ހިޔާ ސަރަހައްދަށް ތިން ކްލިނިކް

ހުޅުމާލެ 2 ގައި ދެ މެޑިކަލް ފެސިލިޓީ ާއި ތިން ކްލިނިކް ހަދަން ނިންމާފައިވާ ކަމަށް އެޗްޑީސީން މިއަދު ބުނެފި އެވެ.

އެ ކުންފުނީގެ މީޑިއާ އޮފިޝަލަކު "މިހާރު" އަށް ވިދާޅުވީ 71،127.92 އަކަފޫޓްގެ ފްލޮޓު (K9-N) އަދި 67،522.01 އަކަ ފޫޓުގެ ޕްލޮޓު (N5-50) ގައި ދެ މެޑިކަލް ފެސިލިޓީ އިމާރާތްކުރާނެ ކަމަށެވެ. އޭގެ ތެރެއިން N5-50 ޕްލޮޓުގައި މެޑިކަލް ފެސިލިޓީ އިމާރާތްކޮށްދޭނެ ބަޔަކު ހޯދަން މިދިޔަ ޖެނުއަރީ 24 ގައި އެޗްޑީސީން ވަނީ އިއުލާންކޮށްފަ އެވެ.

އޮފިޝަލް ވިދާޅުވީ، އޭރު ކުރި އިއުލާނަށް ކުރިމަތިލި ފަރާތްތަކުގެ ފޯމުތައް އިވެލުއޭޓްކޮށް، ބަޔަކާ ހަވާލުކުރުމުގެ މަސައްކަތް ކުރަމުން އަންނަ ކަމަށެވެ.

ހިޔާ ޓަވަރުތަކުގެ ގްރައުންޑް ފްލޯ އިން ކޮމާޝަލް ޔުނިޓްތަކުގެ ގޮތުގައި ކަނޑައަޅާފައިވާ ޔުނިޓްތަކުގައި ވެސް ތިން ކްލިނިކް އަދި ހަތަރު ފާމަސީއެއް ހަދާނެ އެވެ. އޭގެ ތެރެއިން ފުރަތަމަ ކްލިނިކް މި މަހުގެ 15 ގައި ވަނީ ހުޅުވައިފަ އެވެ.

އޮފިޝަލް ވިދާޅުވިގޮތުގައި، ވިނަރެސް ފްލެޓުތަކުގެ ތިރިން ވެސް ކްލިނިކް ހިންގަން ޔުނިޓް ވަނީ ކަނޑައަޅައިފަ އެވެ.

ހިޔާ ފްލެޓުތަކުގައި މީހުން ދިރިއުޅެން ފެށުމާއެކު ހުޅުމާލޭގެ އާބާދީ ވަނީ ވަރަށް ބޮޑަށް އިތުރުވެފަ އެވެ. އެއާއެކު، އެންމެ ބޮޑު ޑިމާންޑެއް އައިސްފައިވާ އެއް ތަނަކީ ހުޅުމާލެ ހޮސްޕިޓަލެވެ. އެޗްޑީސީން ބުނީ އެ ސަރަހައްދުގައި ދިރިއުޅޭ އާއްމުންނަށް ބޭނުންވާނެ ޒަރޫރީ ހިދުމަތްތައް ފޯރުކޮށްދިނުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އޭގެ ތެރޭގައި ކެފޭ/ރެސްޓޯރެންޓްތައް ހުޅުވައި ހަތަރު ސްކޫލެއް އިމާރާތްކުރުމުގެ މަސައްކަތް އަންނަނީ ކުރަމުންނެވެ