އަބްދުﷲ ރަޝީދުގެ ޕޯސްޓްމޯޓަމް ހެދުން ހުއްޓުވުމުގެ އަމުރެއް ކޯޓުން ނުދިން

ފުލުހުންގެ ބެލުމުގެ ދަށުގައި ހުއްޓާ މަރުވި އަބްދުﷲ ރަޝީދުގެ ހަށިގަނޑުގެ ޕޯސްޓް މޯޓަމް ހެދުން ހުއްޓުވައި އާއިލާއާ ހަށިގަނޑު ހަވާލުކޮށްދިނުމަށް އެދި ސިވިލް ކޯޓަށް ހުށަހެޅި މައްސަލައިގައި، ޕޯސްޓްމޯޓަމް ހެދުން ހުއްޓުވުމަށް އަމުރެއް ނެރެދެވެން ނެތް ކަމަށް އެ ކޯޓުން ނިންމައިފި އެވެ.

ޑްރަގް މައްސަލައެއްގެ ތުހުމަތުގައި މިދިޔަ ހަފުތާގައި ގދ. ހޯނޑެއްދޫން ރަޝީދު ހައްޔަރުކޮށްފައި ވަނިކޮށް އޭނާގެ މެޔަށް ތަދެއް އަރައިގެން މަރުވުމުން އެކަމުގައި ފުލުހުންގެ އިހުމާލެއް އޮތްތޯ ބެލުމަށް ނެޝެނަލް އިންޓަގްރިޓީ ކޮމިޝަނުން ތަހުގީގު ދަނީ ހިންގަމުންނެވެ. އެކަމާ ގުޅިގެން އޭނާގެ ޕޯސްޓްމޯޓަމެއް ހެދުމަށް ފުލުހުން ނިންމާފައި ވިޔަސް، އާއިލާއިން އެކަމާ ދެކޮޅެވެ.

ރަޝީދުގެ ހަށިގަނޑު ހޯދަން އާއިލާއިން ސިވިލް ކޯޓަށް ހުށަހެޅި މައްސަލާގެ ފުރަތަމަ އަޑުއެހުން އިއްޔެ ވަނީ ބާއްވައިފަ އެވެ.

އެ އަޑުއެހުމަށްފަހު، ރަޝީދުގެ ޕޯސްޓްމޯޓަމް ހަދަން ބޭނުންވަނީ ޖިނާއީ ބޮޑު އެހެން މައްސަލައަކާ ގުޅުވައިގެން ކަމަށް ރަޝީދުގެ ވަކީލުން ވިދާޅުވި އެވެ. އެކަމަކު އެހެން މައްސަލައަކާ ގުޅުވައިގެން ޕޯސްޓްމޯޓަމް ނެހެދޭނެ ކަމަށް ވަކީލުން ވިދާޅުވި އެވެ.

ރަޝީދުގެ މަރުގައި ފުލުހުންގެ އިހުމާލެއް އޮތްތޯ ބެލުމަށް ނޭޝަނަލް އިންޓަގްރިޓީ ކޮމިޝަނާއި ހިއުމަން ރައިޓްސް ކޮމިޝަނުން ދަނީ ތަހުގީގު ކުރަމުންނެވެ.