ނޭޓޯ ފުޅާކުރުމަށް ތުރުކީ އެއްބަސްވެއްޖެ

އަސްކަރީ އަދި އިގްތިސާދީ ގޮތުން އެއްބާރުލުމަށް، އެމެރިކާ އާއި ވިލާތުގެ ގައުމުތައް ގުޅިގެން، ނޭޓޯގެ ނަމުގައި އުފައްދާފައި އޮންނަ ޖަމިއްޔާގައި ފިންލޭންޑާއި ސްވިޑްން ބައިވެރިކުރުމަށް ހަފުތާތަކެއް ވަންދެން އިންކާރުކުރުމަށް ފަހު، ތުރުކީ ވިލާތް އެންމެ ފަހުން އެކަމަށް އެއްބަސްވެއްޖެ އެވެ.

އެ ދެ ގައުމު ނޭޓޯގައި ބައިވެރިވުމަށް އެދި ހުށަހެޅުމުން އެކަމަށް ތުރުކީ ވިލާތުން ދެކޮޅު ހަދައި، އެ ހުށަހެޅުން ވީޓޯ ކުރާނެ ކަމަށް ބުނަމުން އައީ، ތުރުކީ ވިލާތުގައި ވަކި ވެރިކަމެއް ގާއިމުކުރަން މަސައްކަތް ކުރާ ކުރުދީ ހަނގުރާމަވެރިންނަށް އެ ދެ ގައުމުން ތާއީދުކޮށް މަދަދުވެރިވާތީ އެވެ. އެ ދެ ގައުމާއި ތުރުކީ ވިލާތާ އެކު ހަފުތާތަކެއް ވަންދެން މަޝްވަރާ ކުރުމަށް ފަހު، ތުރުކީ ވިލާތުން އެކަމަށް އެއްބަސްވީ، އެއް ގައުމުން އަނެއް ގައުމުގެ ސަލާމަތީ ކަންތައް ރައްކާތެރިކޮށްދިނުމަށް، އެ ތިން ގައުމުގެ މެދުގައި އެއްބަސްވުމަކަށް އާދެވުމުންނެވެ.

ތުރުކީ ވިލާތުން އެކަމަށް އެއްބަސްވިތާ ދެތިން ގަޑިއިރު ފަހުން، ނޭޓޯގެ ވެރިންގެ މިއަހަރުގެ މަހާސިންތާ، ސްޕެއިންގެ ވެރިރަށް މެޑްރިޑްގައި އިއްޔެ ވަނީ ފަށައިފަ އެވެ. މި މަހާސިންތާ ފެށުމުގެ ކުރިން، ފިންލޭންޑާއި ސްވިޑްން އާއި ތުރުކީ ވިލާތުގެ އިސް ވެރިންގެ ބައްދަލުވުމެއް، ހަތަރު ގަޑިއިރު ވަންދެން މެޑްރިޑްގައި އިއްޔެ ކުރިއަށް ދިޔަ އެވެ.

އިތުރު ގައުމުތައް ނޭޓޯގައި ބައިވެރިކުރުމަށް ތުރުކީ ދެކޮޅު ނުހަދަން ނިންމުމުން، ސްވިޑްން އާއި ފިންލޭންޑުން، ނޭޓޯ އަށް ހުށަހަޅާފައިވާ ހުށަހެޅުން އިތުރަށް ފުރިހަމަ ކުރުމުގެ އިޖުރާއާތުތައް މިހާރު ކުރިއަށް ގެންދެވޭނެ އެވެ ވަކި ފަރާތަކަށް ނުޖެހޭ ގައުމުތަކެއްގެ ގޮތުގައި އޮތުމަށް، ފަހު އެމެރިކާ އާއި ވިލާތުގެ ގައުމުތަކާއެކު އަސްކަރީ ގޮތުން ގުޅުން ބަދަހިކުރުމަށް ސްވިޑްން އާއި ފިންލޭންޑުން ނިންމުމުގެ މައިގަނޑު ސަބަބަކީ، ރަޝިޔާ އިން ޔޫކްރޭނާ ދެކޮޅަށް ފަށާފައިވާ ހަނގުރާމަ އެވެ.

ޔޫރަޕްގެ އިރުމަތީ ބިތުގެ ގައުމުތަކުގައި އެމެރިކާ އާއި ނޭޓޯގެ އަސްކަރީ ހަރަކާތްތައް ފުޅާކުރަމުން ދާތީ އާއި އެކަމުގެ ސަބަބުން ރަޝިޔާ އަށް ކުރިމަތިވާ ނުރައްކާތައް ނައްތައިލުމުގެ މަގްސަދުގައި، ރަޝިޔާ އިން ޔޫކްރޭނާ ދެކޮޅަށް ހަނގުރާމަ ފެށީ މިދިޔަ ފެބްރުއަރީ މަހުގެ 24 ވަނަ ދުވަހު އެވެ. އެ ހަނގުރާމަ އަށް ހަތަރު މަސް ފުރިގެން ދިޔައިރު، ރަޝިޔާ ސިފައިން ވަނީ ޔޫކްރޭންގެ އިރުމަތިންނާއި ދެކުނުން ބޮޑު ބައެއް ހިފައިފަ އެވެ.

ސްވިޑްން އާއި ފިންލޭންޑް ނޭޓޯގައި ބައިވެރިކުރުމަށް ތުރުކީ ވިލާތުން އެއްބަސްވީ، ތުރުކީން ބޭނުންވާ މުހިންމު ކަންތައްތަކަކަށް އެ ދެ ގައުމުން އެއްބަސްވުމުންނެވެ. އޭގެ ތެރެއިން ފުރަތަމަ ކަމަކީ، ތުރުކީ ވިލާތަށް ނުރައްކާކުރާ ކަމަށް އެ ގައުމުން ތުހުމަތުކުރާ ޖަމާއަތްތަކާއި ވަކިވަކި ފަރުދުންނާ ދެކޮޅަށް އެ ދެ ގައުމުން ވެސް ހަރުކަށި ފިޔަވަޅުތަކެއް އެޅުމެވެ.

އޭގެ އިތުރުން އެ ދެ ގައުމުން އެއްބަސްވި އަނެއް ކަމަކީ، ތުރުކީ ވިލާތަށް އަސްކަރީ ހަތިޔާރު ވިއްކުމުގައި އެދެ ގައުމުން ގެންގުޅެމުން އަންނަ ހަރުކަށި އުސޫލުތައް ދޫކޮށްލުމެވެ.