްލަ ދަރިއެއް ބީވިފަދަ"

"ނަޝްވާގެ މަންމަ ފުރަން އެއާޕޯޓަށް ދަމުން ގުޅައިފަ ބުނީ ނަޝްވާ ނިޔާވެއްޖެއޭ. އެހެން ބުނި ވަގުތު ވެސް އަޅުގަނޑަށް ހީވީ އަމިއްލަ ދަރިއެއް ގެއްލިގެން ދިޔަހެން. ގަބޫލު ވެސް ނުކުރެވުނު."

ކ. މާފުށި މޯލްޑިވްސް ކަރެކްޝަނަލް ސާވިސްގެ ތަމްރީނެއްގައި އުޅެނިކޮށް މިދިޔަ ބުދަ ދުވަހު ނިޔާވި އައިމިނަތު ނަޝްވާ ނަސީމް، 18، އަކީ ފެށުނީއްސުރެ ސްކޫލުގެ ހުރިހާ ހަރަކާތެއްގައި އިސްކޮށް އުޅޭ ދަރިވަރެކެވެ.

ނަޝްވާގެ ކުއްލި ވަކިވުމުން އެންމެ ބޮޑު ޝޮކެއް ލިބުނީ އާއިލާގެ އިތުރުން، އައްޑޫ ހިތަދޫ ސްކޫލަށެވެ. ހާއްސަކޮށް ނަޝްވާއާ އެކު ގިނަ ވަގުތުތައް ސްކޫލުގައި ހޭދަކުރި ޓީޗަރުންނަށެވެ.

އޭގެ ތެރެއިން އެކަކަކީ ކެޑޭޓް ބޭންޑް އިންސްޓްރަކްޓާ މުހައްމަދު ހާފިޒެވެ.

"ނަޝްވާ އަސްލު ބޭނުންވީ އެމްއެންޑީއެފަށް ވަންނަން. ނަމަވެސް މިހާރު އެމްއެންޑީއެފްގެ ބެޗެއް ނަގައިގެން ޓްރެއިނިންގެ ކުރިއަށް ދަނީ. ނަޝްވާ އަށް ފުރުސަތު ނުލިބުން. ދެން ކަރެކްޝަނުން ހުޅުވާލީމަ އެ ޖޮއިން ކުރީ،" ހާފިޒް ބުންޏެވެ.

އެމްއެންޑީއެފަށް ވަންނަން ބޭނުންވި ނަމަވެސް ފުރުސަތު ނުލިބުމުން ނަޝްވާ ނިންމީ ކަރެކްޝަން އޮފިސަރަކަށް ވުމަށެވެ.

"ކަރެކްޝަނަށް ޖޮއިން ކުރުމުގެ ކުރިން އަޅުގަނޑު ކައިރީ އަހާލި. ސާ އޭ މި ޓްރެއިނިންގެ ބައިވެރިވާން ކިހިނެއް ވާނެ ހެއްޔޭ؟. އަޅުގަނޑު ބުނިން ތިއީ ވަރަށް ޖެލެންޖިން ދާއިރާއެކޭ. އެކަމަށް ރެޑީ ހެއްޔޭ؟" ވިސްނާލައިފަ ހޯދާ ބަލައްޗޭ، މައުލޫމާތު ރަނގަޅަށް ހޯދައްޗޭ ތިކަމަށް ދިއުމުގެ ކުރިން. ދެން ދުވަސްކޮޅަކުން އަޅުގަނޑަށް ގުޅައިފައި ބުނެފި އޯކޭއޭ ދާނަމޭ ޓްރެއިނިން އަށް، އެކަމަށް ރެޑީއޭ،" އޭނާ ބުންޏެވެ.

މީގެ ދެ އަހަރު ކުރިން، 2019ގައި ސްކޫލު ނިންމި ނަމަވެސް ސްކޫލުގައި އުޅުނު ދުވަސްވަރާއި ސްކޫލު ނިންމާ ކަރެކްޝަންގެ ޓްރެއިނިން އަށް އައުމާ ދެމެެދު ވީ ދުވަސްތަކުގައި ވެސް ނަޝްވާ އުޅުނީ ކެޑޭޓުގެ ކަންކަމުގައި ކަމަށް ހަފީޒު ކިޔައިދިނެވެ.

އިސް ދަރިވަރެއްގެ ވަކިވުން؛ ސްކޫލު ހިތާމައިގައި

ސީނިއާ ކެޑޭޓެއްގެ ގޮތުގަައި މަސައްކަތް ކުރި ނަޝްވާގެ މިޒާޖު ސިފަކުރި، އޭނާ އަށް ކިޔަވައިދިން ކޮންމެ ޓީޗަރަކު ވެސް ބުނަަނީ އެއީ ހިތްހެޔޮ އެހެން މީހުންނާ ގުޅޭ ކުއްޖެއް ކަމަށެވެ. ސްކޫލުން ކުރާ ކޮންމެ ކަމެއްގައި ވެސް އިސްކޮށް ހަރަކާތްތެރިވާ ނަޝްވާ އަކީ އަބަދުވެސް އެހެން މީހުންނަށް އެހީވުމަށް ބޭނުންވެފައި ހުންނަ މިޒާޖެއްގެ ކުއްޖެއް ކަމަށެވެ.

"އެހެން ކުދިންނާ ވަރަށް ތަފާތު ވާނެ ނަޝްވާ. ކަންކަން ހަވާލު ކުރުމާ ކަންކަން މެނޭޖް ކުރުމުގައި ސީނިއާ ކުދިން ވަރަށް ގެންގުޅޭނެ. ސްކޫލު ނިންމައިފައި ވެސް ކެޑޭޓް ކަންކަމުގައި ކުދިންނާ އެއްކޮށް އުޅުނީ، އެހީތެރިވާނެ ހުރިހާ ކުދިންނަށް ވެސް. ހުރިހާ މަސައްކަތެއްގައި ވެސް ބައިވެރިވާނެ،" ނަޝްވާގެ ކެޑޭޓް ޓީޗަރު ހާފިޒު ބުންޏެވެ.

ނަޝްވާ ވަކިވުން ވީ މުޅި ހިތަދޫ ސްކޫލަށް ވެސް ލިބުނު ގަބޫލު ކުރަން ދަތި ހަބަރަކަަށެވެ. ފެށުނީއްސުރެ ހިތަދޫ ސްކޫލުގައި ކިޔެވި ދަރިވަރަކަށް ވުމާއި ސްކޫލުގެ ޓީޗަރުންނާ ކައިރީގައި އުޅެ، ޓީޗަރުންގެ ލޯތްބާއި އިހުތިރާމު ހޯދާފައިވާ ދަރިވަރަކަށް ވާތީ އެވެ.