ޔޫއެސް އޯޕަން: ހަތަރު ވަނަ ބުރުން ނަޑާލް ކަޓައިފި

ނިއު ޔޯކް (ސެޕްޓެމްބަރު 9) - އަހަރުގެ އެންމެ ފަހު ގްރޭންޑް ސްލޭމް ޓެނިސް މުބާރާތް ކަމަށްވާ ޔޫއެސް އޯޕަން މުބާރާތުގެ ހަތަރު ވަނަ ބުރުގައި އެމެރިކާގެ ފްރަންސެސް ޓިއަފޯ އަތުން ބަަލިވެގެން، ސްޕެއިންގެ ރަފައެލް ނަޑާލް އަށް މުބާރާތް ނިމިއްޖެ އެވެ.

ނަޑާލް އާ ވާދަކޮށް، ޓިއަފޯ، 24، މެޗުގެ ސެޓްތައް ގެންދިޔައީ 6-4، 4-6، 6-4 އަދި 6-3 އިންނެވެ. މިއާ އެކު އޭނާ ވަނީ މި އަހަރުގެ ގްރޭންޑް ސްލޭމް މުބާރާތްތަކުގައި ނަޑާލް މޮޅުވަމުން އައި 22 މެޗުގެ ސިލްސިލާއަށް ވެސް ނިމުން ގެނެސްފަ އެވެ.

މިއަހަރުގެ އޮސްޓްރޭލިއަން އޯޕަން އާއި ފްރެންޗް އޯޕަން މުބާރާތާ އެކު، 22 ގްރޭންޑް ސްލޭމް މުބާރާތް ކާމިޔާބު ކޮށްފައިވާ ނަޑާލްގެ މައްޗަށް ކުރި ހޯދުމާ އެކު ޓިއަފޯ އަށް ވަނީ ކުއާޓާ ފައިނަލަށް ދަތުރު ކޮށްފަ އެވެ. ކުއާޓާ ގައި އޭނާ ނުކުންނަން ޖެހޭނީ ނުވަވަނައަށް ސީޑް ކުރެވިފައިވާ ރަޝިއާގެ އަންޑްރޭ ރުބްލޭވް އަށެވެ. ރުބްލޭވް ވަނީ އިނގިރޭސި ވިލާތުގެ ކަމެރޮން ނޯރީ ސީދާ ތިން ސެޓުން ބަލިކޮށްފަ އެވެ.

"މިއަދު ހިނގާދިޔައީ ވަރަށް ހާއްސަ ކަމެއް. އޭނާ (ނަޑާލް) އަކީ ޓެނިހުގެ އެންމެ މޮޅު ކުޅުންތެރިންގެ ތެރޭން ކުޅުންތެރިއެއް. މީގެ ކުރިން އަހަރެންގެ މައްސަލަ ހުރޭ، މިކަހަލަ ބޮޑެތި މެޗުތަކަށް އަހަރެން އެހާ މެޗުއާ އެއް ނޫން. އެކަމަކު މިހާރު އިތުބާރެއް ލިބިއްޖެ،" ނަޑާލް އަތުން ހޯދި މޮޅަށް ފަހު ޓިއަފޯ ބުންޏެވެ.

މެޗަށް ފަހު ނަޑާލް ބުނީ، ބަލިވީ އޭނާއަށް ރަނގަޅަށް ނުކުޅެވިގެން ކަމަށާއި، ޒުވާން ކުޅުންތެރިންނާ ވާދަކުރާ ވަރަށް ވުރެ އޭނާގެ ދުވެލި މަޑުވެއްޖެ ކަމަށެވެ.

"މިއަދު ވީގޮތް ވަރަށް ސާފު، އަހަރެންނަށް ރަނގަޅަކަށް ނުކުޅެވުނު، އެކަމަކު އޭނާ މޮޅަށް ކުޅުނު. އެންމެ މަތީ ލެވެލްގެ ޓެނިހުގައި އަހަރެންނަށް ގިނަދުވަހު ހިފަހައްޓާއި ނުލެވުނު. ކޯޓުމަތީގައި އަހަރެންގެ ހަރަކާތްތައް ވެސް ލަސްވެއްޖެ،" އުމުރުން 36 އަހަރުގެ ނަޑާލް ބުންޏެވެ.

"ޓެނިހުގައި ޕޮޒިޝަނިން ވަރަށް މުހިއްމު ވާނެ. މިއީ ވަރަށް ޒުވާން އަދި ވަރަށް ހަލުއި ކުޅުންތެރިންނަށް ކުޅެވޭނެ ކުޅިވަރެއް، އަހަރެންގެ އެ ސްޓޭޖް ފަހަނައަޅައި ހިނގައްޖެ."

މިއަހަރުގެ އޮސްޓްރޭލިއަން އޯޕަން އާއި ފްރެންޗް އޯޕަން ކާމިޔާބު ކުރުމަށް ފަހު، ނަޑާލް ވަނީ ވިމްބެލްޑަން މުބާރާތުގައި ވެސް ވާދަ ކޮށްފަ އެވެ. އެ މުބާރާޓުގެ ސެމީ ފައިނަލަށް ދަތުރުކުރި ނަމަވެސް، ބަނޑަށް ލިބުނު އަނިޔާއަކަށް ފަރުވާ ކުރަން ނަޑާލް ވަނީ ސެމީ ފައިނަލާ ހަމައިން މުބާރާތުން ވަކިވެފަ އެވެ.

ޔޫއެސް އޯޕަންގެ ކުއާޓާ އަށް ނުގޮސް މުބާރާތާ ކެޓުމުން ނަޑާލް ބުނީ އަލުން ކުޅެން ނުކުންނާނެ ދުވަހެއް ބުނަން ނޭނގޭ ކަމަށާއި، މިވަގުތު އޭނާ ހުރީ އާއިލާއަށް ވަގުތު ހުސްކޮށްގެން ކަމަށެވެ.