ފިންލޭންޑާއި ސްވިޑްން ނޭޓޯގައި ބައިވެރިވުމާ ތުރުކީ ދެކޮޅު

ނޭޓޯގެ މެމްބަރުކަން ހޯދުމަށް ފިންލޭންޑާއި ސްވިޑްން އިން ކުރަމުން އަންނަ މަސައްކަތަށް ތުރުކީ ވިލާތުން ތާއީދު ނުކުރާނެ ކަމަށް، އެ ގައުމުގެ ރައީސް ރަޖަބު ތައްޔިބު އުރުދުޣާން އިއްޔެ ވިދާޅުވެއްޖެ އެވެ.

ތުރުކީގެ މެމްބަރު ގައުމެއް ކަމަށްވާ ތުރުކީ ވިލާތުން އެކަމަށް މި ދެކޮޅު ހެދީ، ނޭޓޯގެ މެމްބަރުކަން ހޯދުމަށް ރަސްމީކޮށް ހުށަހަޅާނެކަން ފިންލޭންޑާއި ސްވިޑްން އިން އިއްޔެ އިއުލާންކުރިތާ މާ ގިނަ އިރުތަކެއް ނުވަނީހެވެ. އުރުދުޣާން ވިދާޅުވީ ތުރުކީ ވިލާތުން އެކަމަށް ދެކޮޅު ހެދުމުން، އިތުރަށް ތުރުކީ އަށް ވިސްނައިދިނުމަށް އެ ދެ ގައުމުގެ މަންދޫބުން ތުރުކީ އަށް ފޮނުވުމުގެ ބޭނުމެއް ނެތް ކަމަށެވެ.

ރައީސް އުރުދުޣާން އެކަމަށް ދެކޮޅު ހެއްދެވުމުގެ ސިއްރަކީ، ތުރުކީ ވިލާތުގައި ވަކި ވެރިކަމެއް ގާއިމުކުރުމަށް މަސައްކަތް ކުރާ ކުރުދީ ދަރިކޮޅުގެ ހަނގުރާމަވެރިންނަށް، ފިންލޭންޑާއި ސްވިޑްން އިން ތާއީދުކޮށް ހިމާޔަތް ދޭން ނިންމާފައިވުމެވެ. ނޫސްވެރިންނާ އިއްޔެ ވާހަކަ ދައްކަވަމުން، ރައީސް އުރުދުޣާން ވިދާޅުވީ ސްވިޑްން އަކީ ޓެރަރިސްޓް ޖަމާއަތްތަކުގެ ބިސް ފީކޮށްދީގެ އިތުރު ޓެރަރިސްތުން އުފަން ކުރުވާ ހާއްޔެއް ކަމަށެވެ.

"މިއިން އެއްވެސް ގައުމަކީ، ޓެރަރިސްޓުންނާ ދެކޮޅަށް ސާފު އަދި ފާޅުކަން ބޮޑު ސުލޫކެއް ގެންގުޅޭ ގައުމެއް ނޫން. އެފަދަ ގައުމުތަކަކަށް އަހަރެމެން އިތުބާރު ކުރާނީ ކިހިނެއް؟" އުރުދުޣާން ވިދާޅުވި އެވެ.

ޓެރަރިސްޓް ޖަމާއަތެއްގެ ގޮތުގައި ތުރުކީ ވިލާތުން ކަނޑައަޅާފައިވާ ކުރުދިސްތާން ވޯކާސް ޕާޓީގެ މެންބަރުންނަށް ފިންލޭންޑާއި ސްވިޑްން އިން ވަނީ ހިމާޔަތް ދީ، އެ ޕާޓީގެ ހަރަކާތްތައް ހިންގުމުގެ ފުރުސަތު ފަހިކޮށްދީފަ އެވެ. އަދި އުރުދުޣާން އަވަހާރަކޮށްލުމަށް 2016 ވަނަ އަހަރު ގެނައި ނާކާމިޔާބު ބަޣާވާތުގެ އަޑީގައި ހުންނެވި ފަތުހުﷲ ގުލް އަށް ތާއީދުކުރާ މީހުންނަށް ވެސް އެ ދެ ގައުމުން ވަނީ ހިމާޔަތް ދީފަ އެވެ.

އޭގެ އިތުރުން، ތުރުކީ ވިލާތަށް ދަތިކުރުމުގެ ގޮތުން ފިޔަވަޅުތައް އަޅާފައިވާ އެއްވެސް ގައުމެއް، ނޭޓޯގައި ބައިވެރިވާން މަސައްކަތް ކުރާ ނަމަ، އެކަމަކަށް ތުރުކީ ވިލާތުން ދެކޮޅު ހަދާނެ ކަމަށް ވެސް އުރުދުޣާން ވިދާޅުވި އެވެ. ސީރިޔާގެ ދާޚިލީ ހަނގުރާމައިގެ ތެރެއަށް ތުރުކީ ވިލާތް ވަނުމާ ގުޅިގެން، ތުރުކީ ވިލާތަށް އަސްކަރީ ގޮތުން ދަތިކުރުމުގެ ފިޔަވަޅުތަކެއް، ފިންލޭންޑާއި ސްވިޑްން އިން ވަނީ 2019 ވަނަ އަހަރު އަޅައިފަ އެވެ.

ފިންލެންޑް ނޭޓޯގައި ބައިވެރިވާން ނިންމައި އެކަން އިއުލާން ކުރުމާ ގުޅިގެން، ސްވިޑްން ވެސް އިއްޔެ ވަނީ ނޭޓޯގައި ބައިވެރިވާން ހުށަހަޅާނެކަން އިއުލާން ކޮށްފަ އެވެ. އެކަން އިއުލާން ކުރައްވަމުން ސްވިޑްންގެ ބޮޑުވަޒީރު މަގްޑަލޭނާ އެންޑާސަން އިއްޔެ ވިދާޅުވީ ނޭޓޯގެ ސަބަބުން ސްވިޑްން ބާރު ގަދަވާނެ ކަމަށާއި، ސްވިޑްންގެ ސަބަބުން ނޭޓޯ ވެސް އިތުރަށް ބާރު ގަދަވާނެ ކަމަށެވެ.

އެ ދެ ގައުމުން ނޭޓޯއާ ގުޅުމުގެ މަސައްކަތް އަވަސްކުރީ، މިދިޔަ ފެބްރުއަރީ މަހުގެ 24 ވަނަ ދުވަހުން ފެށިގެން ރަޝިޔާ ސިފައިން ޔޫކްރޭނާ ދެކޮޅަށް ކުރަމުންދާ ހަނގުރާމައިގެ ސަބަބުން، ޔޫރަޕަށް އިތުރު ނުރައްކާތަކެއް ކުރިމަތިވެފައިވާ ކަމަށް ބުނެ އެވެ. ސްވިޑްންގެ ބޮޑުވަޒީރު ވިދާޅުވި ގޮތުގައި ސްވިޑްން އާއި ޔޫރަޕްގެ ރައްޔިތުން ވެސް މިހާރު ދިރިއުޅެމުން ދަނީ ވަރަށް ނުރައްކާތެރި ހަގީގަތްތަކެއްގެ ތެރޭގައި ކަމަށެވެ.

ބޮޑުވަޒީރު މަގްޑަލޭނާ އެންޑާސަން ވިދާޅުވި ގޮތުގައި ނޭޓޯގައި ބައިވެރިވުމަށް އެދި ހުށަހަޅަންޖެހޭ ރަސްމީ ލިޔުންތައް ކުޑަ ދުވަސްކޮޅެއްގެ ތެރޭގައި، ފިންލޭންޑާ އެކު ސްވިޑްން އިން ވެސް ހުށަހަޅާނެ އެވެ. އެ ދެ ގައުމަށް މެމްބަރުކަން ދިނުމަށް ބޭނުންވާ ކަމަށް ނޭޓޯ އިން ވެސް ވަނީ ބުނެފަ އެވެ.

ނޭޓޯގައި މިހާތަނަށް ބައިވެރިވެފައިވާ ނޯޑިކް ސަރަހައްދުގެ އަނެއް ތިން ގައުމު ކަމަށްވާ ނޯވޭ އާއި އައިސްލޭންޑާއި ޑެންމާކުން ބުނެފައިވަނީ، ފިންލޭންޑާއި ސްވިޑްން އަށް ނޭޓޯގެ މެމްބަރުކަން ދިނުމަށް ތާއީދުކުރާ ކަމަށެވެ.

އޭގެ އިތުރުން، އެ ދެ ގައުމުން ނޭޓޯގެ މެމްބަރުކަން ހޯދުމަށް ރަސްމީކޮށް ހުށަހެޅުމަށް ފަހު، މެމްބަރުކަން ލިބުމާ ދެމެދު ހޭދަވާ އިންތިގާލީ މަރުހަލާގެ ތެރޭގައި އެ ދެ ގައުމަށް ސަލާމަތީ ރައްކާތެރިކަން ފޯރުކޮށްދޭނެ ކަމަށް އިނގިރޭސި ވިލާތުން ވަނީ ބުނެފަ އެވެ.

ފިންލޭންޑާއި ސްވިޑްން، ނޭޓޯގައި ބައިވެރިވާން ރަސްމީކޮށް ނިންމި އިރު، ނޭޓޯ އިން ވަނީ ބޯލްޓިކް ސަރަހައްދުގައި ވަރަށް ބޮޑު އަސްކަރީ ތަމްރީންތަކެއް ފަށައިފަ އެވެ. ދިހަ ގައުމު ބައިވެރިވާ މި ތަމްރީންތަކުގައި އެކި ގައުމުތަކުގެ 15،000 ސިފައިން ބައިވެރިވެ އެވެ. އޭގެ ތެރޭގައި ފިންލޭންޑާއި ސްވިޑްން ވެސް ހިމެނެ އެވެ.

އެ ދެ ގައުމުން ނޭޓޯގެ މެމްބަރުކަން ހޯދުމަށް ހުށަހެޅި ނަމަވެސް، މެމްބަރުކަން ލިބޭނީ ނޭޓޯގައި މިހާރު ހިމެނޭ 30 މެމްބަރުންގެ ތާއީދު އެކަމަށް ލިބިގެންނެވެ. އެކަމަށް އެންމެ ގައުމަކުން ދެކޮޅު ހެދި ނަމަވެސް، ނޭޓޯގައި އެއްވެސް ގައުމެއް ބައިވެރިއެއް ނުކުރެވޭނެ އެވެ. ތުރުކީ ވިލާތުން މިހާރު ވަނީ ފާޅުގައި އެކަމަށް ދެކޮޅު ހަދައިފަ އެވެ.

ރަޝިޔާއާ، 800 މޭލުގެ ދިގު ސަރަހައްދަކުން އެއްގަމުން ގުޅިފައި އޮތް ފިންލޭންޑަށް ނޭޓޯގެ މެމްބަރުކަން ދިނުމަކީ، ރަޝިޔާ ދެކޭ ގޮތުގައި، އެމެރިކާ އާއި ވިލާތުގެ ގައުމުތަކުގެ އަސްކަރީ ޒަމާނީ ހަތިޔާރުތައް ރަޝިޔާއާ ދެކޮޅަށް ރަޝިޔާގެ ދޮރުމަތީގައި ރުކުރުވައިލުމެވެ. އެ ދެ ގައުމަށް ނޭޓޯގެ މެންބަރުކަން ދިނުމަށް، އެމެރިކާ އާއި ވިލާތުގެ ގައުމުތައް ބޭނުން ވަނީ ވެސް އެ މަގްސަދުގަ އެވެ.