މިނީ ބަހުގައި ފުރަތަމަ ދުވަހު 2،000 އަށް ވުރެ ގިނަ މީހުން ދަތުރުކުރި

މާލޭގައި މިނީ ބަހުގެ ދަތުރުތަކުގެ ފުރަތަމަ ދުވަހު 2،200 މީހުން އެ ބަސްތަކުގައި ދަތުރުކުރި ކަމަށް އެމްޓީސީސީން މިއަދު ބުނެފި އެވެ.

އެ ކުންފުނިން އާންމުކުރި ތަފާސްހިސާބުތަކުން އެނގޭ ގޮތުގައި އިއްޔެ އެންމެ ގިނަ މީހުން ބަހުގައި ދަތުރުކުރީ އަމީނީ މަގު ރޫޓުންނެވެ. އެއީ 880 މީހުންނެވެ. ސޯޝަލް ރޫޓުން 750 މީހުން، އޯކިޑް ރޫޓުން 620 މީހުން ދަތުރުކުރި ކަމަށް އެމްޓީސީސީން ބުނެ އެވެ.

ސީއީއޯ އާދަމް އާޒިމް ވިދާޅުވީ، ފުރަތަމަ ދުވަހު ދަތުރު ކުރި މީހުންގެ އަދަދާ މެދު ހިތްހަމަޖެހިވަޑައިގަންނަވާ ކަމަށެވެ. އޭނާގެ އުންމީދަކީ ބަހުގައި ދަތުރުކުރާ މީހުންގެ އަދަދު ކުރިމަގުގައި އިތުރުވުމެވެ.

ބަސް ދަތުރުތަކަށް ޑިމާންޑު އޮންނަ ވަރަކުން ބާރު ބޮޑުވާ ގަޑިތަކުގައި އެ ސަރަހައްދުތަކަށް ބަސްތައް އިތުރު ކުރާނެ ކަަމަށް އާޒިމް ވިދާޅުވި އެވެ.

މާލޭގައި އިއްޔެ އިން ފެށިގެން ދެ ހަފުތާގެ މުއްދަތަށް ބަހުގެ ހިދުމަތް ދޭނީ ހިލެ އެވެ. އޭގެ ފަހުން ކޮންމެ ކޮޅަކަށް 7ރ. ނަގާނެ އެވެ.

އާރްޓީއެލްގެ 18 މިނީ ބަސް މާލޭގައި ދަތުރުކުރާނެ އެވެ. އޭގެ ތެރެއިން 8 ބަހަކީ 20 ސީޓާއެކު ފުރޮޅުލީ ގޮނޑީގައި އުޅޭ މީހުންނަށް ފަސޭހައިން އަރައިފޭބޭނެ ގޮތަށް ރޭމްޕް ހުންނަ ބަސްތަކެކެވެ. ބާކީ ބަސްތަކުގައި 22 ސީޓު ހުންނާނެ އެވެ. ހުރިހާ ބަހެއްގައި ވެސް އިތުރު 10 މީހުންނަށް ކޮއްޅަށް ތިބެވޭނެހެން ހޭންޑްލް ހުރެ އެވެ.

ބަސް ދަތުރުތައް އޮންނާނީ ކޮންމެ ދުވަހެއްގެ ފަތިހު 5:45 އިން ދަންވަރު 12:15 އަށެވެ. އެ ދަތުރުތަކަށް ތިން ރޫޓެއް ކަނޑައަޅާފައިވާއިރު، 40 ބަސް ހުއްޓި ވަނީ ހަދައިފަ އެވެ. އެ އިން ކޮންމެ ސަރަހައްދަކަށް ވެސް 10 މިނިޓާއި 15 މިނިޓާ ދެމެދު ބަސް ދަތުރުކުރާނެ ކަމަށް އެމްޓީސީސީން ބުންޏެވެ.