އެޕަލް އަށް ވަކި ގޮތެއް ހަދައިދޭން އުނދަގޫ ކަމަށް އިންޑިއާ ބުނެފި

އެޕަލް އަށް ޗައިނާ ވަރުގެ ގައުމެއް ނެތެވެ. އެޕަލްގެ އުފެއްދުންތައް ނިސްބަތުން އެންމެ ގިނައިން ބޭނުންކުރަނީ ޗައިނާގަ އެވެ. ނަމަވެސް، ސްމާޓްފޯން މާކެޓަށް ޗައިނާގެ ކުންފުނިތައް ވަދެގަތުން އެޕަލް އަށް ވެފައި ވަނީ ބޮޑު ބިރަކަށެވެ. އަގު ހެޔޮ އަދި އެހައި ރީތި ފޯނުތައް ޗައިނާ ކުންފުނިތަކުން ކެނޑިނޭޅި އުފެއްދުން ވެފައި ވަނީ އެހެން މާކެޓްތައް ހޯދަން އެޕަލް އަށް ގޮވާލާ ގޮވާލުމަކަށެވެ.

އިންޑިއާގެ އާބާދީ ވެސް އެހައި ބޮޑެވެ. ތަފާތަކީ އެޕަލްގެ އުފެއްދުންތައް ބޭނުންކުރާ މީހުންގެ އަދަދެވެ. ޗައިނާ އަށް ވުރެ މަދެވެ. ސަބަބަކީ އަގު ބޮޑުވުމެވެ.

އެޕަލްގެ އުފެއްދުންތައް އިންޑިއާގައި ވިއްކުމަށްޓަކައި ކުރެވެން ހުރި ކަންތައްތަކުގެ ތެރޭގައި، އެންމެ މުހިންމު ކަމަށް އޮތީ އަގު ހެޔޮކުރުމެވެ. އެކަން ކުރެވެން އޮތީ އިންޑިއާގައި ޑިވައިސްތައް އުފައްދައިގެންނެވެ.

އިންޑިއާގައި އިންވެސްޓްކުރަން އެޕަލުން ޝައުގުވެރިވެ އެވެ. އާންމު ފަރުދުންނަށް ފޯރުކޮށްދޭ ޚިދުމަތްތަކުގެ އަގު ކޮންޓްރޯލްކުރުމަށްޓަކައި، އިންވެސްޓްމަންޓް ކުޑަކުރަން ވެސް އެޕަލުން އެދެ އެވެ. އެކަން ކުރެވެން އޮތީ އިންޑިއާ ސަރުކާރުން އެހީތެރިކަމެއް ލިބިގެންނެވެ.

އެޕަލުން ބޭނުންވާ އެހީތެރިކަން ފޯރުކޮށްދޭން އިންޑިއާއިން ގަބޫލެއް ނޫނެވެ. އެޕަލުން ބޭނުންވަނީ އިމްޕޯޓް ޑިއުޓީ ކުޑަކުރުމާއި، އުފެއްދުންތަކުން ޓެކްސް ނެގުމުގައި ވަކި މުއްދަތަކަށް ޚާއްސަ ލުޔެއް ލިބުމެވެ.

އިންޑިއާއިން ބުނަނީ އެޕަލް އަށް ކޮށްދީފި ނަމަ އެހެން ކުންފުނިތަކަށް ވެސް ކޮށްދޭން ޖެހޭނެ ކަމަށެވެ. އެހެން ގައުމުތަކުގެ ކުންފުނިތަކުން އިންޑިއާގައި މިހާރު ވެސް އުފައްދަ އެވެ. މައިކްރޮސޮފްޓް ކަހަލަ އެމެރިކާގެ ބިޔަ ކުންފުނިތަކުން ވެސް އުފައްދަ އެވެ. ޗައިނާގެ ޝޯމީ ފަދަ ސްމާޓްފޯން ކުންފުނިތަކުން ވެސް އިންޑިއާގައި އުފައްދަ އެވެ.

އެޕަލުން ވަނީ އިންޑިއާ ސަރުކާރާ ވާހަކަދަައްކާފަ އެވެ. ވާހަކަތައް އަދި ކޮޅެއްގައި ނުޖެހެ އެވެ. އުސޫލުތައް ހުރި ގޮތުން އެޕަލް އަށް ޚާއްސަ ގޮތެއް ހަދައިދޭން އުނދަގޫ ނަމަވެސް، އިންޑިއާގައި އެޕަލުން އިންވެސްޓްކުރުމަކީ އެ ގައުމުން ވެސް ވަރަށް އެދޭ ކަމެކެވެ. އެހެންކަމުން ހުރިހާ ކުންފުނިތަކަށް އާންމު އުސޫލަކުން ލުޔެއް ލިބިދާނެ ކަމަށް ވެސް ބެލެވެ އެވެ.