ނޮޅިވަރަންފަރުގައި އިމާރާތްކޮށްފައިވާ 100 ފްލެޓަށް ކުރިމަތިލާން ހުޅުވާލައިފި

ހދ. ނޮޅިވަރަންފަރުގައި އިމާރާތް ކޮށްފައި ހުރި 100 ފްލެޓަށް ކުރިމަތިލާން ހުޅުވާލައިފި އެވެ.

ނޮޅިވަރަންފަރުގައި އިމާރާތް ކޮށްފައިވާ 100 ފްލެޓުގެ މަސައްކަތް ހަވާލުކުރީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓަޑާ އެވެ. ދައުލަތުގެ ބަޖެޓުން 53.5 މިލިއަން ރުފިޔާ ހަރަދުކޮށްގެން ފެށި އެ މަޝްރޫއަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2011 ވަނަ އަހަރު ފެށި މަޝްރޫއު އެކެވެ.

އަށް މަސް ދުވަހުގެ ތެރޭގައި ނިންމަން އޭރު ފެށި އެ މަޝްރޫއު ވަނީ 2014 ވަނަ އަހަރު ހުއްޓިފަ އެވެ.

އެ ފްލެޓްތައް އަލުން ނިންމަން ހަވާލުކުރީ ދޮންބެޒް ޕްރައިވެޓް ލިމިޓަޑާ އެވެ.

ނޮޅިވަރަންފަރު ކައުންސިލުން މިއަދު ކުރި އިއުލަނެއްގައި ބުނީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އެ ރަށުގައި އިމާރާތްކޮށްފައިވާ 100 ފްލެޓް ދޫކުރުމަށް ނިންމާފައިވާ ކަމަށެވެ.

އެތަންތަން ދޫކުރުމަށް ހަމަޖެހިފައިވަނީ ޕްލޭނިން މިނިސްޓްރީން ކަނޑައަޅާފައިވާ އުސޫލާއި އެއްގޮތަށް، ނޮޅިވަރަންފަރުގެ ރައްޔިތުންނަށް ހާއްސަ ކުރެވިފައިވާ ކެޓަގަރީގައި 75 ހައުސިންޔުނިޓާއި ނޮޅިވަރަންފަރަށް ދިރިއުޅުން ބަދަލުކުރުމަށް ބޭނުންވާ އެހެން ރަށްރަށުގެ ރައްޔިތުންނަށް ހާއްސަ ކުރެވިފައިވާ ކެޓަގަރީގައި 25 ފްލެޓު ކަަމަށެވެ.

ފްލެޓު ގަތުމަށް ޝައުގުވެރިވާ ފަރާތްތަކުން ފޯމު ފުރިހަމަ ކުރުމަށްފަހު އަންނަ މަހުގެ 24 ވަނަ ދުވަހުގެ ކުރިން ކައުންސިލަށް ހުށަހެޅުމަށް ވަނީ އެދިފަ އެވެ.