ރައީސް، ނިއުޒިލެންޑް އަދި ޔޫއޭއީގެ ބޮޑުވަޒީރުންގެ ނައިބާ ބައްދަލުކުރައްވައިފި

ރައީސް ޑރ. މުހައްމަދު މުއިއްޒު ނިއުޒިލެންޑް އަދި ޔޫއޭއީގެ ބޮޑުވަޒީރުންގެ ނައިބާ އިއްޔެ ބައްދަލުކުރައްވައިފި އެވެ.

ރައީސް އޮފީހުން ބުނީ އެމެރިކާގެ ނިއު ޔޯކުގައި ބޭއްވި އދ. ގެ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ރައީސް މުއިއްޒު ނިއުޒިލެންޑްގެ ބޮޑުވަޒީރުގެ ނައިބު، ފޮރިން މިނިސްޓަރު އަދި މިނިސްޓަ އޮފް ރޭސިން ވިންސްޓަން ޕީޓަސްއާ އިއްޔެ ބައްދަލުކުރެއްވި ކަމަށެވެ.

އެ ބައްދަލުކުރެއްވުމުގައި ދެ ބޭފުޅުން ވަނީ ދެ ގައުމުގެ ދޭދޭ ފަރުދުންގެ ދެމެދުގައި އޮންނަ ގުޅުމާއި ވިޔަފާރި ހަރުދަނާ ކުރުން އަދި ގުޅިގެން މަސައްކަތް ކުރެވިދާނެ އެހެން ދާއިރާތަކާ ގުޅޭ ގޮތުން މަޝްވަރާ ކުރައްވައިފަ އެވެ. ޖޯގްރަފީގެ ގޮތުން ރާއްޖެ އޮންނަ ތަނުގެ އިސްތިރާޖީ ފައިދާގެ ބޭނުން ހިއްސާކުރުމާ މެދުގައި ވެސް ދެ ބޭފުޅުން މަޝްވަރާ ކުރެއްވި އެވެ.

"މީގެ އިތުރުން އަންނަ އޮކްޓޯބަރު މަހު ސަމޯއާގައި ބާއްވަން ހަމަހިފައިވާ ކޮމަންވެލްތު ހެޑްސް އޮފް ގަވަމަންޓް އަކީ، ބައިނަލްއަގުވާމި ފެންވަރުގައި ދެ ފަރާތައް ހުރި ގޮންޖެހުންތަކުން އަރައިގަތުމަށްޓަކައި އެކުގައި މަސައްކަތްކުރަން އޮތް ފުރުސަތެއް ކަން ފާހަގަކުރެއްވި އެވެ،" ރައީސް އޮފީހުގެ ވެބްސައިޓުގައި ބުންޏެވެ.

ނިއުޒިލެންޑްގެ އިންވެސްޓަރުންނަށް ރާއްޖޭގެ ހާއްސަ އިގުތިސާދީ ސަރަހައްދުގައި އިންވެސްޓު ކުރުމަށް ރައީސް ދައުވަތު ދެއްވި ކަމަށް ވެސް ރައީސް އޮފީހުން ބުންޏެވެ.

ރާއްޖޭގެ ހާލަތު ޔޫއޭއީއާ ހިއްސާކުރެއްވި

ރައީސް މުއިއްޒު ވަނީ ޔޫއޭއީގެ ބޮޑުވަޒީރުގެ ނައިބު އަދި ފޮރިން މިނިސްޓަރު ޝައިހް އަބްދުﷲ ބިން ޒާއިދު އާލް ނަހްޔާނާ ވެސް އިއްޔެ ބައްދަލުކުރައްވައިފަ އެވެ.

ރައީސް އޮފީހުން ބުނި ގޮތުގައި، އެ ބައްދަލުކުރެއްވުމުގައި ރައީސް މުއިއްޒު ވަނީ، ރާއްޖޭގެ މިހާރުގެ ހާލަތާ ބެހޭ ގޮތުން ޔޫއޭއީގެ ބޮޑުވަޒީރުގެ ނައިބަށް މައުލޫމާތު ދެއްވަައި އެހީތެރިކަން ބޭނުންވާ ދާއިރާތައް ފާހަގަކުރައްވައިފަ އެވެ. ހާއްސަ ގޮތެއްގައި އިގުތިސާދީ ތަރައްގީ އާއި އިންވެސްޓްމަންޓް އަދި ސިއްހީ ދާއިރާގެ ކުރިއެރުމަށް ބޭނުންވާ އެހީތެރިކަން ރައީސް ފާހަކުރެއްވި އެވެ.

ރާއްޖެއަށް އެހީތެރިކަން ފޯރުކޮށްދެވެން އޮތް ކޮންމެ ދާއިރާއަކުން ވެސް އެހީތެރިވާން ތައްޔާރަށް އޮތް ކަމުގެ ޔަގީންކަން ޔޫއޭއީގެ ބޮޑުވަޒީރުގެ ނައިބު، ރައީސް މުއިއްޒަށް ދެއްވި ކަމަށް ވެސް ރައީސް އޮފީހުން ބުންޏެވެ.

"މި ބައްދަލުކުރެއްވުން ނިންމަވާލައްވާފައި ވަނީ ދެ ގައުމުގެ ދެމެދުގަައި އޮތް ސިޔާސީ ގުޅުން ހަރުދަނާކޮށް، ދެ ގައުމުން އިސްކަންދޭ ކަންކަމުގައި އެކުގައި މަސައްކަތް ކުރެއްވުމާ އެކު އެއްބާރުލުން ދެއްވާނެ ކަމުގެ ޔަގީންކަން ދެއްވަމުންނެވެ،" ރައީސް އޮފީހުން ބުންޏެވެ.

ރައީސް އެމެރިކާއަށް ކުރައްވާ ފުރަތަމަ ރަސްމީ ދަތުރުފުޅު ނިންމާލެއްވުމަށް ފަހު މިހާރު ވަނީ އެނބުރި ރާއްޖެ ވަޑައިގަތުމަށް ފުރާވަޑައިގެންފަ އެވެ. އެމަނިކުފާނު މާލެ ވަޑައިގަންނަވާނީ މާދަމާ ހެނދުނެވެ.