ޔޫއޭއީގެ އެންމެ އަގުހެޔޮ ބަޖެޓް އެއާލައިން، ވިޒް އެއާގެ ދަތުރުތައް ރާއްޖެ އަށް ފަށަނީ

ޔޫއޭއީގެ އެންމެ އަގުހެޔޮ ބަޖެޓް އެއާލައިން، ވިޒް އެއާއިން ރާއްޖެ އަށް އަންނަ އޮކްޓޯބަރު މަހު ދަތުރުތައް ފަށާނެ ކަމަށް އެ އެއާލައިނުން ބުނެފި އެވެ.

ވިޒް އެއާއިން އިއުލާންކުރި ގޮތުގައި، ޔުއޭއީގެ ވެރިރަށް އަބޫދާބީން ރާއްޖެ އަށް ދަތުރުކުރަން ހަމަޖެހިފައި ވަނީ ކޮޅަކަށް 319 ދިރުހަމް (1،333ރ.) އަށެވެ. އެ ދަތުރުތައް ފަށާނީ އޮކްޓޯބަރު މަހުގެ ހަތަރު ވަނަ ދުވަހު އެވެ.

ކޮންމެ ހަފުތާއެއްގެ އާދިއްތަ އާއި އަންގާރަ އާއި ބުރާސްފަތި އަދި ހޮނިހިރު ދުވަހު އަބޫދާބީން ވެލާނާ އިންޓަނޭޝަނަލް އެއާޕޯޓަށް ދަތުރުތައް ބާއްވާނެ ކަމަށް އެ އެއާލައިނުން ބުނެ އެވެ.

އެ ދަތުރުތަކުގެ ޓިކެޓް ވިއްކަން މިހާރު ވަނީ ފަށައިފަ އެވެ. ޓިކެޓް ބުކް ކުރުމަށް ވިޒް އެއާގެ އެޕްލިކޭޝަން ނުވަތަ ވިޒްއެއާގެ ވެބްސައިޓް ބޭނުން ކުރެވޭނެ އެވެ.

ޓިކެޓް ބުކްކުރާއިރު، ވިޒް އެއާއިން ތައާރަފުކުރި "ވިޒް ފްލެކްސް" ބޭނުންކުރުމުން، އެންމެ ލަސްވެގެން ފުރުމުގެ ތިން ގަޑިއިރުކުރިން ދަތުރު ކެންސަލް ކުރިއަސް ފުލް ރިފަންޑު ވިޒް އެކައުންޓަށް ލިބެ އެވެ.

އަބޫދާބީ އަކީ ދިވެހިން ވަރަށް ގިނައިން ގޮސް އުޅޭ މަގުބޫލް މަންޒިލެކެވެ.