ވަރުގަދަ ޓީމުތަކާ ކުޅެން ދިވެހި ކުޅުންތެރިން ޖެހިލުން ނުވާކަން އެނގިއްޖެ: މޮރިއޭރޯ

ފެންވަރު މަތި ޓީމުތަކާ ދެކޮޅަށް ކުޅެން ދިވެހި ކުޅުންތެރިން ޖެހިލުން ނުވުން އެއީ ޓީމުން ފެނުނު ރަނގަޅު ސިފައެއް ކަމަށް ގައުމީ ޓީމުގެ ކޯޗު ފްރެންޗެސްކޯ މޮރިއޭރޯ ބުނެފި އެވެ.

އޭޝިއަން ކަޕް ކޮލިފިކޭޝަންގައި ރޭ އުޒްބެކިސްތާން އަތުން 4-0 ން ރާއްޖެ ބަލިވި، މެޗަށް ފަހު މީޑިއާ އާ ވާހަކަ ދައްކަމުން، މޮރިއޭރޯ ބުނީ ވަރުގަދަ ޓީމަކާ ދެކޮޅަށް ރާއްޖޭގެ ކުޅުންތެރިން ކުޅުނީ ވަރުގަދަ ގޭމެއް ކަމަށެވެ. މިވަރުގެ ވަރުގަދަ މެޗުތަކަކަށް ތައްޔާރުވާން ލިބުނު ވަގުތު މަދުކަން ދޭހަވާ ގޮތަށް މޮރިއޭރޯ ވާހަކަ ދެއްކި އެވެ.

"އަހަންނަށް ހީވަނީ އަހަރެންގެ ކުޅުންތެރިން އެ ކުރަނީ ވަރަށް ހާއްސަ ކަމެއްހެން،" ވަރުގަދަ ޓީމުތަކާ ދެކޮޅަށް މަދު ޕްރެކްޓިސްތަކާ އެކު ވެސް އެކަށީގެންވާ ކުޅުމެއް ދިވެހި ޓީމު ދެއްކި ކަން ފާހަގަ ކޮށް މޮރިއޭރޯ ބުންޏެވެ.

"އަހަރެން ވަރަށް ފަހުރުވެރިވޭ މި ކުޅުންތެރިންނާ މެދު ސަބަބަކީ މި ކުޅުންތެރިން ވަރަށް ރަނގަޅު މެޗެއް ކުޅެފި."

މެޗަށް ފަހު މޮރިއޭރޯ އާ ބައްދަލުވެ، އުޒްބެކިސްތާންގެ ކޯޗު ޝުރޭކޯ ކަޓާނިޗް، މޮރިއޭރޯގެ މަސައްކަތާއި ރާއްޖޭގެ ޓީމުން ދެއްކި ކުޅުމަށް ތައުރީފް ކުރި ކަމަށް އޭނާ ބުންޏެވެ. ޓީމުގެ ބޭރުން މީހަކު، އޭނާގެ ޓީމާ މެދު އެގޮތަށް ޝުއޫރު ފާޅު ކުރުމަކީި ލިބުނު ހިތްހަމަޖެހުމެއްކަން މޮރިއޭރޯ ފާހަގަ ކުރި އެވެ.

"އޭގެ މާނައަކީ އެހެން މީހުންނަށް ވެސް އެބަ ފާހަގަވޭ އަހަރެމެން ކުރިއެރުން ހޯދަމުން އަންނަކަން. އަދި އަހަރެމެންގެ މަސައްކަތް ރަނގަޅު ވަމުން އަންނަކަން،" މޮރިއޭރޯ ބުންޏެވެ.

އެކަމަކު އޭނާ ބުނީ، ރޭގެ މެޗުން ވެސް ރާއްޖޭގެ ޓީމު ބަލިވީ ތައިލެންޑް މެޗުގައި ވެސް ހެދި ގޯސްތައް ރޭ ވެސް ތަކުރާރު ކުރުމުން ކަމަށެވެ. އުޒްބެކިސްތާންގެ ކެޕްޓަން އެލްޑާ ޝޯމޯރްޑާވް އަކީ، މަޝްހޫރު ހޯޒޭ މޮރީނިއޯގެ ކޯޗު ކަމުގެ ދަށުން އޭއެސް ރޯމާ އާއެކު ޔޫއެފާ ޔޫރޮޕާ ކޮންފަރެސް ލީގު ޗެމްޕިއަންކަން ހޯދި ކުޅުންތެރިޔެކެވެ.

މޮރިއޭރޯ ބުނީ ތައިލެންޑް ޓީމާ އުޒްބެކިސްތާނާ ތަފާތު ބޮޑު ކަމަށެވެ. އުޒްބެކިސްތާންގެ އެޓޭކްތައް ވަރުގަދަ ކަމަށް އޭނާ ބުންޏެވެ. އެ ޓީމުގެ އެޓޭކްޔައް ވަރުގަދަ ވުމުން ރާއްޖެ އަށް ކުޅެން އުނދަގޫވި ކަމަށް، އިޓަލީގެ އިންޓަ މިލާނަށް ކުރިން ކުޅުނު މިޑްފީލްޑަރު ބުންޏެވެ.

ތައިލެންޑާއި އުޒްބެކިސްތާން އަތުން ބަލިވެ، ރާއްޖެ އަށް ވަނީ އޭޝިއަން ކަޕްގެ ދޮރު ބަންދު ވެފަ އެެވެ. ރާއްޖެ އަށް ދެން އޮތީ ފަހު މެޗުގައި ލަންކާ އާ ދެކޮޅަށް ކުޅޭ މެޗެވެ. އެ މެޗު ކުޅޭނީ އަންގާރަ ދުވަހު ހަވީރު 5:30 ގަ އެވެ.